सोपाधिकं प्रभावं भगवतो दर्शयित्वा तज्ज्ञानफलम् आह -

एतामिति ।

बुद्ध्याद्युपादानत्वेन विविधा भूतिः - भवनम् वैभवम् सर्वात्मकत्वम् , तदाह -

विस्तारमिति ।

ईश्वरस्य तत्तदर्थसम्पादनसामर्थ्यं योगः, तदाह -

आत्मन इति ।

योगः - तत्फलम् ऐश्वर्यं सर्वज्ञत्वं सर्वेश्वरत्वं च मदीयं शक्तिज्ञानलेशम् आश्रित्य मन्वादयो भृग्वादयश्च ईशते जानते च तदाह -

अथवेति ।

यथा तौ विभूतियोगौ तथा वेदनस्य निरङ्कुशत्वं दर्शयति -

यथावदिति ।

सोपाधिकं ज्ञानं निरूपाधिकज्ञाने द्वारम् , इत्याह -

सोऽविकम्पेनेति ।

उक्ते अर्थे प्रतिबन्धाभावम् आह -

नास्मिन् इति

॥ ७ ॥