ಈಶ್ವರಾತ್ ಪ್ರತೀಚಃ ಪ್ರಗುಕ್ತಾತ್ ಅನ್ಯತ್ರ  ಚಿತ್ತಪ್ರಚಾರರಾಹಿತ್ಯಂ ಭಗವದ್ಭಜನೋಪಾಯಮ್ ಆಹ -

ಮಯೀತಿ ।

ಚಕ್ಷುರಾದೀನಾಂ ಭಗವತಿ ಅಪ್ರಾಪ್ತಿಃ, ತದಗೋಚರತ್ವಾತ್ ತಸ್ಯ, ಇತ್ಯಾಶಂಕ್ಯ, ಆಹ -

ಮಯ್ಯುಪಸಂಹೃತೇತಿ ।

ಭಗವದತಿರೇಕೇಣ ಜೀವನೇಽಪಿ ನ ಆದರಃ । ತದಪಿ ಮಯ್ಯೇವ ಅರ್ಪಿತಂ ಭಕ್ತಾನಾಮ್ , ಇತ್ಯಾಹ -

ಅಥವೇತಿ ।

ಆಚಾರ್ಯೇಭ್ಯಃ ಶ್ರುತ್ವಾ, ವಾದಕಥಯಾ ಪರಸ್ಪರಂ ಭಗವಂತಂ ಸಬ್ರಹ್ಮಚಾರಿಣೋ ಬೋಧಯಂತಿ । ತದಪಿ ಭಗವದ್ಭಜನಸಾಧನಮ್ , ಇತ್ಯಾಹ -

ಬೋಧಯಂತ ಇತಿ ।

ಆಗಮೋಪಪತ್ತಿಭ್ಯಾಂ ಭಗವಂತಮೇವ ವಿಶಿಷ್ಟಧರ್ಮಾಣಂ ಶಿಷ್ಯೇಭ್ಯೋ ಗುರವೋ ವ್ಯುಪದಿಶಂತಿ । ತದಪಿ ಭಗವದ್ಭಜನಮೇವ, ಇತ್ಯಾಹ -

ಕಥಯಂತ ಇತಿ ।

ಭಕ್ತಾನಾಂ ತುಷ್ಟಿರತೀ ಸ್ವರಸತಃ ಸ್ಯಾತಾಮ್ ಇತ್ಯಾಹ -

ತುಷ್ಯಂತೀತಿ ।

ಮನೋರಥಪೂರ್ತ್ಯಾ ರತಿಪ್ರಾಪ್ತೌ ಕಾಮುಕಸಮ್ಮತಮ್ ಉದಾಹರಣಮ್ ಆಹ -

ಪ್ರಿಯೇತಿ

॥ ೯ ॥