अमानित्वादोनां ज्ञानत्वमुक्त्वा ज्ञातव्यमवतारयति -

ज्ञेयमिति ।

प्रश्नद्वारा ज्ञेयप्रवचनस्य फलमुक्त्वा प्ररोचनं कृत्वा तेन श्रोतुः आभिमुख्यमापादयितुं प्ररोचनफलोक्तिपरम्  अनन्तरवाक्यम् , इत्याह -

किमित्यादिना ।

तदेव विशिनष्टि -

अनादिमदिति ।

आदिमत्वराहित्यम् अव्याकृतस्याप्यस्ति, अतो विशेषं दर्शयति -

किं तदिति ।

भोक्तुरपि भोग्यात् परत्वम् , इत्यतो विशिनष्टि -

ब्रह्मेति ।