జ్ఞేయప్రవచనమ్ అనిర్వాచ్యవిషయత్వాత్ ప్రక్రమప్రతికూలమ్ , ఇతి ఆక్షిపతి -
నన్వితి ।
నిర్విశేషస్య వస్తునో జ్ఞేయత్వాత్ తద్విషయం ప్రవచనం ప్రక్రమానుకూలమ్ ఇతి, ఉత్తరమాహ -
నేత్యాదినా ।
అనిర్వాచ్యత్వేన ‘న సత్తన్నాసత్ ‘ ఇతి ఉచ్యమానే కథమిదమ్ అనురూపమ్ ? ఇతి పృచ్ఛతి -
కథమితి ।
బ్రహ్మాత్మప్రకాశస్య సిద్ధత్వాత్ తదర్థం విధిముఖేన ఉపదేశాయోగాత్ అధ్యస్తతద్ధర్మనివృత్తయే నిషేధద్వారా ఉపదేశస్య వేదాన్తేషు ప్రసిద్ధేః ఆరోపితవిశేషనిషేధరూపమ్ ఇదం ప్రవచనముచితమ్ , ఇతి పరిహరతి -
సర్వాస్వితి ।
జ్ఞేయస్య బ్రహ్మణో విధిముఖోపదేశాయోగే హేతుమాహ -
వాచ ఇతి ।