సాధనాని ఉపదిశన్ నైష్కర్మ్యసిద్ధిం వ్యపదిశతి -

అసక్తేతి ।

పుత్రాదివిషయే చేతసః సఙ్గాభావేఽపి తస్య అస్వాధీనత్వమ్ ఆశఙ్క్య, ఆహ-

జితాత్మేతి ।

అసక్తిమ్ ఉక్త్వా స్పృహాభావం వదతా పునరుక్తిః ఇష్టా ఇతి ఆశఙ్క్య, ఆహ-

దేహేతి ।

ఉక్తమ్ అనూద్యతత్ఫలం లమ్భయతి -

య ఎవమితి ।

కర్మణాం నిర్గతౌ హేతుమ్ ఆహ - నిష్క్రియేతి ।

సమ్యగ్జ్ఞానార్థత్వేన నైష్కర్మ్యసిద్ధిశబ్దం వ్యాఖ్యాయ అర్థాన్తరమ్ ఆహ -

నైష్కర్మ్యస్యేతి ।

ప్రకర్షమేవ ప్రకటయతి -

కర్మజేతి ।

సంన్యాసస్య శ్రుతిస్మృత్యోః సమ్యగ్దర్శనత్వాప్రసిద్ధేః అయుక్తం తాదాత్మ్యమ్ ఇతి ఆశఙ్క్య, పక్షాన్తరమ్ ఆహ -

తత్పూర్వకేణేతి ।

సంన్యాసాత్ నైష్కర్మ్యప్రాప్తిః ఇత్యత్ర వాక్యోపక్రమానుకూల్యమ్ ఆహ -

తథా చేతి

॥ ౪౯ ॥