ఋతం పిబన్తావిత్యస్యా వల్ల్యాః సమ్బన్ధః — విద్యావిద్యే నానా విరుద్ధఫలే ఇత్యుపన్యస్తే, న తు సఫలే తే యథావన్నిర్ణీతే । తన్నిర్ణయార్థా రథరూపకకల్పనా, తథా చ ప్రతిపత్తిసౌకర్యమ్ । ఎవం చ ప్రాప్తృప్రాప్యగన్తృగన్తవ్యవివేకార్థం రథరూపకద్వారా ద్వావాత్మానావుపన్యస్యేతే — ఋతం సత్యమ్ అవశ్యంభావిత్వాత్కర్మఫలం పిబన్తౌ ; ఎకస్తత్ర కర్మఫలం పిబతి భుఙ్క్తే నేతరః, తథాపి పాతృసమ్బన్ధాత్పిబన్తావిత్యుచ్యేతే చ్ఛత్రిన్యాయేన । సుకృతస్య స్వయఙ్కృతస్య కర్మణః ఋతమితి పూర్వేణ సమ్బన్ధః । లోకే అస్మిఞ్శరీరే, గుహాం గుహాయాం బుద్ధౌ ప్రవిష్టౌ, పరమే, బాహ్యపురుషాకాశసంస్థానాపేక్షయా పరమమ్ , పరార్ధే పరస్య బ్రహ్మణోఽర్ధం స్థానం పరార్ధం హార్దాకాశమ్ । తస్మిన్హి పరం బ్రహ్మోపలభ్యతే । తతః తస్మిన్పరమే పరార్ధే హార్దాకాశే ప్రవిష్టావిత్యర్థః । తౌ చ చ్ఛాయాతపావివ విలక్షణౌ సంసారిత్వాసంసారిత్వేన బ్రహ్మవిదో వదన్తి కథయన్తి । న కేవలమకర్మిణ ఎవ వదన్తి । పఞ్చాగ్నయో గృహస్థాః । యే చ త్రిణాచికేతాః త్రిఃకృత్వో నాచికేతోఽగ్నిశ్చితో యైస్తే త్రిణాచికేతాః ॥