आत्मनोऽद्वितीयत्वे कथमनेकैर्भावैस्तस्य विकल्पितत्वमित्यभिप्रायाप्रतिपत्त्या प्रत्यवतिष्ठते –

प्राणादिभिरिति ।

सिद्धान्ती स्वाभिसन्धिमुद्घाटयन्नुत्तरमाह –

मायेति ।

चोद्यभागं विभजते –

यदीति ।

उत्तरार्धमुत्तरत्वे व्याकरोति –

उच्यत इति ।

मायामेव दृष्टान्तेन स्पष्टयति –

यथेति ।

तामेव मायां कार्यद्वारा स्फोरयति –

ययेति ।

यथा लौकिको मोहितो मोहपरवशो दृश्यते तथाऽयमात्मा स्वयमेव मायासम्बन्धान्मोहितो भवति। अतो मोहद्वाराऽऽत्मन्येव मायाधिगतिरित्यर्थः।

मायाया मोहहेतुत्वं भगवताऽपि सूचितमित्याह –

ममेति ॥१९॥