అథ హైనం భార్గవో వైదర్భిః పప్రచ్ఛ భగవన్కత్యేవ దేవాః ప్రజాం విధారయన్తే కతర ఎతత్ప్రకాశయన్తే కః పునరేషాం వరిష్ఠ ఇతి ॥ ౧ ॥

తస్మై స హోవాచ । ఆకాశో హ వా ఎష దేవో వాయురగ్నిరాపః పృథివీ వాఙ్మనశ్చక్షుః శ్రోత్రం చ । తే ప్రకాశ్యాభివదన్తి వయమేతద్బాణమవష్టభ్య విధారయామః ॥ ౨ ॥

తాన్వరిష్ఠః ప్రాణ ఉవాచ మా మోహమాపద్యథాహమేవైతత్పఞ్చధాత్మానం ప్రవిభజ్యైతద్బాణమవష్టభ్య విధారయామీతి తేఽశ్రద్దధానా బభూవుః ॥ ౩ ॥

సోఽభిమానాదూర్ధ్వముత్క్రామత ఇవ తస్మిన్నుత్క్రామత్యథేతరే సర్వ ఎవోత్క్రామన్తే తస్మిꣳశ్చ ప్రతిష్ఠమానే సర్వ ఎవ ప్రాతిష్ఠన్తే । తద్యథా మక్షికా మధుకరరాజానముత్క్రామన్తం సర్వా ఎవోత్క్రామన్తే తస్మిꣳశ్చ ప్రతిష్ఠమానే సర్వా ఎవ ప్రాతిష్ఠన్త ఎవం వాఙ్మనశ్చక్షుః శ్రోత్రం చ తే ప్రీతాః ప్రాణం స్తున్వన్తి ॥ ౪ ॥

ఎషోఽగ్నిస్తపత్యేష సూర్య ఎష పర్జన్యో మఘవానేష వాయుః ।
ఎష పృథివీ రయిర్దేవః సదసచ్చామృతం చ యత్ ॥ ౫ ॥

అరా ఇవ రథనాభౌ ప్రాణే సర్వం ప్రతిష్ఠితమ్ ।
ఋచో యజూꣳషి సామాని యజ్ఞః క్షత్త్రం బ్రహ్మ చ ॥ ౬ ॥

ప్రజాపతిశ్చరసి గర్భే త్వమేవ ప్రతిజాయసే ।
తుభ్యం ప్రాణ ప్రజాస్త్విమా బలిం హరన్తి యః ప్రాణైః ప్రతితిష్ఠసి ॥ ౭ ॥

దేవానామసి వహ్నితమః పితౄణాం ప్రథమా స్వధా ।
ఋషీణాం చరితం సత్యమథర్వాఙ్గిరసామసి ॥ ౮ ॥

ఇన్ద్రస్త్వం ప్రాణ తేజసా రుద్రోఽసి పరిరక్షితా ।
త్వమన్తరిక్షే చరసి సూర్యస్త్వం జ్యోతిషాం పతిః ॥ ౯ ॥

యదా త్వమభివర్షసి అథేమాః ప్రాణ తే ప్రజాః ।
ఆనన్దరూపాస్తిష్ఠన్తి కామాయాన్నం భవిష్యతీతి ॥ ౧౦ ॥

వ్రాత్యస్త్వం ప్రాణైకర్షిరత్తా విశ్వస్య సత్పతిః ।
వయమాద్యస్య దాతారః పితా త్వం మాతరిశ్వ నః ॥ ౧౧ ॥

యా తే తనూర్వాచి ప్రతిష్ఠితా యా శ్రోత్రే యా చ చక్షుషి ।
యా చ మనసి సన్తతా శివాం తాం కురు మోత్క్రమీః ॥ ౧౨ ॥

ప్రాణస్యేదం వశే సర్వం త్రిదివే యత్ప్రతిష్ఠితమ్ ।
మాతేవ పుత్రాన్రక్షస్వ శ్రీశ్చ ప్రజ్ఞాం చ విధేహి న ఇతి ॥ ౧౩ ॥