ௐ ஶம் நோ மித்ர: ஶம் வருண: । ஶம் நோ ப⁴வத்வர்யமா । ஶம் ந இந்த்³ரோ ப்³ருஹஸ்பதி: । ஶம் நோ விஷ்ணுருருக்ரம: । நமோ ப்³ரஹ்மணே । நமஸ்தே வாயோ । த்வமேவ ப்ரத்யக்ஷம் ப்³ரஹ்மாஸி । த்வாமேவ ப்ரத்யக்ஷம் ப்³ரஹ்ம வதி³ஷ்யாமி । ருதம் வதி³ஷ்யாமி । ஸத்யம் வதி³ஷ்யாமி । தந்மாமவது । தத்³வக்தாரமவது । அவது மாம் । அவது வக்தாரம் ॥ ௐ ஶாந்தி: ஶாந்தி: ஶாந்தி: ॥ 1 ॥

ஶீக்ஷாம் வ்யாக்²யாஸ்யாம: । வர்ண: ஸ்வர: । மாத்ரா ப³லம் । ஸாம ஸந்தாந: । இத்யுக்த: ஶீக்ஷாத்⁴யாய: ॥ 1 ॥

ஸஹ நௌ யஶ: । ஸஹ நௌ ப்³ரஹ்மவர்சஸம் । அதா²த: ஸம் ஹிதாயா உபநிஷத³ம் வ்யாக்²யாஸ்யாம: । பஞ்சஸ்வதி⁴கரணேஷு । அதி⁴லோகமதி⁴ஜ்யௌதிஷமதி⁴வித்³யமதி⁴ப்ரஜமத்⁴யாத்மம் । தா மஹாஸம் ஹிதா இத்யாசக்ஷதே । அதா²தி⁴ிலோகம் । ப்ருதி²வீ பூர்வரூபம் । த்³யௌருத்தரரூபம் । ஆகாஶ: ஸந்தி⁴: ॥ 1 ॥

வாயு: ஸந்தா⁴நம் । இத்யதி⁴லோகம் । அதா²தி⁴ஜ்யௌதிஷம் । அக்³நி: பூர்வரூபம் । ஆதி³த்ய உத்தரரூபம் । ஆப: ஸந்தி⁴: । வைத்³யுத: ஸந்தா⁴நம் । இத்யதி⁴ஜ்யௌதிஷம் । அதா²தி⁴வித்³யம் । ஆசார்ய: பூர்வரூபம் ॥ 2 ॥

அந்தேவாஸ்யுத்தரரூபம் । வித்³யா ஸந்தி⁴: । ப்ரவசநம் ஸந்தா⁴நம் । இத்யதி⁴வித்³யம் । அதா²தி⁴ப்ரஜம் । மாதா பூர்வரூபம் । பிதோத்தரரூபம் । ப்ரஜா ஸந்தி⁴: । ப்ரஜநநம் ஸந்தா⁴நம் । இத்யதி⁴ப்ரஜம் ॥ 3 ॥

அதா²த்⁴யாத்மம் । அத⁴ரா ஹநு: பூர்வரூபம் । உத்தரா ஹநுருத்தரரூபம் । வாக்ஸந்தி⁴: । ஜிஹ்வா ஸந்தா⁴நம் । இத்யத்⁴யாத்மம் । இதீமா மஹாஸம் ஹிதா: । ய ஏவமேதா மஹாஸம் ஹிதா வ்யாக்²யாதா வேத³ । ஸந்தீ⁴யதே ப்ரஜயா பஶுபி⁴: । ப்³ரஹ்மவர்சஸேநாந்நாத்³யேந ஸுவர்கே³ண லோகேந ॥ 4 ॥

யஶ்ச²ந்த³ஸாம்ருஷபோ⁴ விஶ்வரூப: । ச²ந்தோ³ப்⁴யோ(அ)த்⁴யம்ருதாத்ஸம்ப³பூ⁴வ । ஸ மேந்த்³ரோ மேத⁴யா ஸ்ப்ருணோது । அம்ருதஸ்ய தே³வ தா⁴ரணோ பூ⁴யாஸம் । ஶரீரம் மே விசர்ஷணம் । ஜிஹ்வா மே மது⁴மத்தமா । கர்ணாப்⁴யாம் பூ⁴ரி விஶ்ருவம் । ப்³ரஹ்மண: கோஶோ(அ)ஸி மேத⁴யா பிஹித: । ஶ்ருதம் மே கோ³பாய । ஆவஹந்தீ விதந்வாநா ॥ 1 ॥

குர்வாணாசீரமாத்மந: । வாஸாம் ஸி மம கா³வஶ்ச । அந்நபாநே ச ஸர்வதா³ । ததோ மே ஶ்ரியமாவஹ । லோமஶாம் பஶுபி⁴: ஸஹ ஸ்வாஹா । ஆமாயந்து ப்³ரஹ்மசாரிண: ஸ்வாஹா । விமாயந்து ப்³ரஹ்மசாரிண: ஸ்வாஹா । ப்ரமாயந்து ப்³ரஹ்மசாரிண: ஸ்வாஹா । த³மாயந்து ப்³ரஹ்மசாரிண: ஸ்வாஹா । ஶமாயந்து ப்³ரஹ்மசாரிண: ஸ்வாஹா ॥ 2 ॥

யஶோ ஜநே(அ)ஸாநி ஸ்வாஹா । ஶ்ரேயாந் வஸ்யஸோ(அ)ஸாநி ஸ்வாஹா । தம் த்வா ப⁴க³ ப்ரவிஶாநி ஸ்வாஹா । ஸ மா ப⁴க³ ப்ரவிஶ ஸ்வாஹா । தஸ்மிந்ஸஹஸ்ரஶாகே² । நிப⁴கா³ஹம் த்வயி ம்ருஜே ஸ்வாஹா । யதா²ப: ப்ரவதா யந்தி । யதா² மாஸா அஹர்ஜரம் । ஏவம் மாம் ப்³ரஹ்மசாரிண: । தா⁴தராயந்து ஸர்வத: ஸ்வாஹா । ப்ரதிவேஶோ(அ)ஸி ப்ரமா பாஹி ப்ர மா பத்³யஸ்வ ॥ 3 ॥

பூ⁴ர்பு⁴வ: ஸுவரிதி வா ஏதாஸ்திஸ்ரோ வ்யாஹ்ருதய: । தாஸாமு ஹ ஸ்மைதாம் சதுர்தீ²ம் । மாஹாசமஸ்ய: ப்ரவேத³யதே । மஹ இதி । தத்³ப்³ரஹ்ம । ஸ ஆத்மா । அங்கா³ந்யந்யா தே³வதா: । பூ⁴ரிதி வா அயம் லோக: । பு⁴வ இத்யந்தரிக்ஷம் । ஸுவரித்யஸௌ லோக: ॥ 1 ॥

மஹ இத்யாதி³த்ய: । ஆதி³த்யேந வாவ ஸர்வே லோகா மஹீயந்தே । பூ⁴ரிதி வா அக்³நி: । பு⁴வ இதி வாயு: । ஸுவரித்யாதி³த்ய: । மஹ இதி சந்த்³ரமா: । சந்த்³ரமஸா வாவ ஸர்வாணி ஜ்யோதீம்ஷி மஹீயந்தே । பூ⁴ரிதி வா ருச: । பு⁴வ இதி ஸாமாநி । ஸுவரிதி யஜூம்ஷி ॥ 2 ॥

மஹ இதி ப்³ரஹ்ம । ப்³ரஹ்மணா வாவ ஸர்வே வேதா³ மஹீயந்தே । பூ⁴ரிதி வை ப்ராண: । பு⁴வ இத்யபாந: । ஸுவரிதி வ்யாந: । மஹ இத்யந்நம் । அந்நேந வாவ ஸர்வே ப்ராணா மஹீயந்தே । தா வா ஏதாஶ்சதஸ்ரஶ்சதுர்தா⁴ । சதஸ்ரஶ்சதஸ்ரோ வ்யாஹ்ருதய: । தா யோ வேத³ । ஸ வேத³ ப்³ரஹ்ம । ஸர்வே(அ)ஸ்மை தே³வா ப³லிமாவஹந்தி ॥ 3 ॥

ஸ ய ஏஷோ(அ)ந்தர்ஹ்ருத³ய ஆகாஶ: । தஸ்மிந்நயம் புருஷோ மநோமய: । அம்ருதோ ஹிரண்மய: । அந்தரேண தாலுகே । ய ஏஷ ஸ்தந இவாவலம்ப³தே । ஸேந்த்³ரயோநி: । யத்ராஸௌ கேஶாந்தோ விவர்ததே । வ்யபோஹ்ய ஶீர்ஷகபாலே । பூ⁴ரித்யக்³நௌ ப்ரதிதிஷ்ட²தி । பு⁴வ இதி வாயௌ ॥ 1 ॥

ஸுவரித்யாதி³த்யே । மஹ இதி ப்³ரஹ்மணி । ஆப்நோதி ஸ்வாராஜ்யம் । ஆப்நோதி மநஸஸ்பதிம் । வாக்பதிஶ்சக்ஷுஷ்பதி: । ஶ்ரோத்ரபதிர்விஜ்ஞாநபதி: । ஏதத்ததோ ப⁴வதி । ஆகாஶஶரீரம் ப்³ரஹ்ம । ஸத்யாத்ம ப்ராணாராமம் மந ஆநந்த³ம் । ஶாந்திஸம்ருத்³த⁴மம்ருதம் । இதி ப்ராசீநயோக்³யோபாஸ்ஸ்வ ॥ 2 ॥

ப்ருதி²வ்யந்தரிக்ஷம் த்³யௌர்தி³ஶோ(அ)வாந்தரதி³ஶ: । அக்³நிர்வாயுராதி³த்யஶ்சந்த்³ரமா நக்ஷத்ராணி । ஆப ஓஷத⁴யோ வநஸ்பதய ஆகாஶ ஆத்மா । இத்யதி⁴பூ⁴தம் । அதா²த்⁴யாத்மம் । ப்ராணோ வ்யாநோ(அ)பாந உதா³ந: ஸமாந: । சக்ஷு: ஶ்ரோத்ரம் மநோ வாக் த்வக் । சர்ம மாம்ஸம்ஸ்நாவாஸ்தி² மஜ்ஜா । ஏதத³தி⁴விதா⁴ய ருஷிரவோசத் । பாங்க்தம் வா இத³ம் ஸர்வம் । பாங்க்தேநைவ பாங்க்தம் ஸ்ப்ருணோதீதி ॥ 1 ॥

ஓமிதி ப்³ரஹ்ம । ஓமிதீத³ம் ஸர்வம் । ஓமித்யேதத³நுக்ருதிர்ஹ ஸ்ம வா அப்யோ ஶ்ராவயேத்யாஶ்ராவயந்தி । ஓமிதி ஸாமாநி கா³யந்தி । ௐ ஶோமிதி ஶஸ்த்ராணி ஶம்ஸந்தி । ஓமித்யத்⁴வர்யு: ப்ரதிக³ரம் ப்ரதிக்³ருணாதி । ஓமிதி ப்³ரஹ்மா ப்ரஸௌதி । ஓமித்யக்³நிஹோத்ரமநுஜாநாதி । ஓமிதி ப்³ராஹ்மண: ப்ரவக்ஷ்யந்நாஹ ப்³ரஹ்மோபாப்நவாநீதி । ப்³ரஹ்மைவோபாப்நோதி ॥ 1 ॥

ருதம் ச ஸ்வாத்⁴யாயப்ரவசநே ச । ஸத்யம் ச ஸ்வாத்⁴யாயப்ரவசநே ச । தபஶ்ச ஸ்வாத்⁴யாயப்ரவசநே ச । த³மஶ்ச ஸ்வாத்⁴யாயப்ரவசநே ச । ஶமஶ்ச ஸ்வாத்⁴யாயப்ரவசநே ச । அக்³நயஶ்ய ஸ்வாத்⁴யாயப்ரவசநே ச । அக்³நிஹோத்ரம் ச ஸ்வாத்⁴யாயப்ரவசநே ச । அதித²யஶ்ச ஸ்வாத்⁴யாயப்ரவசநே ச । மாநுஷம் ச ஸ்வாத்⁴யாயப்ரவசநே ச । ப்ரஜா ச ஸ்வாத்⁴யாயப்ரவசநே ச । ப்ரஜநஶ்ச ஸ்வாத்⁴யாயப்ரவசநே ச । ப்ரஜாதிஶ்ச ஸ்வாத்⁴யாயப்ரவசநே ச । ஸத்யமிதி ஸத்யவசா ராதீ²தர: । தப இதி தபோநித்ய: பௌருஶிஷ்டி: । ஸ்வாத்⁴யாயப்ரவசநே ஏவேதி நாகோ மௌத்³க³ல்ய: । தத்³தி⁴ தபஸ்தத்³தி⁴ தப: ॥ 1 ॥

அஹம் வ்ருக்ஷஸ்ய ரேரிவா । கீர்தி: ப்ருஷ்ட²ம் கி³ரேரிவ । ஊர்த்⁴வபவித்ரோ வாஜிநீவ ஸ்வம்ருதமஸ்மி । த்³ரவிணம் ஸவர்சஸம் । ஸுமேதா⁴ அம்ருதோக்ஷித: । இதி த்ரிஶங்கோர்வேதா³நுவசநம் ॥ 1 ॥

வேத³மநூச்யாசார்யோ(அ)ந்தேவாஸிநமநுஶாஸ்தி । ஸத்யம் வத³ । த⁴ர்மம் சர । ஸ்வாத்⁴யாயாந்மா ப்ரமத³: । ஆசார்யாய ப்ரியம் த⁴நமாஹ்ருத்ய ப்ரஜாதந்தும் மா வ்யவச்சே²த்ஸீ: । ஸத்யாந்ந ப்ரமதி³தவ்யம் । த⁴ர்மாந்ந ப்ரமதி³தவ்யம் । குஶலாந்ந ப்ரமதி³தவ்யம் । பூ⁴த்யை ந ப்ரமதி³தவ்யம் । ஸ்வாத்⁴யாயப்ரவசநாப்⁴யாம் ந ப்ரமதி³தவ்யம் ॥ 1 ॥

தே³வபித்ருகார்யாப்⁴யாம் ந ப்ரமதி³தவ்யம் । மாத்ருதே³வோ ப⁴வ । பித்ருதே³வோ ப⁴வ । ஆசார்யதே³வோ ப⁴வ । அதிதி²தே³வோ ப⁴வ । யாந்யநவத்³யாநி கர்மாணி । தாநி ஸேவிதவ்யாநி । நோ இதராணி । யாந்யஸ்மாகம் ஸுசரிதாநி । தாநி த்வயோபாஸ்யாநி ॥ 2 ॥

நோ இதராணி । யே கே சாஸ்மச்ச்²ரேயாம்ஸோ ப்³ராஹ்மணா: । தேஷாம் த்வயாஸநேந ப்ரஶ்வஸிதவ்யம் । ஶ்ரத்³த⁴யா தே³யம் । அஶ்ரத்³த⁴யாதே³யம் । ஶ்ரியா தே³யம் । ஹ்ரியா தே³யம் । பி⁴யா தே³யம் । ஸம்விதா³ தே³யம் । அத² யதி³ தே கர்மவிசிகித்ஸா வா வ்ருத்தவிசிகித்ஸா வா ஸ்யாத் ॥ 3 ॥

யே தத்ர ப்³ராஹ்மணா: ஸம்மர்ஶிந: । யுக்தா ஆயுக்தா: । அலூக்ஷா த⁴ர்மகாமா: ஸ்யு: । யதா² தே தத்ர வர்தேரந் । ததா² தத்ர வர்தேதா²: । அதா²ப்⁴யாக்²யாதேஷு । யே தத்ர ப்³ராஹ்மணா: ஸம்மர்ஶிந: । யுக்தா ஆயுக்தா: । அலூக்ஷா த⁴ர்மகாமா: ஸ்யு: । யதா² தே தேஷு வர்தேரந் । ததா² தேஷு வர்தேதா²: । ஏஷ ஆதே³ஶ: । ஏஷ உபதே³ஶ: । ஏஷா வேதோ³பநிஷத் । ஏதத³நுஶாஸநம் । ஏவமுபாஸிதவ்யம் । ஏவமு சைதது³பாஸ்யம் ॥ 4 ॥

ஶம் நோ மித்ர: ஶம் வருண: । ஶம் நோ ப⁴வத்வர்யமா । ஶம் ந இந்த்³ரோ ப்³ருஹஸ்பதி: । ஶம் நோ விஷ்ணுருருக்ரம: । நமோ ப்³ரஹ்மணே । நமஸ்தே வாயோ । த்வமேவ ப்ரத்யக்ஷம் ப்³ரஹ்மாஸி । த்வாமேவ ப்ரத்யக்ஷம் ப்³ரஹ்மாவாதி³ஷம் । ருதமவாதி³ஷம் । ஸத்யமவாதி³ஷம் । தந்மாமாவீத் । தத்³வக்தாரமாவீத் । ஆவீந்மாம் । ஆவீத்³வக்தாரம் ॥

ௐ ஸஹ நாவவது । ஸஹ நௌ பு⁴நக்து । ஸஹ வீர்யம் கரவாவஹை । தேஜஸ்வி நாவதீ⁴தமஸ்து மா வித்³விஷாவஹை ॥ ௐ ஶாந்தி: ஶாந்தி: ஶாந்தி: ॥

ப்³ரஹ்மவிதா³ப்நோதி பரம் । ததே³ஷாப்⁴யுக்தா । ஸத்யம் ஜ்ஞாநமநந்தம் ப்³ரஹ்ம । யோ வேத³ நிஹிதம் கு³ஹாயாம் பரமே வ்யோமந் । ஸோ(அ)ஶ்நுதே ஸர்வாந் காமாந் ஸஹ । ப்³ரஹ்மணா விபஶ்சிதேதி । தஸ்மாத்³வா ஏதஸ்மாதா³த்மந ஆகாஶ: ஸம்பூ⁴த: । ஆகாஶாத்³வாயு: । வாயோரக்³நி: । அக்³நேராப: । அத்³ப்⁴ய: ப்ருதி²வீ । ப்ருதி²வ்யா ஓஷத⁴ய: । ஓஷதீ⁴ப்⁴யோ(அ)ந்நம் । அந்நாத்புருஷ: । ஸ வா ஏஷ புருஷோ(அ)ந்நரஸமய: । தஸ்யேத³மேவ ஶிர: । அயம் த³க்ஷிண: பக்ஷ: । அயமுத்தர: பக்ஷ: । அயமாத்மா । இத³ம் புச்ச²ம் ப்ரதிஷ்டா² । தத³ப்யேஷ ஶ்லோகோ ப⁴வதி ॥ 1 ॥

அந்நாத்³வை ப்ரஜா: ப்ரஜாயந்தே । யா: காஶ்ச ப்ருதி²வீம் ஶ்ரிதா: । அதோ² அந்நேநைவ ஜீவந்தி । அதை²நத³பி யந்த்யந்தத: । அந்நம் ஹி பூ⁴தாநாம் ஜ்யேஷ்ட²ம் । தஸ்மாத்ஸர்வௌஷத⁴முச்யதே । ஸர்வம் வை தே(அ)ந்நமாப்நுவந்தி । யே(அ)ந்நம் ப்³ரஹ்மோபாஸதே । அந்நம் ஹி பூ⁴தாநாம் ஜ்யேஷ்ட²ம் । தஸ்மாத்ஸர்வௌஷத⁴முச்யதே । அந்நாத்³பூ⁴தாநி ஜாயந்தே । ஜாதாந்யந்நேந வர்த⁴ந்தே । அத்³யதே(அ)த்தி ச பூ⁴தாநி । தஸ்மாத³ந்நம் தது³ச்யத இதி । தஸ்மாத்³வா ஏதஸ்மாத³ந்நரஸமயாத் । அந்யோ(அ)ந்தர ஆத்மா ப்ராணமய: । தேநைஷ பூர்ண: । ஸ வா ஏஷ புருஷவித⁴ ஏவ । தஸ்ய புருஷவித⁴தாம் । அந்வயம் புருஷவித⁴: । தஸ்ய ப்ராண ஏவ ஶிர: । வ்யாநோ த³க்ஷிண: பக்ஷ: । அபாந உத்தர: பக்ஷ: । ஆகாஶ ஆத்மா । ப்ருதி²வீ புச்ச²ம் ப்ரதிஷ்டா² । தத³ப்யேஷ ஶ்லோகோ ப⁴வதி ॥ 1 ॥

ப்ராணம் தே³வா அநு ப்ராணந்தி । மநுஷ்யா: பஶவஶ்ச யே । ப்ராணோ ஹி பூ⁴தாநாமாயு: । தஸ்மாத்ஸர்வாயுஷமுச்யதே । ஸர்வமேவ த ஆயுர்யந்தி । யே ப்ராணம் ப்³ரஹ்மோபாஸதே । ப்ராணோ ஹி பூ⁴தாநாமாயு: । தஸ்மாத்ஸர்வாயுஷமுச்யத இதி । தஸ்யைஷ ஏவ ஶாரீர ஆத்மா । ய: பூர்வஸ்ய । தஸ்மாத்³வா ஏதஸ்மாத்ப்ராணமயாத் । அந்யோ(அ)ந்தர ஆத்மா மநோமய: । தேநைஷ பூர்ண: । ஸ வா ஏஷ புருஷவித⁴ ஏவ । தஸ்ய புருஷவித⁴தாம் । அந்வயம் புருஷவித⁴: । தஸ்ய யஜுரேவ ஶிர: । ருக்³த³க்ஷிண: பக்ஷ: । ஸாமோத்தர: பக்ஷ: । ஆதே³ஶ ஆத்மா । அத²ர்வாங்கி³ரஸ: புச்ச²ம் ப்ரதிஷ்டா² । தத³ப்யேஷ ஶ்லோகோ ப⁴வதி ॥ 1 ॥

யதோ வாசோ நிவர்தந்தே । அப்ராப்ய மநஸா ஸஹ । ஆநந்த³ம் ப்³ரஹ்மணோ வித்³வாந் । ந பி³பே⁴தி கதா³சநேதி । தஸ்யைஷ ஏவ ஶாரீர ஆத்மா । ய: பூர்வஸ்ய । தஸ்மாத்³வா ஏதஸ்மாந்மநோமயாத் । அந்யோ(அ)ந்தர ஆத்மா விஜ்ஞாநமய: । தேநைஷ பூர்ண: । ஸ வா ஏஷ புருஷவித⁴ ஏவ । தஸ்ய புருஷவித⁴தாம் । அந்வயம் புருஷவித⁴: । தஸ்ய ஶ்ரத்³தை⁴வ ஶிர: । ருதம் த³க்ஷிண: பக்ஷ: । ஸத்யமுத்தர: பக்ஷ: । யோக³ ஆத்மா । மஹ: புச்ச²ம் ப்ரதிஷ்டா² । தத³ப்யேஷ ஶ்லோகோ ப⁴வதி ॥ 1 ॥

விஜ்ஞாநம் யஜ்ஞம் தநுதே । கர்மாணி தநுதே(அ)பி ச । விஜ்ஞாநம் தே³வா: ஸர்வே । ப்³ரஹ்ம ஜ்யேஷ்ட²முபாஸதே । விஜ்ஞாநம் ப்³ரஹ்ம சேத்³வேத³ । தஸ்மாச்சேந்ந ப்ரமாத்³யதி । ஶரீரே பாப்மநோ ஹித்வா । ஸர்வாந்காமாந்ஸமஶ்நுத இதி । தஸ்யைஷ ஏவ ஶாரீர ஆத்மா । ய: பூர்வஸ்ய । தஸ்மாத்³வா ஏதஸ்மாத்³விஜ்ஞாநமயாத் । அந்யோ(அ)ந்தர ஆத்மாநந்த³மய: । தேநைஷ பூர்ண: । ஸ வா ஏஷ புருஷவித⁴ ஏவ । தஸ்ய புருஷ வித⁴தாம் । அந்வயம் புருஷவித⁴: । தஸ்ய ப்ரியமேவ ஶிர: । மோதோ³ த³க்ஷிண: பக்ஷ: । ப்ரமோத³ உத்தர: பக்ஷ: । ஆநந்த³ ஆத்மா । ப்³ரஹ்ம புச்ச²ம் ப்ரதிஷ்டா² । தத³ப்யேஷ ஶ்லோகோ ப⁴வதி ॥ 1 ॥

அஸந்நேவ ஸ ப⁴வதி । அஸத்³ப்³ரஹ்மேதி வேத³ சேத் । அஸ்தி ப்³ரஹ்மேதி சேத்³வேத³ । ஸந்தமேந ந்ததோ விது³ரிதி । தஸ்யைஷ ஏவ ஶாரீர ஆத்மா । ய: பூர்வஸ்ய । அதா²தோ(அ)நுப்ரஶ்நா: । உதாவித்³வாநமும் லோகம் ப்ரேத்ய । கஶ்சந க³ச்ச²தீ 3 । ஆஹோ வித்³வாநமும் லோகம் ப்ரேத்ய । கஶ்சித்ஸமஶ்நுதா 3 உ । ஸோ(அ)காமயத । ப³ஹு ஸ்யாம் ப்ரஜாயேயேதி । ஸ தபோ(அ)தப்யத । ஸ தபஸ்தப்த்வா । இத³ம் ஸர்வமஸ்ருஜத । யதி³த³ம் கிஞ்ச । தத்ஸ்ருஷ்ட்வா । ததே³வாநுப்ராவிஶத் । தத³நுப்ரவிஶ்ய । ஸச்ச த்யச்சாப⁴வத் । நிருக்தம் சாநிருக்தம் ச । நிலயநம் சாநிலயநம் ச । விஜ்ஞாநம் சாவிஜ்ஞாநம் ச । ஸத்யம் சாந்ருதம் ச ஸத்யமப⁴வத் । யதி³த³ம் கிஞ்ச । தத்ஸத்யமித்யாசக்ஷதே । தத³ப்யேஷ ஶ்லோகோ ப⁴வதி ॥ 1 ॥

அஸத்³வா இத³மக்³ர ஆஸீத் । ததோ வை ஸத³ஜாயத । ததா³த்மாநம் ஸ்வயமகுருத । தஸ்மாத்தத்ஸுக்ருதமுச்யத இதி । யத்³வை தத்ஸுக்ருதம் । ரஸோ வை ஸ: । ரஸம் ஹ்யேவாயம் லப்³த்⁴வாநந்தீ³ ப⁴வதி । கோ ஹ்யேவாந்யாத்க: ப்ராண்யாத் । யதே³ஷ ஆகாஶ ஆநந்தோ³ ந ஸ்யாத் । ஏஷ ஹ்யேவாநந்த³யாதி । யதா³ ஹ்யேவைஷ ஏதஸ்மிந்நத்³ருஶ்யே(அ)நாத்ம்யே(அ)நிருக்தே(அ)நிலயநே(அ)ப⁴யம் ப்ரதிஷ்டா²ம் விந்த³தே । அத² ஸோ(அ)ப⁴யம் க³தோ ப⁴வதி । யதா³ ஹ்யேவைஷ ஏதஸ்மிந்நுத³ரமந்தரம் குருதே । அத² தஸ்ய ப⁴யம் ப⁴வதி । தத்த்வேவ ப⁴யம் விது³ஷோ(அ)மந்வாநஸ்ய । தத³ப்யேஷ ஶ்லோகோ ப⁴வதி ॥ 1 ॥

பீ⁴ஷாஸ்மாத்³வாத: பவதே । பீ⁴ஷோதே³தி ஸூர்ய: । பீ⁴ஷாஸ்மாத³க்³நிஶ்சேந்த்³ரஶ்ச । ம்ருத்யுர்தா⁴வதி பஞ்சம இதி । ஸைஷாநந்த³ஸ்ய மீமாம் ஸா ப⁴வதி । யுவா ஸ்யாத்ஸாது⁴யுவாத்⁴யாயக: । ஆஶிஷ்டோ² த்³ருடி⁴ஷ்டோ² ப³லிஷ்ட²: । தஸ்யேயம் ப்ருதி²வீ ஸர்வா வித்தஸ்ய பூர்ணா ஸ்யாத் । ஸ ஏகோ மாநுஷ ஆநந்த³: । தே யே ஶதம் மாநுஷா ஆநந்தா³: ॥ 1 ॥

ஸ ஏகோ மநுஷ்யக³ந்த⁴ர்வாணாமாநந்த³: । ஶ்ரோத்ரியஸ்ய சாகாமஹதஸ்ய । தே யே ஶதம் மநுஷ்யக³ந்த⁴ர்வாணாமாநந்தா³: । ஸ ஏகோ தே³வக³ந்த⁴ர்வாணாமாநந்த³: । ஶ்ரோத்ரியஸ்ய சாகாமஹதஸ்ய । தே யே ஶதம் தே³வக³ந்த⁴ர்வாணாமாநந்தா³: । ஸ ஏக: பித்ரூணாம் சிரலோகலோகாநாமாநந்த³: । ஶ்ரோத்ரியஸ்ய சாகாமஹதஸ்ய । தே யே ஶதம் பித்ரூணாம் சிரலோகலோகாநாமாநந்தா³: । ஸ ஏக ஆஜாநஜாநாம் தே³வாநாமாநந்த³: ॥ 2 ॥

ஶ்ரோத்ரியஸ்ய சாகாமஹதஸ்ய । தே யே ஶதமாஜாநஜாநாம் தே³வாநாமாநந்தா³: । ஸ ஏக: கர்மதே³வாநாம் தே³வாநாமாநந்த³: । யே கர்மணா தே³வாநபியந்தி । ஶ்ரோத்ரியஸ்ய சாகாமஹதஸ்ய । தே யே ஶதம் கர்மதே³வாநாம் தே³வாநாமாநந்தா³: । ஸ ஏகோ தே³வாநாமாநந்த³: । ஶ்ரோத்ரியஸ்ய சாகாமஹதஸ்ய । தே யே ஶதம் தே³வாநாமாநந்தா³: । ஸ ஏக இந்த்³ரஸ்யாநந்த³: ॥ 3 ॥

ஶ்ரோத்ரியஸ்ய சாகாமஹதஸ்ய । தே யே ஶதமிந்த்³ரஸ்யாநந்தா³: । ஸ ஏகோ ப்³ருஹஸ்பதேராநந்த³: । ஶ்ரோத்ரியஸ்ய சாகாமஹதஸ்ய । தே யே ஶதம் ப்³ருஹஸ்பதேராநந்தா³: । ஸ ஏக: ப்ரஜாபதேராநந்த³: । ஶ்ரோத்ரியஸ்ய சாகாமஹதஸ்ய । தே யே ஶதம் ப்ரஜாபதேராநந்தா³: । ஸ ஏகோ ப்³ரஹ்மண ஆநந்த³: । ஶ்ரோத்ரியஸ்ய சாகாமஹாதஸ்ய ॥ 4 ॥

ஸ யஶ்சாயம் புருஷே । யஶ்சாஸாவாதி³த்யே । ஸ ஏக: । ஸ ய ஏவம்வித் । அஸ்மால்லோகாத்ப்ரேத்ய । ஏதமந்நமயமாத்மாநமுபஸங்க்ராமதி । ஏதம் ப்ராணமயமாத்மாநமுபஸங்க்ராமதி । ஏதம் மநோமயமாத்மாநமுபஸங்க்ராமதி । ஏதம் விஜ்ஞாநமயமாத்மாநமுபஸங்க்ராமதி । ஏதமாநந்த³மயமாத்மாநமுபஸங்க்ராமதி । தத³ப்யேஷ ஶ்லோகோ ப⁴வதி ॥ 5 ॥

யதோ வாசோ நிவர்தந்தே । அப்ராப்ய மநஸா ஸஹ । ஆநந்த³ம் ப்³ரஹ்மணோ வித்³வாந் । ந பி³பே⁴தி குதஶ்சநேதி । ஏதம் ஹ வாவ ந தபதி । கிமஹம் ஸாது⁴ நா கரவம் । கிமஹம் பாபமகரவமிதி । ஸ ய ஏவம் வித்³வாநேதே ஆத்மாநம் ஸ்ப்ருணுதே । உபே⁴ ஹ்யேவைஷ ஏதே ஆத்மாநம் ஸ்ப்ருணுதே । ய ஏவம் வேத³ । இத்யுபநிஷத் ॥ 1 ॥

ௐ ஸஹ நாவவது । ஸஹ நௌ பு⁴நக்து । ஸஹ வீர்யம் கரவாவஹை । தேஜஸ்வி நாவதீ⁴தமஸ்து மா வித்³விஷாவஹை ॥ ௐ ஶாந்தி: ஶாந்தி: ஶாந்தி: ॥

ப்⁴ருகு³ர்வை வாருணி: । வருணம் பிதரமுபஸஸார । அதீ⁴ஹி ப⁴க³வோ ப்³ரஹ்மேதி । தஸ்மா ஏதத்ப்ரோவாச । அந்நம் ப்ராணம் சக்ஷு: ஶ்ரோத்ரம் மநோ வாசமிதி । தம் ஹோவாச । யதோ வா இமாநி பூ⁴தாநி ஜாயந்தே । யேந ஜாதாநி ஜீவந்தி । யத்ப்ரயந்த்யபி⁴ஸம்விஶந்தி । தத்³விஜிஜ்ஞாஸஸ்வ । தத்³ப்³ரஹ்மேதி । ஸ தபோ(அ)தப்யத । ஸ தபஸ்தப்த்வா ॥ 1 ॥

அந்நம் ப்³ரஹ்மேதி வ்யஜாநாத் । அந்நாத்³த்⁴யேவ க²ல்விமாநி பூ⁴தாநி ஜாயந்தே । அந்நேந ஜாதாநி ஜீவந்தி । அந்நம் ப்ரயந்த்யபி⁴ஸம்விஶந்தீதி । தத்³விஜ்ஞாய । புநரேவ வருணம் பிதரமுபஸஸார । அதீ⁴ஹி ப⁴க³வோ ப்³ரஹ்மேதி । தம் ஹோவாச । தபஸா ப்³ரஹ்ம விஜிஜ்ஞாஸஸ்வ । தபோ ப்³ரஹ்மேதி । ஸ தபோ(அ)தப்யத । ஸ தபஸ்தப்த்வா ॥ 1 ॥

ப்ராணோ ப்³ரஹ்மேதி வ்யஜாநாத் । ப்ராணாத்³த்⁴யேவ க²ல்விமாநி பூ⁴தாநி ஜாயந்தே । ப்ராணேந ஜாதாநி ஜீவந்தி । ப்ராணம் ப்ரயந்த்யபி⁴ஸம்விஶந்தீதி । தத்³விஜ்ஞாய । புநரேவ வருணம் பிதரமுபஸஸார । அதீ⁴ஹீ ப⁴க³வோ ப்³ரஹ்மேதி । தம் ஹோவாச । தபஸா ப்³ரஹ்ம விஜிஜ்ஞாஸஸ்வ । தபோ ப்³ரஹ்மேதி । ஸ தபோ(அ)தப்யத । ஸ தபஸ்தப்த்வா ॥ 1 ॥

மநோ ப்³ரஹ்மேதி வ்யஜாநாத் । மநஸோ ஹ்யேவ க²ல்விமாநி பூ⁴தாநி ஜாயந்தே । மநஸா ஜாதாநி ஜீவந்தி । மந: ப்ரயந்த்யபி⁴ஸம்விஶந்தீதி । தத்³விஜ்ஞாய । புநரேவ வருணம் பிதரமுஸஸார । அதீ⁴ஹி ப⁴க³வோ ப்³ரஹ்மேதி । தம் ஹோவாச । தபஸா ப்³ரஹ்ம விஜிஜ்ஞாஸஸ்வ । தபோ ப்³ரஹ்மேதி । ஸ தபோ(அ)தப்யத । ஸ தபஸ்தப்த்வா ॥ 1 ॥

விஜ்ஞாநம் ப்³ரஹ்மேதி வ்யஜாநாத் । விஜ்ஞாநாத்³த்⁴யேவ க²ல்விமாநி பூ⁴தாநி ஜாயந்தே । விஜ்ஞாநேந ஜாதாநி ஜீவந்தி । விஜ்ஞாநம் ப்ரயந்த்யபி⁴ஸம்விஶந்தீதி । தத்³விஜ்ஞாய । புநரேவ வருணம் பிதரமுபஸஸார । அதீ⁴ஹி ப⁴க³வோ ப்³ரஹ்மேதி । தம் ஹோவாச । தபஸா ப்³ரஹ்ம விஜிஜ்ஞாஸஸ்வ । தபோ ப்³ரஹ்மேதி । ஸ தபோ(அ)தப்யத । ஸ தபஸ்தப்த்வா ॥ 1 ॥

ஆநந்தோ³ ப்³ரஹ்மேதி வ்யஜாநாத் । ஆநந்தா³த்³த்⁴யேவ க²ல்விமாநி பூ⁴தாநி ஜாயந்தே । ஆநந்தே³ந ஜாதாநி ஜீவந்தி । ஆநந்த³ம் ப்ரயந்த்யபி⁴ஸம்விஶந்தீதி । ஸைஷா பா⁴ர்க³வீ வாருணீ வித்³யா । பரமே வ்யோமந் ப்ரதிஷ்டி²தா । ஸ ய ஏவம் வேத³ ப்ரதிதிஷ்ட²தி । அந்நவாநந்நாதோ³ ப⁴வதி । மஹாந் ப⁴வதி । ப்ரஜயா பஶுபி⁴ர்ப்³ரஹ்மவர்சஸேந । மஹாந் கீர்த்யா ॥ 1 ॥

அந்நம் ந நிந்த்³யாத் । தத்³வ்ரதம் । ப்ராணோ வா அந்நம் । ஶரீரமந்நாத³ம் । ப்ராணே ஶரீரம் ப்ரதிஷ்டி²தம் । ஶரீரே ப்ராண: ப்ரதிஷ்டி²த: । ததே³தத³ந்நமந்நே ப்ரதிஷ்டி²தம் । ஸ ய ஏதத³ந்நமந்நே ப்ரதிஷ்டி²தம் வேத³ ப்ரதிதிஷ்ட²தி । அந்நவாநந்நாதோ³ ப⁴வதி । மஹாந் ப⁴வதி । ப்ரஜயா பஶுபி⁴ர்ப்³ரஹ்மவர்சஸேந । மஹாந் கீர்த்யா ॥ 1 ॥

அந்நம் ந பரிசக்ஷீத । தத்³வ்ரதம் । ஆபோ வா அந்நம் । ஜ்யோதிரந்நாத³ம் । அப்ஸு ஜ்யோதி: ப்ரதிஷ்டி²தம் । ஜ்யோதிஷ்யாப: ப்ரதிஷ்டி²தா: । ததே³தத³ந்நமந்நே ப்ரதிஷ்டி²தம் । ஸ ய ஏதத³ந்நமந்நே ப்ரதிஷ்டி²தம் வேத³ ப்ரதிதிஷ்ட²தி । அந்நவாநந்நாதோ³ ப⁴வதி । மஹாந்ப⁴வதி । ப்ரஜயா பஶுபி⁴ர்ப்³ரஹ்மவர்சஸேந । மஹாந்கீர்த்யா ॥

அந்நம் ப³ஹு குர்வீத । தத்³வ்ரதம் । ப்ருதி²வீ வா அந்நம் । ஆகாஶோ(அ)ந்நாத³: । ப்ருதி²வ்யாமாகாஶ: ப்ரதிஷ்டி²த: । ஆகாஶே ப்ருதி²வீ ப்ரதிஷ்டி²தா । ததே³தத³ந்நமந்நே ப்ரதிஷ்டி²தம் । ஸ ய ஏதத³ந்நமந்நே ப்ரதிஷ்டி²தம் வேத³ ப்ரதிதிஷ்ட²தி । அந்நவாநந்நாதோ³ ப⁴வதி । மஹாந்ப⁴வதி । ப்ரஜயா பஶுபி⁴ர்ப்³ரஹ்மவர்சஸேந । மஹாந்கீர்த்யா ॥

ந கஞ்சந வஸதௌ ப்ரத்யாசக்ஷீத । தத்³வ்ரதம் । தஸ்மாத்³யயா கயா ச வித⁴யா ப³ஹ்வந்நம் ப்ராப்நுயாத் । அராத்⁴யஸ்மா அந்நமித்யாசக்ஷதே । ஏதத்³வை முக²தோ(அ)ந்நம் ராத்³த⁴ம் । முக²தோ(அ)ஸ்மா அந்நம் ராத்⁴யதே । ஏதத்³வை மத்⁴யதோ(அ)ந்நம் ராத்³த⁴ம் । மத்⁴யதோ(அ)ஸ்மா அந்நம் ராத்⁴யதே । ஏதத்³வா அந்ததோ(அ)ந்நம் ராத்³த⁴ம் । அந்ததோ(அ)ஸ்மா அந்நம் ராத்⁴யதே ॥ 1 ॥

ய ஏவம் வேத³ । க்ஷேம இதி வாசி । யோக³க்ஷேம இதி ப்ராணாபாநயோ: । கர்மேதி ஹஸ்தயோ: । க³திரிதி பாத³யோ: । விமுக்திரிதி பாயௌ । இதி மாநுஷீ: ஸமாஜ்ஞா: । அத² தை³வீ: । த்ருப்திரிதி வ்ருஷ்டௌ । ப³லமிதி வித்³யுதி ॥ 2 ॥

யஶ இதி பஶுஷு । ஜ்யோதிரிதி நக்ஷத்ரேஷு । ப்ரஜாதிரம்ருதமாநந்த³ இத்யுபஸ்தே² । ஸர்வமித்யாகாஶே । தத்ப்ரதிஷ்டே²த்யுபாஸீத । ப்ரதிஷ்டா²வாந் ப⁴வதி । தந்மஹ இத்யுபாஸீத । மஹாந் ப⁴வதி । தந்மந இத்யுபாஸீத । மாநவாந் ப⁴வதி ॥ 3 ॥

தந்நம இத்யுபாஸீத । நம்யந்தே(அ)ஸ்மை காமா: । தத்³ப்³ரஹ்மேத்யுபாஸீத । ப்³ரஹ்மவாந் ப⁴வதி । தத்³ப்³ரஹ்மண: பரிமர இத்யுபாஸீத । பர்யேணம் ம்ரியந்தே த்³விஷந்த: ஸபத்நா: । பரி யே(அ)ப்ரியா ப்⁴ராத்ருவ்யா: । ஸ யஶ்சாயம் புருஷே । யஶ்சாஸாவாதி³த்யே । ஸ ஏக: ॥ 4 ॥

ஸ ய ஏவம்வித் । அஸ்மால்லோகாத்ப்ரேத்ய । ஏதமந்நமயமாத்மாநமுபஸங்க்ரம்ய । ஏதம் ப்ராணமயமாத்மாநமுபஸங்க்ரம்ய । ஏதம் மநோமயமாத்மாநமுபஸங்க்ரம்ய । ஏதம் விஜ்ஞாநமயமாத்மாநமுபஸங்க்ரம்ய । ஏதமாநந்த³மயமாத்மாநமுபஸங்க்ரம்ய । இமாம்ல்லோகாந்காமாந்நீ காமரூப்யநுஸஞ்சரந் । ஏதத்ஸாம கா³யந்நாஸ்தே । ஹா3வு ஹா3வு ஹா3வு ॥ 5 ॥

அஹமந்நமஹமந்நமஹமந்நம் । அஹமந்நாதோ³3(அ)ஹமந்நாதோ³3(அ)ஹமந்நாத³: । அஹம் ஶ்லோகக்ருத³ஹம் ஶ்லோகக்ருத³ஹம் ஶ்லோகக்ருத் । அஹமஸ்மி ப்ரத²மஜா ருதா3ஸ்ய । பூர்வம் தே³வேப்⁴யோ(அ)ம்ருதஸ்ய நா3பா⁴யி । யோ மா த³தா³தி ஸ இதே³வ மா3வா: । அஹமந்நமந்நமத³ந்தமா3த்³மி । அஹம் விஶ்வம் பு⁴வநமப்⁴யப⁴வா3ம் । ஸுவர்ந ஜ்யோதீ: । ய ஏவம் வேத³ । இத்யுபநிஷத் ॥ 6 ॥