నిమిత్తం మనశ్చక్షురాదిప్రవృత్తౌ
నిరస్తాఖిలోపాధిరాకాశకల్పః ।
రవిర్లోకచేష్టానిమిత్తం యథా యః
స నిత్యోపలబ్ధిస్వరూపోఽహమాత్మా ॥ ౧ ॥
యమగ్న్యుష్ణవన్నిత్యబోధస్వరూపం
మనశ్చక్షురాదీన్యబోధాత్మకాని ।
ప్రవర్తన్త ఆశ్రిత్య నిష్కమ్పమేకం
స నిత్యోపలబ్ధిస్వరూపోఽహమాత్మా ॥ ౨ ॥
ముఖాభాసకో దర్పణే దృశ్యమానో
ముఖత్వాత్పృథక్త్వేన నైవాస్తి వస్తు ।
చిదాభాసకో ధీషు జీవోఽపి తద్వ —
త్స నిత్యోపలబ్ధిస్వరూపోఽహమాత్మా ॥ ౩ ॥
యథా దర్పణాభావ ఆభాసహానౌ
ముఖం విద్యతే కల్పనాహీనమేకమ్ ।
తథా ధీవియోగే నిరాభాసకో యః
స నిత్యోపలబ్ధిస్వరూపోఽహమాత్మా ॥ ౪ ॥
మనశ్చక్షురాదేర్వియుక్తః స్వయం యో
మనశ్చక్షురాదేర్మనశ్చక్షురాదిః ।
మనశ్చక్షురాదేరగమ్యస్వరూపః
స నిత్యోపలబ్ధిస్వరూపోఽహమాత్మా ॥ ౫ ॥
య ఎకో విభాతి స్వతః శుద్ధచేతాః
ప్రకాశస్వరూపోఽపి నానేవ ధీషు ।
శరావోదకస్థో యథా భానురేకః
స నిత్యోపలబ్ధిస్వరూపోఽహమాత్మా ॥ ౬ ॥
యథానేకచక్షుఃప్రకాశో రవిర్న
క్రమేణ ప్రకాశీకరోతి ప్రకాశ్యమ్ ।
అనేకా ధియో యస్తథైకప్రబోధః
స నిత్యోపలబ్ధిస్వరూపోఽహమాత్మా ॥ ౭ ॥
వివస్వత్ప్రభాతం యథారూపపక్షం
ప్రగృహ్ణాతి నాభాతమేవం వివస్వాన్ ।
యదాభాత ఆభాసయత్యక్షమేకః
స నిత్యోపలబ్ధిస్వరూపోఽహమాత్మా ॥ ౮ ॥
యథా సూర్య ఎకోఽప్స్వనేకశ్చలాసు
స్థిరాస్వప్యనన్వగ్విభావ్యస్వరూపః ।
చలాసు ప్రభిన్నాసు ధీష్వేవమేకః
స నిత్యోపలబ్ధిస్వరూపోఽహమాత్మా ॥ ౯ ॥
ఘనచ్ఛన్నదృష్టిర్ఘనచ్ఛన్నమర్కం
యథా నిష్ప్రభం మన్యతే చాతిమూఢః ।
తథా బద్ధవద్భాతి యో మూఢదృష్టేః
స నిత్యోపలబ్ధిస్వరూపోఽహమాత్మా ॥ ౧౦ ॥
సమస్తేషు వస్తుష్వనుస్యూతమేకం
సమస్తాని వస్తూని యం న స్పృశన్తి ।
వియద్వత్సదా శుద్ధమచ్ఛస్వరూపః
స నిత్యోపలబ్ధిస్వరూపోఽహమాత్మా ॥ ౧౧ ॥
ఉపాధౌ యథా భేదతా సన్మణీనాం
తథా భేదతా బుద్ధిభేదేషు తేఽపి ।
యథా చన్ద్రికాణాం జలే చఞ్చలత్వం
తథా చఞ్చలత్వం తవాపీహ విష్ణో ॥ ౧౨ ॥