ತದ್ವ್ಯಾಚಷ್ಟೇ –
ಸರ್ವಪ್ರಾಣೀತಿ ।
ಫಲಸ್ಯ ತದುಪಾದಾನಸ್ಯ ತತ್ಸಾಧನಸ್ಯ ಚಾಧಿಷ್ಠಾನಭೂತಾನಿತ್ಯರ್ಥಃ ।
ಅವ್ಯಯಾನಾಮನೇಕಾರ್ಥತ್ವಾನ್ನುಶಬ್ದಸ್ತುಶಬ್ದಾರ್ಥಂ ವೈಲಕ್ಷಣ್ಯಂ ಲೋಕಾನಾಮಾಹೇತ್ಯಾಹ –
ಇಮೇ ನ್ವಿತಿ ।
ಅಹಮಿತೀತ್ಯಸ್ಯೇಕ್ಷತೇತಿ ಪೂರ್ವೇಣಾನ್ವಯಃ ।
ಸಮಷ್ಟಿಲಿಂಗಶರೀರಸ್ಯ ತದಭಿಮಾನಿನಾಂ ವಿರಾಡವಯವಜನ್ಯತ್ವಾತ್ತದರ್ಥಂ ವಿರಾಟ್ಸೃಷ್ಟಿಮಾಹ –
ಏವಮೀಕ್ಷಿತ್ವೇತಿ ।
ಯದ್ಯಪಿ ಲೋಕೋತ್ಪತ್ತೇಃ ಪೂರ್ವಮೇವಾಂಡೋತ್ಪತ್ತಿರುಕ್ತಾಽಂಡಮುತ್ಪಾದ್ಯಾಂಭಃಪ್ರಭೃತೀಂಲ್ಲೋಕಾನಸೃಜತೇತಿ ಭಾಷ್ಯೇಣ ತಥಾಽಪಿ ಸೈವೋತ್ಪತ್ತಿರಿಹಾನೂದ್ಯತೇ । ಲೋಕಪಾಲಸೃಷ್ಟ್ಯರ್ಥಮಿತಿ ನ ವಿರೋಧ ಇತಿ ಭಾವಃ ।
ಅದ್ಭ್ಯ ಏವೇತ್ಯೇವಕಾರಾರ್ಥಮಾಹ –
ಯೇಭ್ಯ ಇತಿ ।
ಕುಲಾಲಃ ಪೃಥಿವ್ಯಾಃ ಸಕಾಶಾನ್ಮೃತ್ಪಿಂಡಮಿವೇತ್ಯನ್ವಯಃ ।
ಸ್ವಾವಯವೇತಿ ।
ಭೂತಾನಾಂ ಪರಸ್ಪರಾವಯವಸಂಯೋಜನಮತಿಶ್ಲಿಷ್ಟಸಂಯೋಗಸ್ತೇನೇತ್ಯರ್ಥಃ ॥೩॥