க்ஷத்ரியத்வக³தேஶ்சோத்தரத்ர சைத்ரரதே²ந லிங்கா³த் ।
இதஶ்ச ந ஜாதிஶூத்³ரோ ஜாநஶ்ருதி: - யத்காரணம்
ப்ரகரணநிரூபணே க்ரியமாணே க்ஷத்ரியத்வமஸ்ய ஜாநஶ்ருதேரவக³ம்யதே சைத்ரரதே²ந லிங்கா³தி³தி வ்யாசக்ஷாண: ப்ரகரணம் நிரூபயதி -
உத்தரத்ர ஹி ஸம்வர்க³வித்³யாவாக்யஶேஷே ।
சைத்ரரதே²நாபி⁴ப்ரதாரிணா நிஶ்சிதக்ஷத்ரியத்வேந ஸமாநாயாம் ஸம்வர்க³வித்³யாயாம் ஸமபி⁴வ்யாஹாரால்லிங்கா³த்ஸந்தி³க்³த⁴க்ஷத்ரியபா⁴வோ ஜாநஶ்ருதி: க்ஷத்ரியோ நிஶ்சீயதே । “அத² ஹ ஶௌநகம் ச காபேயமபி⁴ப்ரதாரிணம் ச காக்ஷஸேநிம் ஸூதே³ந பரிவிஷ்யமாணௌ ப்³ரஹ்மசாரீ பி³பி⁴க்ஷே”(ப்³ரு. உ. 4 । 3 । 5) இதி ப்ரஸித்³த⁴யாஜகத்வேந காபேயேநாபி⁴ப்ரதாரிணோ யோக³: ப்ரதீயதே । ப்³ரஹ்மசாரிபி⁴க்ஷயா சாஸ்யாஶூத்³ரத்வமவக³ம்யதே । நஹி ஜாது ப்³ரஹ்மசாரீ ஶூத்³ராந் பி⁴க்ஷதே । யாஜகேந ச காபேயேந யோகா³த்³யாஜ்யோ(அ)பி⁴ப்ரதாரீ । க்ஷத்ரியத்வம் சாஸ்ய சைத்ரரதி²த்வாத் । “தஸ்மாச்சைத்ரரதோ² நாமைக: க்ஷத்ரபதிரஜாயத” இதி வசநாத் । சைத்ரரதி²த்வம் சாஸ்ய காபேயேந யாஜகேந யோகா³த் ।
ஏதேந வை சித்ரரத²ம் காபேயா அயாஜயந்நிதி
ச²ந்தோ³கா³நாம் த்³விராத்ரே ஶ்ரூயதே । தேந சித்ரரத²ஸ்ய யாஜகா: காபேயா: । ஏஷ சாபி⁴ப்ரதாரீ சித்ரரதா²த³ந்ய: ஸந்நேவ காபேயாநாம் யாஜ்யோ ப⁴வதி । யதி³ சைத்ரரதி²: ஸ்யாத் ஸமாநாந்வயாநாம் ஹி ப்ராயேண ஸமாநாந்வயா யாஜகா ப⁴வந்தி । தஸ்மாச்சைத்ரரதி²த்வாத³பி⁴ப்ரதாரீ காக்ஷஸேநி: க்ஷத்ரிய: । தத்ஸமபி⁴வ்யாஹாராச்ச ஜாநஶ்ருதிரபி க்ஷத்ரிய: ஸம்பா⁴வ்யதே ।
இதஶ்ச க்ஷத்ரியோ ஜாநஶ்ருதிரித்யாஹ -
க்ஷத்த்ருப்ரேஷணாத்³யைஶ்வர்யயோகா³ச்ச ।
க்ஷத்த்ருப்ரேஷணே சார்த²ஸம்ப⁴வே ச தாத்³ருஶஸ்ய வதா³ந்யப்ரஷ்ட²ஸ்யைஶ்வர்யம் ப்ராயேண க்ஷத்ரியஸ்ய த்³ருஷ்டம் யுதி⁴ஷ்டி²ராதி³வதி³தி ॥ 35 ॥