ஶ்ரவணாத்⁴யயநார்த²ப்ரதிஷேதா⁴த்ஸ்ம்ருதேஶ்ச ॥ 38 ॥
இதஶ்ச ந ஶூத்³ரஸ்யாதி⁴கார:; யத³ஸ்ய ஸ்ம்ருதே: ஶ்ரவணாத்⁴யயநார்த²ப்ரதிஷேதோ⁴ ப⁴வதி । வேத³ஶ்ரவணப்ரதிஷேத⁴:, வேதா³த்⁴யயநப்ரதிஷேத⁴:, தத³ர்த²ஜ்ஞாநாநுஷ்டா²நயோஶ்ச ப்ரதிஷேத⁴: ஶூத்³ரஸ்ய ஸ்மர்யதே । ஶ்ரவணப்ரதிஷேத⁴ஸ்தாவத் — ‘அத² ஹாஸ்ய வேத³முபஶ்ருண்வதஸ்த்ரபுஜதுப்⁴யாம் ஶ்ரோத்ரப்ரதிபூரணம்’ இதி; ‘பத்³யு ஹ வா ஏதச்ச்²மஶாநம் யச்சூ²த்³ரஸ்தஸ்மாச்சூ²த்³ரஸமீபே நாத்⁴யேதவ்யம்’ இதி ச । அத ஏவாத்⁴யயநப்ரதிஷேத⁴: । யஸ்ய ஹி ஸமீபே(அ)பி நாத்⁴யேதவ்யம் ப⁴வதி, ஸ கத²மஶ்ருதமதீ⁴யீத । ப⁴வதி ச ‘வேதோ³ச்சாரணே ஜிஹ்வாச்சே²த³:, தா⁴ரணே ஶரீரபே⁴த³’(கௌ³॰த⁴॰ஸூ॰ 2-3-4) இதி । அத ஏவ சார்தா²த³ர்த²ஜ்ஞாநாநுஷ்டா²நயோ: ப்ரதிஷேதோ⁴ ப⁴வதி — ‘ந ஶூத்³ராய மதிம் த³த்³யாத்’(ம॰ஸ்ம்ரு॰ 4-80) இதி, ‘த்³விஜாதீநாமத்⁴யயநமிஜ்யா தா³நம்’(கௌ³॰த⁴॰ஸூ॰ 2-1-1) இதி ச । யேஷாம் புந: பூர்வக்ருதஸம்ஸ்காரவஶாத்³விது³ரத⁴ர்மவ்யாத⁴ப்ரப்⁴ருதீநாம் ஜ்ஞாநோத்பத்தி:, தேஷாம் ந ஶக்யதே ப²லப்ராப்தி: ப்ரதிஷேத்³து⁴ம் , ஜ்ஞாநஸ்யைகாந்திகப²லத்வாத் । ‘ஶ்ராவயேச்சதுரோ வர்ணாந்’(ம॰பா⁴॰ 12-327-49) இதி சேதிஹாஸபுராணாதி⁴க³மே சாதுர்வர்ண்யஸ்யாதி⁴காரஸ்மரணாத் । வேத³பூர்வகஸ்து நாஸ்த்யதி⁴கார: ஶூத்³ராணாமிதி ஸ்தி²தம் ॥ 38 ॥