चशब्दार्थमाह —

इतश्चेति ।

तदेव हेत्वन्तरमाह —

यस्मादिति ।

तस्मादिति व्यवहितेन सम्बन्धः । यन्निर्धारितं तदेवेह गीयत इति योजना ।

प्रकरणाविच्छेदार्थं तदनुसन्धत्ते —

यस्मादिति ।

भूतयोनेरेव सर्वप्रत्यक्तमत्वेन सर्वान्तरत्वमाह —

यच्चेति ।

तस्यैव ज्ञेयत्वेन प्रकृतत्वमाह —

यस्येति ।

तदेवात्रोच्यमानमिति कुतो गम्यते, तत्राह —

मन्त्रेति ।

अविरोधादिति ।

एकार्थत्वे सत्युपायोपेयत्वयोगादित्यर्थः ।

तयोरनेकार्थत्वे दोषमाह —

अन्यथेति ।

अन्नमयादीनामनात्मत्वेऽप्यविरोधवदिहापि स्यादित्याशङ्क्याह —

नचेति ।

ब्रह्मणस्तदान्तरत्वं पुच्छश्रुतिहतमिति भावः ।

किञ्च भृगुवल्ल्यां पञ्चमपर्यायेणोपसंहारात्तस्य ब्रह्मार्थत्ववदत्रापि तस्य स्थानात्तदर्थतेत्याह —

एतन्निष्ठेति ।

प्रकरणादिसिद्धमर्थमुपसंहरति —

तस्मादिति ॥ १५ ॥