अद्वैतशारदा | दक्षिणाम्नाय श्रीशारदापीठम्, शृङ्गेरी

उदासीनानामपि चैवं सिद्धिः ॥ २७ ॥

यदि चाभावाद्भावोत्पत्तिरभ्युपगम्येत, एवं सत्युदासीनानामनीहमानानामपि जनानामभिमतसिद्धिः स्यात् , अभावस्य सुलभत्वात् । कृषीवलस्य क्षेत्रकर्मण्यप्रयतमानस्यापि सस्यनिष्पत्तिः स्यात् । कुलालस्य च मृत्संस्क्रियायामप्रयतमानस्यापि अमत्रोत्पत्तिः । तन्तुवायस्यापि तन्तूनतन्वानस्यापि तन्वानस्येव वस्त्रलाभः । स्वर्गापवर्गयोश्च न कश्चित्कथञ्चित्समीहेत । न चैतद्युज्यते अभ्युपगम्यते वा केनचित् । तस्मादप्यनुपपन्नोऽयमभावाद्भावोत्पत्त्यभ्युपगमः ॥ २७ ॥

यदीति ; कृषीति ; स्वर्गेति ; न चेति ; तस्मादिति ॥ २७ ॥ ;

सूत्रं विभजते -

यदीति ।

अभाववादे सर्वलौकिकव्यवहारासिद्धिमुदाहरणैर्दर्शयति -

कृषीति ।

पारलौकिकव्यवहारोऽपि परमते न स्यादित्याह -

स्वर्गेति ।

उभयविधव्यवहारासत्त्वप्रसङ्गस्येष्टत्वं प्रत्याचष्टे -

न चेति ।

सूत्रद्वयार्थमुपसंहरति -

तस्मादिति ॥ २७ ॥