किञ्च वाक्यशेषे संयोगस्यैव तद्भावस्य श्रुतेरुपक्रमेऽपि तद्भावः संयोगान्नार्थान्तरमित्याह -
रेतःसिगिति ।
सूत्रं व्याकरोति -
इतश्चेति ।
प्रकृतोपयोगित्वेनान्नभक्षकं तरुणत्वेन विशिनष्टि -
यो रेत इति ।
तद्भूय एव भवतीति श्रुत्या तद्भावमेवान्नानुगतोऽनुशयी प्रतिपद्यत इत्युच्यते न संयोगमात्रमित्याशङ्क्याह -
नचेति ।
अत्रेत्यद्यमानान्नानुगतोऽनुशयी वाक्यं वा प्रकृतमुच्यते ।
रेतःसिचः स्वभावालोचनया मुख्यस्य तद्भावस्यायोगं स्फोरयति -
चिरेति ।
अनुशयिस्वभावालोचनयापि तमेवार्थं समर्थयते -
कथमिति ।
मुख्यस्य तद्भावस्यायोगे फलितमाह -
तत्रेति ।
तथापि व्रीह्यादिभावे किं जातं तदाह -
तद्वदिति ।
अन्यथोपक्रमोपसंहारयोर्विरोधः स्यात्तत्परिहारार्थमुपसंहारवदुपक्रमोऽपि नेतव्य इत्याह -
इत्यविरोध इति ॥ २६ ॥