तर्हि कुत आख्यानान्युपयुक्तानीत्याशङ्क्य विशेषणश्रुत्या सर्वश्रुतौ भग्नायां निर्बाधः संनिधिर्विद्यास्वेवोपनिषदाख्यानानि नियुञ्जीतेत्याह -

तथाचेति ।

सूत्रार्थं विवृणोति -

असतीति ।

एकवाक्यतोपसम्बन्धं विभजते -

तथाहीति ।

प्ररोचनमनुरागजननम् ।

संनिहितविद्याभिराख्यानानामेकवाक्यताप्रतीतिमुदाहरति -

मैत्रेयीति ।

आख्यानत्वेऽपि पारिप्लवार्थत्वादर्शनाच्च न तादर्थ्यं प्रकृताख्यानानामित्याह -

यथेति ।

उदखिददुद्धृतवान्होमायेति यावत् ।

श्रुतिलिङ्गसंनिधिभिर्विद्यार्थत्वे सिद्धे फलितमुपसंहरति -

तस्मादिति ॥ २४ ॥