अद्वैतशारदा | दक्षिणाम्नाय श्रीशारदापीठम्, शृङ्गेरी

स्मृतेश्च ॥ ११ ॥

स्मृतिरप्येतमर्थमनुजानाति — ‘ब्रह्मणा सह ते सर्वे सम्प्राप्ते प्रतिसञ्चरे । परस्यान्ते कृतात्मानः प्रविशन्ति परं पदम्’ इति । तस्मात्कार्यब्रह्मविषया एव गतिश्रुतयः इति सिद्धान्तः ॥ ११ ॥

स्मृतेश्चेति ; स्मृतिरिति ; तस्मादिति ॥ ११ ॥ ;

क्रममुक्तौ स्मृतिं प्रमाणयति -

स्मृतेश्चेति ।

तामेवोदाहरति -

स्मृतिरिति ।

प्रतिसञ्चरो महाप्रलयस्तस्मिन्प्राप्ते परस्य हिरण्यगर्भस्यान्तोऽधिकारावसानं तदा कृतात्मानः शुद्धधियो ब्रह्मलोकनिवासिनस्तत्रोत्पन्नसम्यग्धियः सर्वे ब्रह्मणा मुच्यमानेन सह परं पदं प्रविशन्तीति योजना ।

सिद्धान्तमुपसंहरति -

तस्मादिति ॥ ११ ॥