तत्रैव हेत्वन्तरार्थं सूत्रं व्याचष्टे -

इतश्चेत्यादिना ।

वृत्तिरवस्था । अग्निमन्थनादिकं वीर्यवत्कर्म ।

कामादिवृत्तिवज्ज्ञानेऽपि पञ्चत्वनियमो नास्तीत्यरुचिं स्वयमेवोद्भाव्य पक्षान्तरं गृह्णाति -

नन्वत्रापीत्यादिना ।

प्रमाणं प्रमितिः विपर्ययो भ्रमः । शशविषाणादिज्ञानं विकल्पः । तामसी वृत्तिर्निद्रा । स्मृतिः प्रसिद्धा ।

भ्रमनिद्रयोरविद्यावृत्तित्वान्न मनोवृत्तित्वमित्यरुच्या स्वमतमाह -

बह्विति ।

सूत्रस्यार्थान्तरमाह -

जीवेति ।

तदेवं प्राणवायोर्भेदाभेदश्रुत्योरविरोध इति सिद्धम् ॥१२॥