உக்தந்யாயேந ப்ராணோபாஸ்திமுபேத்ய ப்ராணதே³வதாம் ஶுத்³த்⁴யாதி³கு³ணவதீமாக்ஷிபதி —
ப⁴வத்விதி ।
யதா² ப்ராணஸ்யோபாஸ்தி: ஶாஸ்த்ரத்³ருஷ்டத்வாதி³ஷ்டா ததா²(அ)ஸ்ய கு³ணஸம்ப³ந்த⁴: ஶ்ருதத்வாதே³ஷ்டவ்ய உபாஸ்தாவுபாஸ்யே ச கு³ணவதி ப்ராணே ப்ராமாணிகத்வப்ராப்தேரவிஶேஷாதி³தி ஸித்³தா⁴ந்தீ ப்³ரூதே —
நந்விதி ।
ப்ராணஸ்யோபாஸ்யத்வே(அ)பி விஶுத்³த்⁴யாதி³கு³ணவாத³ஸ்ய ஸ்துத்யர்த²த்வேநார்த²வாத³த்வஸம்ப⁴வாந்ந யதோ²க்தா தே³வதா ஸ்யாதி³தி பூர்வவாத்³யாஹ —
ந ஸ்யாதி³தி।
விஶுத்³த்⁴யாதி³கு³ணவாத³ஸ்யார்த²வாத³த்வே(அ)பி நாபூ⁴தார்த²வாத³த்வமிதி பரிஹரதி —
நேதி ।
விஶுத்³த்⁴யாதி³கு³ணவிஶிஷ்டப்ராணத்³ருஷ்டேரத்ர ப²லப்ராப்தி: ஶ்ருதா ந ஸா ஜ்ஞாநஸ்ய மித்²யார்த²த்வே யுக்தா ஸம்யக்³ஜ்ஞாநாதே³வ புமர்த²ப்ராப்தே: ஸம்ப⁴வாத³த: ஸ்துதிரபி யதா²ர்தை²வேத்யர்த²: ।
லோகத்³ருஷ்டாந்தம் வ்யாசஷ்டே —
யோ ஹீதி ।
இஹேதி வேதா³க்²யதா³ர்ஷ்டாந்திகோக்தி: ।
நநு விஶுத்³த்⁴யாதி³கு³ணவதீம் தே³வதாம் வத³ந்தி வாக்யாந்யுபாஸநாவித்⁴யர்த²த்வாந்ந ஸ்வார்தே² ப்ராமாண்யம் ப்ரதிபத்³யந்தே தத்ரா(அ)ஹ —
ந சேதி ।
அந்யபராணாமபி வாக்யாநாம் மாநாந்தரஸம்வாத³விஸம்வாத³யோரஸதோ: ஸ்வார்தே² ப்ராமாண்யமநுப⁴வாநுஸாரிபி⁴ரேஷ்டவ்யமித்யர்த²: ।
நநு ப்ராணஸ்ய விஶுத்³த்⁴யாதி³வாதோ³ ந ஸ்வார்தே² மாநமந்யபரத்வாதா³தி³த்யயூபாதி³வாக்யவத³தா ஆஹ —
ந சேதி ।
ஆதி³த்யயூபாதி³வாக்யார்த²ஜ்ஞாநஸ்ய ப்ரத்யக்ஷாதி³நா(அ)பவாத³வத்³விஶுத்³த்⁴யாதி³கு³ணவிஜ்ஞாநஸ்ய நாபவாத³: ஶ்ருதஸ்தஸ்மாத்³விஶுத்³த்⁴யாதி³வாத³ஸ்ய ஸ்வார்தே² மாநத்வமப்ரத்யூஹமித்யர்த²: ।
விஶுத்³த்⁴யாதி³கு³ணகப்ராணவிஜ்ஞாநாத்ப²லஶ்ரவணாத்தத்³வாத³ஸ்ய யதா²ர்த²த்வமேவேத்யுபஸம்ஹரதி —
தத இதி ।
லோகவத்³வேதே³(அ)பி ஸம்யக்³ஜ்ஞாநாதி³ஷ்டப்ராப்திரநிஷ்டபரிஹாரஶ்சேத்யந்வயமுகே²நோக்தமர்த²ம் வ்யதிரேகமுகே²நாபி ஸமர்த²யதே —
விபர்யயே சேத்யாதி³நா ।
ஶாஸ்த்ரஸ்யாநர்தா²ர்த²த்வமிஷ்டமிதி ஶங்காம் நிராசஷ்டே —
ந சேதி ।
அபௌருஷேயஸ்யாஸம்பா⁴விதஸர்வதோ³ஷஸ்யாஶேஷபுருஷார்த²ஹேதோ: ஶாஸ்த்ரஸ்யாநர்தா²ர்த²த்வமேஷ்டுமஶக்யமித்யர்த²: ।
ஶாஸ்த்ரஸ்ய யதா²பூ⁴தார்த²த்வம் நிக³மயதி —
தஸ்மாதி³தி ।
உபாஸநார்த²ம் ஜ்ஞாநார்த²ம் சேதி ஶேஷ: ।
ஶாஸ்த்ராத்³யதா²ர்த²ப்ரதிபத்தே: ஶ்ரேய:ப்ராப்திரித்யத்ர வ்யபி⁴சாரம் சோத³யதி —
நாமாதா³விதி ।
ததே³வ ஸ்பு²டயதி —
ஸ்பு²டமிதி ।
அப்³ரஹ்மணி ப்³ரஹ்மத்³ருஷ்டிரதஸ்மிம்ஸ்தத்³பு³த்³தி⁴த்வாந்மித்²யா தீ⁴: ஸா ச யாவந்நாம்நோ க³தமித்யாதி³ஶ்ருத்யா ப²லவதீ தத: ஶாஸ்த்ராத்³யதா²ர்த²ப்ரதிபத்தேரேவ ப²லமித்யயுக்தமித்யர்த²: ।
பே⁴தா³க்³ரஹபூர்வகோ(அ)ந்யஸ்யாந்யாத்மதாவபா⁴ஸோ மித்²யாஜ்ஞாநமத்ர து பே⁴தே³ பா⁴ஸமாநே(அ)ந்யத்ராந்யத்³ருஷ்டிர்விதீ⁴யதே । யதா² விஷ்ணோர்பே⁴தே³ ப்ரதிமாயாம் க்³ருஹ்யமாணே தத்ர விஷ்ணுத்³ருஷ்டி: க்ரியதே தந்நேத³ம் மித்²யாஜ்ஞாநமித்யாஹ —
நேதி ।
நஞர்த²ம் ஸ்பஷ்டயதி —
நாமாதா³விதி ।
ப்ரஶ்நபூர்வகம் ஹேதும் வ்யாசஷ்டே —
கஸ்மாதி³தி ।
ப்ரதிமாயாம் விஷ்ணுத்³ருஷ்டிம் ப்ரத்யாலம்ப³நத்வமேவ ந விஷ்ணுதாதா³த்ம்யம் நாமாதே³ஸ்து ப்³ரஹ்மதாதா³த்ம்யம் ஶ்ருதமிதி வைஷம்யமாஶங்க்ய(அ)(அ)ஹ —
ஆலம்ப³நத்வேநேதி ।
உக்தமர்த²ம் வைத⁴ர்ம்யத்³ருஷ்டாந்தேந ஸ்பஷ்டயதி —
யதே²தி ।