अद्वैतशारदा | दक्षिणाम्नाय श्रीशारदापीठम्, शृङ्गेरी

ಅಥ ಹ ಮನ ಊಚುಸ್ತ್ವಂ ನ ಉದ್ಗಾಯೇತಿ ತಥೇತಿ ತೇಭ್ಯೋ ಮನ ಉದಗಾಯದ್ಯೋ ಮನಸಿ ಭೋಗಸ್ತಂ ದೇವೇಭ್ಯ ಆಗಾಯದ್ಯತ್ಕಲ್ಯಾಣಂ ಸಂಕಲ್ಪಯತಿ ತದಾತ್ಮನೇ । ತೇ ವಿದುರನೇನ ವೈ ನ ಉದ್ಗಾತ್ರಾತ್ಯೇಷ್ಯಂತೀತಿ ತಮಭಿದ್ರುತ್ಯ ಪಾಪ್ಮನಾವಿಧ್ಯನ್ಸ ಯಃ ಸ ಪಾಪ್ಮಾ ಯದೇವೇದಮಪ್ರತಿರೂಪಂ ಸಂಕಲ್ಪಯತಿ ಸ ಏವ ಸ ಪಾಪ್ಮೈವಮು ಖಲ್ವೇತಾ ದೇವತಾಃ ಪಾಪ್ಮಭಿರುಪಾಸೃಜನ್ನೇವಮೇನಾಃ ಪಾಪ್ಮನಾವಿಧ್ಯನ್ ॥ ೬ ॥

ತಥೈವ ಘ್ರಾಣಾದಿದೇವತಾ ಉದ್ಗೀಥನಿರ್ವರ್ತಕತ್ವಾಜ್ಜಪಮಂತ್ರಪ್ರಕಾಶ್ಯಾ ಉಪಾಸ್ಯಾಶ್ಚೇತಿ ಕ್ರಮೇಣ ಪರೀಕ್ಷಿತವಂತಃ । ದೇವಾನಾಂ ಚೈತನ್ನಿಶ್ಚಿತಮಾಸೀತ್ — ವಾಗಾದಿದೇವತಾಃ ಕ್ರಮೇಣ ಪರೀಕ್ಷ್ಯಮಾಣಾಃ ಕಲ್ಯಾಣವಿಷಯವಿಶೇಷಾತ್ಮಸಂಬಂಧಾಸಂಗಹೇತೋರಾಸುರಪಾಪ್ಮಸಂಸರ್ಗಾದುದ್ಗೀಥನಿರ್ವರ್ತನಾಸಮರ್ಥಾಃ ; ಅತೋಽನಭಿಧೇಯಾಃ, ‘ಅಸತೋ ಮಾ ಸದ್ಗಮಯ’ ಇತ್ಯನುಪಾಸ್ಯಾಶ್ಚ ; ಅಶುದ್ಧತ್ವಾದಿತರಾವ್ಯಾಪಕತ್ವಾಚ್ಚೇತಿ । ಏವಮು ಖಲು, ಅನುಕ್ತಾ ಅಪ್ಯೇತಾಸ್ತ್ವಗಾದಿದೇವತಾಃ, ಕಲ್ಯಾಣಾಕಲ್ಯಾಣಕಾರ್ಯದರ್ಶನಾತ್ , ಏವಂ ವಾಗಾದಿವದೇವ, ಏನಾಃ, ಪಾಪ್ಮನಾ ಅವಿಧ್ಯನ್ ಪಾಪ್ಮನಾ ವಿದ್ಧವಂತ ಇತಿ ಯದುಕ್ತಂ ತತ್ಪಾಪ್ಮಭಿರುಪಾಸೃಜನ್ ಪಾಪ್ಮಭಿಃ ಸಂಸರ್ಗಂ ಕೃತವಂತ ಇತ್ಯೇತತ್ ॥

ತಥೈವೇತಿ ; ದೇವಾನಾಂಚೇತಿ ; ಇತರೇತಿ ; ಏವಮಿತಿ ; ಕಲ್ಯಾಣೇತಿ ; ಇತಿ ಯದುಕ್ತಮಿತಿ ॥೩ –೪ –೫ –೬॥ ;

ವಾಗ್ದೇವತಾಯಾ ಜಪಮಂತ್ರಪ್ರಕಾಶ್ಯತ್ವಮುಪಾಸ್ಯತ್ವಂಚ ನೇತಿ ನಿರ್ಧಾರ್ಯಾವಶಿಷ್ಟಪರ್ಯಾಯಚತುಷ್ಟಯಸ್ಯ ತಾತ್ಪರ್ಯಮಾಹ —

ತಥೈವೇತಿ ।

ಪರೀಕ್ಷಾಫಲನಿರ್ಣಯಮಾಹ —

ದೇವಾನಾಂಚೇತಿ ।

ಅನುಪಾಸ್ಯತ್ವೇ ಹೀತ್ವಂತರಮಾಹ —

ಇತರೇತಿ ।

ಇತರಃ ಕಾರ್ಯಕರಣಸಂಘಾತಸ್ತಸ್ಮಿನ್ನವ್ಯಾಪಕತ್ವಂ ಪರಿಚ್ಛಿನ್ನತ್ವಮತಶ್ಚಾನುಪಾಸ್ಯತ್ವಂ ಜಪಮಂತ್ರಾಪ್ರಕಾಶ್ಯತ್ವಂಚೇತ್ಯರ್ಥಃ ।

ಉಕ್ತೈರಿಂದ್ರಿಯೈರನುಕ್ತೇಂದ್ರಿಯಾಣ್ಯುಪಲಕ್ಷಣೀಯಾನೀತಿ ವಿವಕ್ಷಿತ್ವೋಪಸಮ್ಹರತಿ —

ಏವಮಿತಿ ।

ವಾಗಾದಿವತ್ತ್ವಗಾದಿಷು ಕಲ್ಪಕಾಭಾವಾನ್ನ ಪಾಪ್ಮವೇಧೋಽಸ್ತೀತ್ಯಾಶಂಕ್ಯಾಽಽಹ —

ಕಲ್ಯಾಣೇತಿ ।

ಪಾಪ್ಮಭಿರುಪಾಸೃಜನ್ಪಾಪ್ಮನಾಽವಿಧ್ಯನ್ನಿತ್ಯನಯೋರಸ್ತಿ ಪೌನರುಕ್ತ್ಯಮಿತ್ಯಾಶಂಕ್ಯ ವ್ಯಾಖ್ಯಾನವ್ಯಾಖ್ಯೇಯಭಾವಾನ್ನೈವಮಿತ್ಯಾಹ —

ಇತಿ ಯದುಕ್ತಮಿತಿ ॥೩ –೪ –೫ –೬॥