కిమనయా కథయా సిద్ధమిత్యాశఙ్క్యాఽఽహ —

యస్మాదితి ।

ఉపలబ్ధిసిద్ధేఽర్థే యుక్తిం సముచ్చినోతి —

విశేషేతి ।

సర్వానేవ వాగాదీనవిశేషేణాగ్న్యాదిభావేన ప్రాణః సంజితవాన్ । న చామధ్యస్థః సాధారణం కార్యం నిర్వర్తయతి । అతో యుక్తితోఽప్యయమాస్యాన్తరాకాశే వర్తమానః సిద్ధ ఇత్యర్థః ।

అయాస్యత్వవదాఙ్గిరసత్వం గుణాన్తరం దర్శయతి —

అత ఎవేతి ।

సర్వసాధారణత్వాదేవేతి యావత్ ।

తథాఽపి కుతోఽస్యాఙ్గిరసత్వం సాధారణేఽపి నభసి తదనుపలబ్ధేరిత్యాశఙ్క్య పరిహరతి —

కథమిత్యాదినా ।

అఙ్గేషు చరమధాతోః సారత్వప్రసిద్ధేర్న ప్రాణస్య తథాత్వమితి శఙ్కిత్వా సమాధత్తే —

కథం పునరిత్యాదినా ।

కస్మాచ్చ హేతోరిత్యాదిచోద్యపరిహారముపసమ్హరతి —

యస్మాచ్చేతి ।

వాక్యార్థం ప్రపఞ్చయతి —

ఆత్మా హీతి ॥౮॥