अद्वैतशारदा | दक्षिणाम्नाय श्रीशारदापीठम्, शृङ्गेरी

ಫಲಮುಪಸಂಹೃತ್ಯಾಧುನಾಖ್ಯಾಯಿಕಾರೂಪಮೇವಾಶ್ರಿತ್ಯಾಹ । ಕಸ್ಮಾಚ್ಚ ಹೇತೋರ್ವಾಗಾದೀನ್ಮುಕ್ತ್ವಾ ಮುಖ್ಯ ಏವ ಪ್ರಾಣ ಆತ್ಮತ್ವೇನಾಶ್ರಯಿತವ್ಯ ಇತಿ ತದುಪಪತ್ತಿನಿರೂಪಣಾಯ, ಯಸ್ಮಾದಯಂ ವಾಗಾದೀನಾಂ ಪಿಂಡಾದೀನಾಂ ಚ ಸಾಧಾರಣ ಆತ್ಮಾ — ಇತ್ಯೇತಮರ್ಥಮಾಖ್ಯಾಯಿಕಯಾ ದರ್ಶಯಂತ್ಯಾಹ ಶ್ರುತಿಃ —

ಫಲಮಿತಿ ; ಕಸ್ಮಾಚ್ಚೇತಿ ;

ಫಲವತ್ಪ್ರಧಾನೋಪಾಸ್ತೇರುಕ್ತತ್ವಾತ್ತೇ ಹೋಚುರಿತ್ಯಾದ್ಯುತ್ತರವಾಕ್ಯಂ ಗುಣೋಪಾಸ್ತಿಪರಮಿತ್ಯಾಹ —

ಫಲಮಿತಿ ।

ಫಲವಂತಂ ಪ್ರಧಾನವಿಧಿಮುಕ್ತ್ವಾ ಸಂಪ್ರತ್ಯಾಖ್ಯಾಯಿಕಾಮೇವಾಽಽಶ್ರಿತ್ಯ ಗುಣವಿಶಿಷ್ಟಂ ಪ್ರಾಣೋಪಾಸನಮಾಹಾನಂತರಶ್ರುತಿರಿತ್ಯರ್ಥಃ ।

ಶಂಕೋತ್ತರತ್ವೇನ ಚೋತ್ತರಗ್ರಂಥಮವತಾರಯತಿ —

ಕಸ್ಮಾಚ್ಚೇತಿ ।

ವಿಶುದ್ಧತ್ವಸ್ಯೋಕ್ತತ್ವಾದ್ಧೇತ್ವಂತರಂ ಜಿಜ್ಞಾಸ್ಯಮಿತಿ ದ್ಯೋತಯಿತುಂ ಚಶಬ್ದಃ । ಕರಣಾನಾಂ ಕಾರ್ಯಸ್ಯ ತದವಯವಾನಾಂ ಚ ಪ್ರಾಣೋ ಯಸ್ಮಾದಾತ್ಮಾ ವ್ಯಾಪಕಸ್ತಸ್ಮಾತ್ಸ ಏವಾಶ್ರಯಿತವ್ಯ ಇತ್ಯುಪಪತ್ತಿನಿರೂಪಣಾರ್ಥಂ ತಸ್ಯ ವ್ಯಾಪಕತ್ವಮಿತ್ಯೇತಮರ್ಥಮಾಖ್ಯಾಯಿಕಯಾ ದರ್ಶಯಂತೀ ಶ್ರುತಿರ್ಹೇತ್ವಂತರಮಾಹೇತಿ ಯೋಜನಾ । ತಚ್ಛಬ್ದಸ್ತಸ್ಮಾದರ್ಥೇ ।