ఫలవత్ప్రధానోపాస్తేరుక్తత్వాత్తే హోచురిత్యాద్యుత్తరవాక్యం గుణోపాస్తిపరమిత్యాహ —

ఫలమితి ।

ఫలవన్తం ప్రధానవిధిముక్త్వా సంప్రత్యాఖ్యాయికామేవాఽఽశ్రిత్య గుణవిశిష్టం ప్రాణోపాసనమాహానన్తరశ్రుతిరిత్యర్థః ।

శఙ్కోత్తరత్వేన చోత్తరగ్రన్థమవతారయతి —

కస్మాచ్చేతి ।

విశుద్ధత్వస్యోక్తత్వాద్ధేత్వన్తరం జిజ్ఞాస్యమితి ద్యోతయితుం చశబ్దః । కరణానాం కార్యస్య తదవయవానాం చ ప్రాణో యస్మాదాత్మా వ్యాపకస్తస్మాత్స ఎవాశ్రయితవ్య ఇత్యుపపత్తినిరూపణార్థం తస్య వ్యాపకత్వమిత్యేతమర్థమాఖ్యాయికయా దర్శయన్తీ శ్రుతిర్హేత్వన్తరమాహేతి యోజనా । తచ్ఛబ్దస్తస్మాదర్థే ।