సంప్రతి ముఖ్యప్రాణస్య మన్త్రప్రకాశ్యత్వముపాస్యత్వం చ వక్తుముత్తరవాక్యముపాదాయ వ్యాకరోతి —
వాగాదీతి ।
క్రమేణోపాసీనా ఇతి సంబన్ధః వాగాదిషు నైరాశ్యానాన్తర్యమథశబ్దార్థః ।
వివక్షితార్థజ్ఞాపకోఽసాధారణో దేహతదవయవవ్యాపారోఽభినయః । దోషాసంసర్గిణం దోషేణ సంసృష్టం కర్తృమిచ్ఛా కుతో జాతేత్యాశఙ్క్యాఽఽహ —
స్వేనేతి ।
తదభ్యాసానువృత్త్యా తస్య పాప్మసంసర్గకరణస్యాభ్యాసవశాదితి యావత్ ।
ఉక్తమర్థం దృష్టాన్తేన స్పష్టయతి —
కథమిత్యాదినా ।
అసురనాశేనాఽఽసంగజనితపాప్మవియోగే హేతుమాహ —
అసంసర్గేతి ।
వక్ష్యమాణం సోఽగ్నిరభవదిత్యాదినేతి శేషః ।
వాగాదీనాం స్థితానాం నష్టానాం చ కుతోఽగ్న్యాదిరూపత్వమిత్యాశఙ్క్యాహ —
పూర్వమపీతి ।
న తర్హి తేషాం పరిచ్ఛేదాభిమానః స్యాదిత్యాశఙ్క్యాఽఽహ —
స్వాభావికేనేతి ।
పరిచ్ఛేదాభిమానాదగ్న్యాద్యాత్మాభిమానస్య బలవత్త్వం సూచయతి —
శాస్త్రేతి ।
న కేవలమత్రోక్తానామేవాసురాణామసంసర్గధర్మిప్రాణాశ్రయాద్వినాశః కిన్తు తత్తుల్యజాతీయానామపీత్యభిప్రేత్యాఽఽహ —
కిఞ్చేతి ।
వాగాదీనామగ్న్యాదిభావాపత్తివచనేన తత్సంహతస్య యజమానస్య దేవతాప్రాప్తిరాసురపాప్మధ్వంసశ్చ ఫలమిత్యుక్తం తత్ర పూర్వకల్పీయయజమానస్యాతిశయశాలిత్వాద్యథోక్తఫలవత్త్వేఽపి నేదానీన్తనస్యైవమిత్యాశఙ్క్య భవతీత్యాదిశ్రుతిమవతారయతి —
యథేతి ।
పూర్వకల్పనాప్రకారేణ పూర్వజన్మస్థో యజమానః శాస్త్రప్రకాశితం వర్తమానప్రజాపతిత్వం ప్రతిపన్నో యథేతి సంబన్ధః । పూర్వయజమాన ఇత్యస్య వ్యాఖ్యా అతిక్రాన్తకాలిక ఇతి ।
పురాకల్పమేవ దర్శయతి —
ఎతామితి ।
తేనేతి శ్రుత్యుక్తేనేత్యేతత్ । తేనైవ విధినా శ్రుతిప్రకాశితేన క్రమేణ ముఖ్యం ప్రాణమాత్మత్వేనోపగమ్యేతి శేషః ।
సపత్నో భ్రాతృవ్యస్తస్య ద్విషన్నితి కుతో విశేషణమర్థసిద్ధత్వాద్ద్వేషస్యేత్యాశఙ్క్యాఽఽహ —
యత ఇతి ।
తస్య ద్వేష్టృత్వనియమే హేతుమాహ —
పారమార్థికేతి ।
అపరిఛిన్నదేవతాత్వమత్ర పారమార్థికమాత్మస్వరూపం వివక్షితం తత్తిరస్కరణకారణత్వాదుక్తపాప్మనో విశేషణమర్థవదితి శేషః ।
‘యదాగ్నేయోఽష్టాకపాల’ ఇతివద్ ‘య ఎవం వేదే’తి ప్రసిద్ధార్థోపబన్ధేఽపి విధిపరం వాక్యమతశ్చైవం విద్యాదితి వివక్షితమిత్యభిప్రేత్యాఽఽహ —
యథోక్తమితి ॥౭॥