కథం పాప్మా మృత్యురుచ్యతే తత్రాఽఽహ —
స్వాభావికేతి ।
అపహత్యేత్యత్ర పూర్వవదన్వయః ।
ప్రాణదేవతా చేత్పాప్మనాం హన్తి సదైవ కిం న హన్యాదిత్యాశఙ్క్యాఽఽహ —
ప్రాణాత్మేతి ।
భవతు ప్రాణో వాగాదీనాం పాప్మనోఽపహన్తా విదుషస్తు కిమాయాతమిత్యాశఙ్క్యాఽఽహ —
విరోధాదేవేతి ।
అనన్తాకాశదేశత్వాద్దిశామన్తాభావాద్యత్రాఽఽసామిత్యాద్యయుక్తమితి శఙ్కతే —
నన్వితి ।
శాస్త్రీయజ్ఞానకర్మసంస్కృతో జనో మధ్యదేశః ప్రసిద్ధస్యాపి తదధిష్ఠితత్వేన మధ్యదేశత్వాత్తత్రాప్యన్త్యజాధిష్ఠితదేశస్య పాపీయస్త్వస్వీకారాదతస్తం జనం తదధిష్ఠితం చ దేశమవధిం కృత్వా తేనైవ నిమిత్తేన దిశాం కల్పితత్వాదానన్త్యాభావాత్పూర్వోక్తజనాతిరిక్తజనస్య తదధిష్ఠితదేశస్య చాన్తత్వోక్తేర్మధ్యదేశాదన్యో దేశో దిశామన్త ఇత్యుక్తే న కాచిదనుపపత్తిరితి పరిహరతి —
ఉచ్యత ఇతి ।
కిమిత్యన్త్యజనేష్విత్యధికావాపః క్రియతే తత్రాఽఽహ —
ఇతి సామర్థ్యాదితి ।
దేశమాత్రే పాప్మావస్థానానుపపత్తేరిత్యర్థః ।
తామేవానుపపత్తిం సాధయతి —
ఇన్ద్రియేతి ।
భవతు యథోక్తో దిశామన్తస్తథా చ పాప్మసంసర్గోఽస్తు తథాఽపి కిమాయాతమిత్యాశఙ్క్య తస్య శిష్టైస్త్యాజ్యత్వమిత్యాహ —
తస్మాదితి ।
నిషేధద్వయస్య తాత్పర్యమాహ —
జనశూన్యమపీతి ।
ప్రాణోపాస్తిప్రకరణే నిషేధశ్రుతేస్తదుపాసకేనైవాయం నిషేధోఽనుష్ఠేయో న సర్వైరిత్యాశఙ్క్యాఽఽహ —
నేదిత్యాదినా ।
ఇత్థం శ్రుత్యుక్తం నిషేధం న చేదహం కుర్యాం తతః పాప్మానమనుగచ్ఛేయం నిషేధాతిక్రమాదితి సర్వస్య భయం జాయతే న ప్రాణోపాసకస్యైవ । అతః సర్వోఽపి పాపాద్భీతో నోభయం గచ్ఛేద్వాక్యం హి ప్రకరణాద్బలవదిత్యర్థః ॥౧౦॥