అథాత్మనే । యథా వాగాదిభిరాత్మార్థమాగానం కృతమ్ ; తథా ముఖ్యోఽపి ప్రాణః సర్వప్రాణసాధారణం ప్రాజాపత్యఫలమాగానం కృత్వా త్రిషు పవమానేషు, అథ అనన్తరం శిష్టేషు నవసు స్తోత్రేషు, ఆత్మనే ఆత్మార్థమ్ , అన్నాద్యమ్ అన్నం చ తదాద్యం చ అన్నాద్యమ్ , ఆగాయత్ । కర్తుః కామసంయోగో వాచనిక ఇత్యుక్తమ్ । కథం పునస్తదన్నాద్యం ప్రాణేనాత్మార్థమాగీతమితి గమ్యత ఇత్యత్ర హేతుమాహ — యత్కిఞ్చేతి — సామాన్యాన్నమాత్రపరామర్శార్థః ; హీతి హేతౌ ; యస్మాల్లోకే ప్రాణిభిర్యత్కిఞ్చిదన్నమద్యతే భక్ష్యతే తదనేనైవ ప్రాణేనైవ ; అన ఇతి ప్రాణస్యాఖ్యా ప్రసిద్ధా ; అనః శబ్దః సాన్తః శకటవాచీ, యస్త్వన్యః స్వరాన్తః స ప్రాణపర్యాయః ; ప్రాణేనైవ తదద్యత ఇత్యర్థః ; కిఞ్చ, న కేవలం ప్రాణేనాద్యత ఎవాన్నాద్యమ్ , తస్మిఞ్శరీరాకారపరిణతేఽన్నాద్యే ఇహ, ప్రతితిష్ఠతి ప్రాణః ; తస్మాత్ప్రాణేనాత్మనః ప్రతిష్ఠార్థమాగీతమన్నాద్యమ్ । యదపి ప్రాణేనాన్నాదనం తదపి ప్రాణస్య ప్రతిష్ఠార్థమేవేతి న వాగాదిష్వివ కల్యాణాసఙ్గజపాప్మసమ్భవః ప్రాణేఽస్తి ॥