ಕ್ರಿಯಾಪದನಿಷ್ಪತ್ತಿಪ್ರಕಾರಂ ಸೂಚಯತಿ —
ತೋರಿತಿ ।
ತುಪ್ರತ್ಯಯಸ್ಯಾಯಮಾಶಿಷಿ ವಿಷಯೇ ತಾತಙಾದೇಶಃ ‘ತುಹ್ಯೋಸ್ತಾತಙಾಶಿಷ್ಯನ್ಯತರಸ್ಯಾಮ್’(ಪಾ.ಸೂ. ೭।೧।೩೫.) ಇತಿ ಸ್ಮರಣಾದಿತ್ಯರ್ಥಃ ।
ಮೂರ್ಧಪಾತಪ್ರಾಪಕಂ ದರ್ಶಯತಿ —
ಯದೀತಿ ।
ಅನೃತವಾದಿತ್ವಸ್ಯ ಪ್ರಾಪಕಾಭಾವಾದಪ್ರಾಪ್ತಿರಿತಿ ಶಂಕತೇ —
ಕಥಂ ಪುನರಿತಿ ।
ಉದ್ಗಾನಸ್ಯ ಬುದ್ಧ್ಯಾದಿಸನ್ನಿಧಾನಾತ್ತದ್ದೇವತಾ ಪ್ರಜಾಪತ್ಯಾದಿಲಕ್ಷಣಾ ಕಿಂ ತಸ್ಮಿಂದೇವತಾ ಕಿಂವಾ ವರ್ಣಸ್ವರಾದಿಸನ್ನಿಧಾನಾತ್ತದ್ದೇವತೈವ ತತ್ರ ದೇವತೇತಿ ವಿಪ್ರತಿಪತ್ತೇರನೃತವಾದಿತ್ವೇ ಶಂಕಿತೇ ಬ್ರಹ್ಮದತ್ತಃ ಶಪಥೇನ ನಿರ್ಣಯಂ ಚಕಾರೇತ್ಯಾಹ —
ಉಚ್ಯತ ಇತಿ ।
ಪ್ರಾಣಾದ್ವಾಕ್ಸಂಯುಕ್ತಾದನ್ಯೇನಾಯಾಸ್ಯೋ ಯದ್ಯುದಗಾಯದಿತಿ ಸಂಬಂಧಃ ।
ನನ್ವಯಾಸ್ಯಾಂಗಿರಸಶಬ್ದವಾಚ್ಯೋ ಮುಖ್ಯಪ್ರಾಣೋ ದೇವತಾತ್ವಾನ್ನೋದ್ಗಾತಾ ಭವಿತುಮುತ್ಸಹತೇ ತತ್ರಾಽಽಹ —
ಮುಖ್ಯೇತಿ ।
ಉಕ್ತಾರ್ಥದಾರ್ಢ್ಯಾಯೇತ್ಯುಕ್ತಮುಪಸಮ್ಹರತಿ —
ಇತಿ ವಿಜ್ಞಾನ ಇತಿ ।
ಉಕ್ತರೀತ್ಯಾ ಶಪಥಕ್ರಿಯಯಾ ಪ್ರಾಣ ಏವೋದ್ಗೀಥದೇವತೇತ್ಯಸ್ಮಿನ್ವಿಜ್ಞಾನೇ ಪ್ರತ್ಯಯೋ ವಿಶ್ವಾಸಸ್ತಸ್ಯ ಯದ್ದಾರ್ಢ್ಯಂ ತಸ್ಯ ಕರ್ತವ್ಯತ್ವಮಾಖ್ಯಾಯಿಕಯಾ ದರ್ಶಯತಿ ಶ್ರುತಿರಿತಿ ಯಾವತ್ ।
ಆಖ್ಯಾಯಿಕಾರ್ಥಸ್ಯೈವ ವಾಚೇತ್ಯಾದಿನೋಕ್ತೇಃ ಪೌನರುಕ್ತ್ಯಮಿತ್ಯಾಶಂಕ್ಯಾಽಽಹ —
ತಮಿಮಮಿತಿ ।
ಶಪಥಸ್ಯ ಸ್ವಾತಂತ್ರ್ಯೇಣಾಪ್ರಾಮಾಣ್ಯೇಽಪಿ ಶ್ರುತಿಮೂಲತಯಾ ಪ್ರಾಮಾಣ್ಯಂ ಸಿದ್ಧ್ಯತೀತಿ ಭಾವಃ ॥೨೪॥