తథా ప్రతిష్ఠాగుణం విధిత్సన్నాహ — తస్య హైతస్య సామ్నో యః ప్రతిష్ఠాం వేద ; ప్రితితిష్ఠత్యస్యామితి ప్రతిష్ఠా వాక్ ; తాం ప్రతిష్ఠాం సామ్నో గుణమ్ , యో వేద స ప్రతితిష్ఠతి హ । ‘తం యథా యథోపాసతే’ (శత. బ్రా. ౧౦ । ౫ । ౨ । ౨౦) ఇతి శ్రుతేస్తద్గుణత్వం యుక్తమ్ । పూర్వవత్ఫలేన ప్రతిలోభితాయ కా ప్రతిష్ఠేతి శుశ్రూషవ ఆహ — తస్య వై సామ్నో వాగేవ । వాగితి జిహ్వామూలాదీనాం స్థానానామాఖ్యా ; సైవ ప్రతిష్ఠా । తదాహ — వాచి హి జిహ్వామూలాదిషు హి యస్మాత్ప్రతిష్ఠితః సన్నేష ప్రాణః ఎతద్గానం గీయతే గీతిభావమాపద్యతే, తస్మాత్సామ్నః ప్రతిష్ఠా వాక్ । అన్నే ప్రతిష్ఠితో గీయత ఇత్యు హ ఎకే అన్యే ఆహుః ; ఇహ ప్రతితిష్ఠతీతి యుక్తమ్ । అనిన్దితత్వాదేకీయపక్షస్య వికల్పేన ప్రతిష్ఠాగుణవిజ్ఞానం కుర్యాత్ — వాగ్వా ప్రతిష్ఠా, అన్నం వేతి ॥