ப்³ருஹதா³ரண்யகோபநிஷத்³பா⁴ஷ்யம்
ப்ரத²மோ(அ)த்⁴யாய:த்ருதீயம் ப்³ராஹ்மணம்
பூர்வப்ருஷ்ட²ம்      உத்தரப்ருஷ்ட²ம்
ஆநந்த³கி³ரிடீகா (ப்³ருஹதா³ரண்யக)
 
அதா²த: பவமாநாநாமேவாப்⁴யாரோஹ: ஸ வை க²லு ப்ரஸ்தோதா ஸாம ப்ரஸ்தௌதி ஸ யத்ர ப்ரஸ்துயாத்ததே³தாநி ஜபேத் । அஸதோ மா ஸத்³க³மய தமஸோ மா ஜ்யோதிர்க³மய ம்ருத்யோர்மாம்ருதம் க³மயேதி ஸ யதா³ஹாஸதோ மா ஸத்³க³மயேதி ம்ருத்யுர்வா அஸத்ஸத³ம்ருதம் ம்ருத்யோர்மாம்ருதம் க³மயாம்ருதம் மா குர்வித்யேவைததா³ஹ தமஸோ மா ஜ்யோதிர்க³மயேதி ம்ருத்யுர்வை தமோ ஜ்யோதிரம்ருதம் ம்ருத்யோர்மாம்ருதம் க³மயாம்ருதம் மா குர்வித்யேவைததா³ஹ ம்ருத்யோர்மாம்ருதம் க³மயேதி நாத்ர திரோஹிதமிவாஸ்தி । அத² யாநீதராணி ஸ்தோத்ராணி தேஷ்வாத்மநே(அ)ந்நாத்³யமாகா³யேத்தஸ்மாது³ தேஷு வரம் வ்ருணீத யம் காமம் காமயேத தம் ஸ ஏஷ ஏவம்விது³த்³கா³தாத்மநே வா யஜமாநாய வா யம் காமம் காமயதே தமாகா³யதி தத்³தை⁴தல்லோகஜிதே³வ ந ஹைவாலோக்யதாயா ஆஶாஸ்தி ய ஏவமேதத்ஸாம வேத³ ॥ 28 ॥
ஏவம் தாவஜ்ஜ்ஞாநகர்மப்⁴யாம் ப்ராணாத்மாபத்திரித்யுக்தம் ; தத்ர நாஸ்த்யாஶங்காஸம்ப⁴வ: । அத: கர்மாபாயே ப்ராணாபத்திர்ப⁴வதி வா ந வேத்யாஶங்க்யதே ; ததா³ஶங்காநிவ்ருத்த்யர்த²மாஹ — தத்³தை⁴தல்லோகஜிதே³வேதி । தத்³த⁴ ததே³தத்ப்ராணத³ர்ஶநம் கர்மவியுக்தம் கேவலமபி, லோகஜிதே³வேதி லோகஸாத⁴நமேவ । ந ஹ ஏவ அலோக்யதாயை அலோகார்ஹத்வாய, ஆஶா ஆஶம்ஸநம் ப்ரார்த²நம் , நைவாஸ்தி ஹ । ந ஹி ப்ராணாத்மந்யுத்பந்நாத்மாபி⁴மாநஸ்ய தத்ப்ராப்த்யாஶம்ஸநம் ஸம்ப⁴வதி । ந ஹி க்³ராமஸ்த²: கதா³ க்³ராமம் ப்ராப்நுயாமித்யரண்யஸ்த² இவாஶாஸ்தே । அஸந்நிக்ருஷ்டவிஷயே ஹ்யநாத்மந்யாஶம்ஸநம் , ந தத்ஸ்வாத்மநி ஸம்ப⁴வதி । தஸ்மாந்நாஶாஸ்தி — கதா³சித்ப்ராணாத்மபா⁴வம் ந ப்ரதிபத்³யேயேதி ॥

வ்ருத்தம் கீர்தயதி —

ஏவம் தாவதி³தி ।

தத்ர கர்மஸமுச்சிதே ஜ்ஞாநே தே³வதாப்தௌ ஶங்காஸம்ப⁴வோ நாஸ்தி மித²: ஸஹக்ருதயோர்ஜ்ஞாநகர்மணோஸ்ததா³ப்திஹேதுத்வாதி³த்யாஹ —

தத்ரேதி ।

ஸமநந்தரம் வாக்யமவதாரயதி —

அத இதி ।

ஸமுச்சயாத்ப²லாப்தேர்த்³ருஷ்டத்வாதி³தி யாவத் ।

ந ஹேத்யாதி³நா பதா³நி சி²ந்த³ந்வாக்யமாதா³ய வ்யாகரோதி —

அலோகார்ஹத்வாயேதி ।

ததே³வ ஸ்பு²டயதி —

ந ஹீதி ।

தத்ர த்³ருஷ்டாந்தமாஹ —

ந ஹீதி ।

த்³ருஶ்யமாநமாஶம்ஸநம் தர்ஹி கஸ்மிந்விஷயே ஸ்யாதி³த்யாஶங்க்யா(அ)(அ)ஹ —

அஸந்நிக்ருஷ்டேதி ।

ப்ராணாத்மநா வ்யவஸ்தி²தஸ்ய விது³ஷஸ்ததா³த்மபா⁴வம் கதா³சித³ஹம் ந ப்ரபத்³யேயமித்யாஶம்ஸநம் நாஸ்தீதி நிக³மயதி —

தஸ்மாதி³தி ।