ப்³ருஹதா³ரண்யகோபநிஷத்³பா⁴ஷ்யம்
ப்ரத²மோ(அ)த்⁴யாய:த்ருதீயம் ப்³ராஹ்மணம்
பூர்வப்ருஷ்ட²ம்      உத்தரப்ருஷ்ட²ம்
ஆநந்த³கி³ரிடீகா (ப்³ருஹதா³ரண்யக)
 
அதா²த: பவமாநாநாமேவாப்⁴யாரோஹ: ஸ வை க²லு ப்ரஸ்தோதா ஸாம ப்ரஸ்தௌதி ஸ யத்ர ப்ரஸ்துயாத்ததே³தாநி ஜபேத் । அஸதோ மா ஸத்³க³மய தமஸோ மா ஜ்யோதிர்க³மய ம்ருத்யோர்மாம்ருதம் க³மயேதி ஸ யதா³ஹாஸதோ மா ஸத்³க³மயேதி ம்ருத்யுர்வா அஸத்ஸத³ம்ருதம் ம்ருத்யோர்மாம்ருதம் க³மயாம்ருதம் மா குர்வித்யேவைததா³ஹ தமஸோ மா ஜ்யோதிர்க³மயேதி ம்ருத்யுர்வை தமோ ஜ்யோதிரம்ருதம் ம்ருத்யோர்மாம்ருதம் க³மயாம்ருதம் மா குர்வித்யேவைததா³ஹ ம்ருத்யோர்மாம்ருதம் க³மயேதி நாத்ர திரோஹிதமிவாஸ்தி । அத² யாநீதராணி ஸ்தோத்ராணி தேஷ்வாத்மநே(அ)ந்நாத்³யமாகா³யேத்தஸ்மாது³ தேஷு வரம் வ்ருணீத யம் காமம் காமயேத தம் ஸ ஏஷ ஏவம்விது³த்³கா³தாத்மநே வா யஜமாநாய வா யம் காமம் காமயதே தமாகா³யதி தத்³தை⁴தல்லோகஜிதே³வ ந ஹைவாலோக்யதாயா ஆஶாஸ்தி ய ஏவமேதத்ஸாம வேத³ ॥ 28 ॥
கஸ்யைதத் । ய ஏவமேதத்ஸாம ப்ராணம் யதோ²க்தம் நிர்தா⁴ரிதமஹிமாநம் வேத³ — ‘அஹமஸ்மி ப்ராண இந்த்³ரியவிஷயாஸங்கை³ராஸுரை: பாப்மபி⁴ரத⁴ர்ஷணீயோ விஶுத்³த⁴: ; வாகா³தி³பஞ்சகம் ச மதா³ஶ்ரயத்வாத³க்³ந்யாத்³யாத்மரூபம் ஸ்வாபா⁴விகவிஜ்ஞாநோத்தே²ந்த்³ரியவிஷயாஸங்க³ஜநிதாஸுரபாப்மதோ³ஷவியுக்தம் ; ஸர்வபூ⁴தேஷு ச மதா³ஶ்ரயாந்நாத்³யோபயோக³ப³ந்த⁴நம் ; ஆத்மா சாஹம் ஸர்வபூ⁴தாநாம் , ஆங்கி³ரஸத்வாத் ; ருக்³யஜு:ஸாமோத்³கீ³த²பூ⁴தாயாஶ்ச வாச ஆத்மா, தத்³வ்யாப்தேஸ்தந்நிர்வர்தகத்வாச்ச ; மம ஸாம்நோ கீ³திபா⁴வமாபத்³யமாநஸ்ய பா³ஹ்யம் த⁴நம் பூ⁴ஷணம் ஸௌஸ்வர்யம் ; ததோ(அ)ப்யந்தரதரம் ஸௌவர்ண்யம் லாக்ஷணிகம் ஸௌஸ்வர்யம் ; கீ³திபா⁴வமாபத்³யமாநஸ்ய மம கண்டா²தி³ஸ்தா²நாநி ப்ரதிஷ்டா² ; ஏவம் கு³ணோ(அ)ஹம் புத்திகாதி³ஶரீரேஷு கார்‌த்ஸ்ந்யேந பரிஸமாப்த:, அமூர்தத்வாத்ஸர்வக³தத்வாச்ச’ — இதி ஆ ஏவமபி⁴மாநாபி⁴வ்யக்தேர்வேத³ உபாஸ்தே இத்யர்த²: ॥

கர்மஸமுச்சிதாது³பாஸநாத்கேவலாச்ச ப்ராணாத்மத்வம் ப²லமுக்தம் தத்ர ஸமுச்சிதாது³த்³கா³துர்யஜமாநஸ்ய வா ப²லம் கேவலாச்சோபாஸநாத்தயோரந்யதரஸ்யாந்யஸ்ய வா கஸ்யசிதி³தி ஜிஜ்ஞாஸமாந: ஶங்கதே —

கஸ்யேதி ।

ஜ்ஞாநகர்மணோருப⁴யத்ர ஸமபா⁴வாது³ப⁴யோரபி வசநாத்ப²லஸித்³தி⁴: ।

ஆஶ்ரமாந்தரவிஷயம் து கேவலஜ்ஞாநஸ்ய லோகஜயஹேதுத்வமித்யபி⁴ப்ரேத்யா(அ)(அ)ஹ —

ய ஏவமிதி ।

ஏவம்ஶப்³த³ஸ்ய ப்ரக்ருதபராமர்ஶித்வாத்பூர்வோக்தம் ஸர்வம் வேத்³யஸ்வரூபம் ஸம்க்ஷிபதி —

அஹமஸ்மீத்யாதி³நா ।

தஸ்ய வாகா³தி³ப்⁴யோ விஶேஷம் த³ர்ஶயதி —

இந்த்³ரியேதி ।

கிமிதா³நீம் ப்ராணஸ்யைவோபாஸ்யதயா வாகா³தி³பஞ்சகமுபேக்ஷிதமிதி நேத்யாஹ —

வாகா³தீ³தி ।

தஸ்ய ப்ராணாஶ்ரயத்வே(அ)பி குதோ தே³வதாத்வமாஸம்க³பாப்மவித்³த⁴த்வாதி³த்யாஶங்க்யா(அ)(அ)ஹ —

ஸ்வாபா⁴விகேதி ।

அந்நக்ருதோபகாரம் ப்ராணத்³வாரா வாகா³தௌ³ ஸ்மாரயதி —

ஸர்வேதி ।

ரூபகர்மாத்மகே ஜக³தி ப்ராணஸ்ய ஸ்வரூபமநுஸந்த⁴த்தே —

ஆத்மா சேதி ।

நாமாத்மகே ஜக³தி ப்ராணஸ்யா(அ)(அ)த்மத்வமுக்தம் ஸ்மாரயதி —

ருகி³தி ।

ஸதி ஸாமத்வே கீ³திபா⁴வாவஸ்தா²யாம் ப்ராணஸ்யோக்தம் பா³ஹ்யமாந்தரம் ச ஸௌஸ்வர்யம் ஸௌவர்ண்யமிதி கு³ணத்³வயமநுவத³தி —

மமேதி ।

தஸ்யைவ வைகல்பிகீம் ப்ரதிஷ்டா²முக்தாமநுஸ்மாரயதி —

கீ³தீதி ।

ய ஏவமித்யாதி³நோக்தம் பராம்ருஶதி —

ஏவங்கு³ணோ(அ)ஹமிதி ।

இத்யேவமபி⁴மாநாபி⁴வ்யக்திபர்யந்தம் யோ த்⁴யாயதி தஸ்யேத³ம் ப²லமித்யுபஸம்ஹரதி —

இதீதி ॥28॥