ಆಪಾತಿಕಮನಾಪಾತಿಕಂಚ ತಾತ್ಪರ್ಯಮುಕ್ತ್ವಾ ಪ್ರತೀಕಮಾದಾಯಾಕ್ಷರಾಣಿ ವ್ಯಾಕರೋತಿ —
ಆತ್ಮೈವೇತಿ ।
ತಸ್ಯಾಶ್ವಮೇಧಾಧಿಕಾರೇ ಪ್ರಕೃತತ್ವಂ ಸೂಚಯತಿ —
ಅಂಡಜ ಇತಿ ।
ಪೂರ್ವಸ್ಮಿನ್ನಪಿ ಬ್ರಾಹ್ಮಣೇ ತಸ್ಯ ಪ್ರಸ್ತುತತ್ವಮಸ್ತೀತ್ಯಾಹ —
ವೈದಿಕೇತಿ ।
ಸ ಏವಾಽಽಸೀದಿತಿ ಸಂಬಂಧಃ ।
ಸ್ಥಿತ್ಯವಸ್ಥಾಯಾಮಪಿ ಪ್ರಜಾಪತಿರೇವ ಸಮಷ್ಟಿದೇಹಸ್ತತ್ತದ್ವ್ಯಷ್ಟ್ಯಾತ್ಮನಾ ತಿಷ್ಠತೀತಿ ವಿಶೇಷಾಸಿದ್ಧಿರಿತ್ಯಾಶಂಕ್ಯಾಽಽಹ —
ತೇನೇತಿ ।
ಆತ್ಮಶಬ್ದೇನ ಪರಸ್ಯಾಪಿ ಗ್ರಹಸಂಭವೇ ಕಿಮಿತಿ ವಿರಾಡೇವೋಪಾದೀಯತ ಇತ್ಯಾಶಂಕ್ಯ ವಾಕ್ಯಶೇಷಾದಿತ್ಯಾಹ —
ಸ ಚೇತಿ ।
ವಕ್ಷ್ಯಮಾಣಮನ್ವಾಲೋಚನಾದಿ ವಿರಾಡಾತ್ಮಕರ್ತೃಕಮೇವೇತ್ಯಾಹ —
ಸ ಏವೇತಿ ।
ಸ್ವರೂಪಧರ್ಮವಿಷಯೌ ದ್ವೌ ವಿಮರ್ಶೌ ।
ನಾನ್ಯದಿತಿ ವಾಕ್ಯಮಾದಾಯಾಕ್ಷರಾಣಿ ವ್ಯಾಚಷ್ಟೇ —
ವಸ್ತ್ವಂತರಮಿತಿ ।
ದರ್ಶನಶಕ್ತ್ಯಭಾವಾದೇವ ವಸ್ತ್ವಂತರಂ ಪ್ರಜಾಪತಿರ್ನ ದೃಷ್ಟ್ವಾನಿತ್ಯಾಶಂಕ್ಯಾಽಽಹ —
ಕೇವಲಂ ತ್ವಿತಿ ।
ಸೋಽಹಮಿತ್ಯಾದಿ ವ್ಯಾಚಷ್ಟೇ —
ತಥೇತಿ ।
ಯಥಾ ಸರ್ವಾತ್ಮಾ ಪ್ರಜಾಪತಿರಹಮಿತಿ ಪೂರ್ವಸ್ಮಿಂಜನ್ಮನಿ ಶ್ರೌತೇನ ವಿಜ್ಞಾನೇನ ಸಂಸ್ಕೃತೋ ವಿರಾಡಾತ್ಮಾ ತಥೇದಾನೀಮಪಿ ಫಲಾವಸ್ಥಃ ಸೋಽಹಂ ಪ್ರಜಾಪತಿರಸ್ಮೀತಿ ಪ್ರಥಮಂ ವ್ಯಾಹೃತವಾನಿತಿ ಯೋಜನಾ ।
ವ್ಯಾಹರಣಫಲಮಾಹ —
ತತ ಇತಿ ।
ಕಿಮಿತಿ ಪ್ರಜಾಪತೇರಹಮಿತಿ ನಾಮೋಚ್ಯತೇ ಸಾಧಾರಣಂ ಹೀದಂ ಸರ್ವೇಷಾಮಿತ್ಯಾಶಂಕ್ಯೋಪಾಸನಾರ್ಥಮಿತ್ಯಾಹ —
ತಸ್ಯೇತಿ ।
ಆಧ್ಯಾತ್ಮಿಕಸ್ಯ ಚಾಕ್ಷುಷಸ್ಯ ಪುರುಷಸ್ಯಾಹಮಿತಿ ರಹಸ್ಯಂ ನಾಮೇತಿ ಯತೋ ವಕ್ಷ್ಯತ್ಯತಃ ಶ್ರುತಿಸಿದ್ಧಮೇವೈತನ್ನಾಮಾಸ್ಯ ಧ್ಯಾನಾರ್ಥಮಿಹೋಕ್ತಮಿತ್ಯರ್ಥಃ ।
ಪ್ರಜಾಪತೇರಹಂನಾಮತ್ವೇ ಲೋಕಪ್ರಸಿದ್ಧಿಂ ಪ್ರಮಾಣಯಿತುಮುತ್ತರಂ ವಾಕ್ಯಮಿತ್ಯಾಹ —
ತಸ್ಮಾದಿತಿ ।
ಉಪಾಸನಾರ್ಥಂ ಪ್ರಜಾಪತೇರಹಂನಾಮೋಕ್ತ್ವಾ ಪುರುಷನಾಮನಿರ್ವಚನಂ ಕರೋತಿ —
ಸ ಚೇತ್ಯಾದಿನಾ ।
ಪೂರ್ವಸ್ಮಿಂಜನ್ಮನಿ ಸಾಧಕಾವಸ್ಥಾಯಾಂ ಕರ್ಮಾದ್ಯನುಷ್ಠಾನೈರಹಮಹಮಿಕಯಾ ಪ್ರಜಾಪತಿತ್ವಪ್ರೇಪ್ಸೂನಾಂ ಮಧ್ಯೇ ಪೂರ್ವೋ ಯಃ ಸಮ್ಯಕ್ಕರ್ಮಾದ್ಯನುಷ್ಠಾನೈಃ ಸರ್ವಂ ಪ್ರತಿಬಂಧಕಂ ಯಸ್ಮಾದದಹತ್ತಸ್ಮಾತ್ಸ ಪ್ರಜಾಪತಿಃ ಪುರುಷಃ ಇತಿ ಯೋಜನಾ ।
ಉಕ್ತಮೇವ ಸ್ಫುಟಯತಿ —
ಪ್ರಥಮಃ ಸನ್ನಿತಿ ।
ಸರ್ವಸ್ಮಾದಸ್ಮಾತ್ಪ್ರಜಾಪತಿತ್ವಪ್ರತಿಪಿತ್ಸುಸಮುದಾಯಾತ್ಪ್ರಥಮಃ ಸನ್ನೌಷದಿತಿ ಸಂಬಂಧಃ ।
ಆಕಾಂಕ್ಷಾಪೂರ್ವಕಂ ದಾಹ್ಯಂ ದರ್ಶಯತಿ —
ಕಿಮಿತ್ಯಾದಿನಾ ।
ಪೂರ್ವಂ ಪ್ರಜಾಪತಿತ್ವಪ್ರತಿಬಂಧಕಪ್ರಧ್ವಂಸಿತ್ವೇ ಸಿದ್ಧಮರ್ಥಮಾಹ —
ಯಸ್ಮಾದಿತಿ ।
ಪುರುಷಗುಣೋಪಾಸಕಸ್ಯ ಫಲಮಾಹ —
ಯಥೇತಿ ।
ಅಯಂ ಪ್ರಜಾಪತಿರಿತಿ ಭವಿಷ್ಯದ್ವೃತ್ತ್ಯಾ ಸಾಧಕೋಕ್ತಿಃ , ಪುರುಷಃ ಪ್ರಜಾಪತಿರಿತಿ ಫಲಾವಸ್ಥಃ ಸ ಕಥ್ಯತೇ ।
ಕೋಽಸಾವೋಷತೀತ್ಯಪೇಕ್ಷಾಯಾಮಾಹ —
ತಂ ದರ್ಶಯತೀತಿ ।
ಪುರುಷಗುಣಃ ಪ್ರಜಾಪತಿರಹಮಸ್ಮೀತಿ ಯೋ ವಿದ್ಯಾತ್ಸೋನ್ಯಾನೋಷತೀತ್ಯರ್ಥಃ ।
ವಿದ್ಯಾಸಾಮ್ಯೇ ಕಥಮೇಷಾ ವ್ಯವಸ್ಥೇತ್ಯಾಶಂಕ್ಯಾಽಽಹ —
ಸಾಮರ್ಥ್ಯಾದಿತಿ ।
ಹೇತುಸಾಮ್ಯೇ ದಾಹಕತ್ವಾನುಪಪತ್ತೇಸ್ತತ್ಪ್ರಕರ್ಷವಾನಿತರಾಂದಹತೀತ್ಯರ್ಥಃ ।
ಪ್ರಸಿದ್ಧಂ ದಾಹಮಾದಾಯ ಚೋದಯತಿ —
ನನ್ವಿತಿ ।
ತಥಾ ಚ ತತ್ಪ್ರೇಪ್ಸಾಯೋಗಾತ್ತದುಪಾಸ್ತ್ಯಸಿದ್ಧಿರಿತ್ಯರ್ಥಃ ।
ವಿವಕ್ಷಿತಂ ದಾಹಂ ದರ್ಶಯನ್ನುತ್ತರಮಾಹ —
ನೈಷ ದೋಷ ಇತಿ ।
ತದೇವ ಸ್ಪಷ್ಟಯತಿ —
ಉತ್ಕೃಷ್ಟೇತಿ ।
ಪ್ರಾಪ್ನುವನ್ಭವತೀತಿ ಶೇಷಃ ।
ಔಪಚಾರಿಕಂ ದಾಹಂ ದೃಷ್ಟಾಂತೇನ ಸಾಧಯತಿ —
ಯಥೇತಿ ।
ಆಜಿರ್ಮರ್ಯಾದಾ ತಾಂ ಸರಂತಿ ಧಾವಂತೀತ್ಯಾಜಿಸೃತಸ್ತೇಷಾಮಿತಿ ಯಾವತ್ ॥೧॥