ಬ್ರಾಹ್ಮಣಾಂತರಮವತಾರ್ಯ ಪೂರ್ವೇಣ ಸಂಬಂಧಂ ವಕ್ತುಂ ವೃತ್ತಂ ಕೀರ್ತಯತಿ —
ಆತ್ಮೈವೇತ್ಯಾದಿನಾ ।
ಕೇವಲಪ್ರಾಣದರ್ಶನೇನ ಚ ಪ್ರಜಾಪತಿತ್ವಪ್ರಾಪ್ತಿರ್ವ್ಯಾಖ್ಯಾತೇತಿ ಸಂಬಂಧಃ ।
ಇದಾನೀಮಾತ್ಮೇತ್ಯಾದೇಸ್ತದ್ಧೇದಮಿತ್ಯತಃ ಪ್ರಾಕ್ತನಗ್ರಂಥಸ್ಯಾಽಽಪಾತತಸ್ತಾತ್ಪರ್ಯಮಾಹ —
ಪ್ರಜಾಪತೇರಿತಿ ।
ಆದಿಪದೇನ ಸರ್ವಾತ್ಮತ್ವಾದಿ ಗೃಹ್ಯತೇ ।
ಫಲೋತ್ಕರ್ಷೋಪವರ್ಣನಂ ಕುತ್ರೋಪಯುಜ್ಯತೇ ತತ್ರಾಽಽಹ —
ತೇನ ಚೇತಿ ।
ಕರ್ಮಕಾಂಡಪದೇನ ಪೂರ್ವಗ್ರಂಥೋಽಪಿ ಸಂಗೃಹೀತಃ ।
ಫಲಾತಿಶಯೋ ಹೇತ್ವತಿಶಯಾಪೇಕ್ಷೋಽನ್ಯಥಾಽಽಕಸ್ಮಿಕತ್ವಾಪಾತಾದತೋ ಜ್ಞಾನಕರ್ಮಫಲಭೂತಸೂತ್ರವಿಭೂತಿರುಚ್ಯಮಾನಾ ಜ್ಞಾನಕರ್ಮಣೋರ್ಮಹತ್ತ್ವಂ ದರ್ಶಯತೀತ್ಯಾಹ —
ಸಾಮರ್ಥ್ಯಾದಿತಿ ।
ಆಪಾತಿಕಂ ತಾತ್ಪರ್ಯಮುಕ್ತ್ವಾ ಪರಮತಾತ್ಪರ್ಯಮಾಹ —
ವಿವಕ್ಷಿತಂ ತ್ವಿತಿ ।
ಕಿಂಚ ವಿಮತಂ ಸಂಸಾರಾಂತರ್ಭೂತಂ ಕಾರ್ಯಕರಣಾತ್ಮತ್ವಾದಸ್ಮದಾದಿಕಾರ್ಯಕರಣವದಿತ್ಯಾಹ —
ಕಾರ್ಯೇತಿ ।
ಪ್ರಾಜಾಪತ್ಯಪದಸ್ಯ ಸಂಸಾರಾಂತರ್ಭೂತತ್ವೇ ಹೇತ್ವಂತರಮಾಹ —
ಸ್ಥೂಲೇತಿ ।
ಸ್ಥೂಲತ್ವಂ ಸಾಧಯತಿ —
ವ್ಯಕ್ತೇತಿ ।
ಅನಿತ್ಯತ್ವಾದ್ದೃಶ್ಯತ್ವಾಚ್ಚ ಪ್ರಜಾಪತಿತ್ವಂ ಸಂಸಾರಾಂತರ್ಗತಮಿತ್ಯಾಹ —
ಅನಿತ್ಯೇತಿ ।
ಇತಿಶಬ್ದೋ ವಿವಕ್ಷಿತಾರ್ಥಸಮಾಪ್ತ್ಯರ್ಥಃ ।
ಕಿಮಿತ್ಯೇತದ್ವಿವಕ್ಷಿತಮುಪವರ್ಣ್ಯತೇ ತತ್ರಾಽಽಹ —
ಬ್ರಹ್ಮವಿದ್ಯಾಯಾ ಇತಿ ।
ತಚ್ಚೇದಂ ವಿವಕ್ಷಿತಾರ್ಥವಚನಮೇಕಾಕಿನ್ಯಾ ವಿದ್ಯಾಯಾ ವಕ್ಷ್ಯಮಾಣಾಯಾ ಮುಕ್ತಿಹೇತುತ್ವಮಿತ್ಯುತ್ತರಾರ್ಥಮಿತಿ ದ್ರಷ್ಟವ್ಯಮ್ । ಯದಾ ಹಿ ಕರ್ಮಜ್ಞಾನಫಲಂ ಪ್ರಜಾಪತಿತ್ವಂ ಸಂಸಾರ ಇತ್ಯುಚ್ಯತೇ ತದಾ ತತ್ಪರ್ಯಂತಾತ್ಸರ್ವಸ್ಮಾತ್ತಸ್ಮಾದ್ವಿರಕ್ತಸ್ಯ ವಕ್ಷ್ಯಮಾಣವಿದ್ಯಾಯಾಮಧಿಕಾರಃ ಸೇತ್ಸ್ಯತೀತ್ಯರ್ಥಃ ।
ಅಥ ಯಸ್ಯ ಕಸ್ಯಚಿದರ್ಥಿತಾಮಾತ್ರೇಣ ತತ್ರಾಧಿಕಾರಸಂಭವಾದ್ವೈರಾಗ್ಯಂ ನ ಮೃಗ್ಯಮಿತ್ಯಾಶಂಕ್ಯಾಽಽಹ —
ನ ಹೀತಿ ।
ಉಭಯತ್ರಾಪಿ ವಿಷಯಶಬ್ದಃ ಪೂರ್ವೇಣ ಸಮಾನಾಧಿಕರಣಃ ।
ವಿವಕ್ಷಿತಮರ್ಥಮುಪಸಮ್ಹರತಿ —
ತಸ್ಮಾದಿತಿ ।
ವೈರಾಗ್ಯಮಂತರೇಣ ಜ್ಞಾನಾನಧಿಕಾರಾಜ್ಜ್ಞಾನಾದಿಫಲಸ್ಯ ಪ್ರಜಾಪತಿತ್ವಸ್ಯೋತ್ಕರ್ಷವತಃ ಸಂಸಾರತ್ವವಚನಂ ತತೋ ವಿರಕ್ತಸ್ಯ ವಕ್ಷ್ಯಮಾಣವಿದ್ಯಾಯಾಮಧಿಕಾರಾರ್ಥಮ್ ।
ವಿರಕ್ತಸ್ಯ ವಿದ್ಯಾಧಿಕಾರೇ ಮೋಕ್ಷಾದಪಿ ವೈರಾಗ್ಯಂ ಸ್ಯಾದಿತ್ಯಾಶಂಕ್ಯಾಽಽಹ —
ತಥಾ ಚೇತಿ ।
ನನು ಮೋಕ್ಷಾರ್ಥಂ ವಿದ್ಯಾಯಾಂ ಪ್ರವರ್ತಿತವ್ಯಂ ಮೋಕ್ಷಶ್ಚಾಪುರುಷಾರ್ಥತ್ವಾನ್ನ ಪ್ರೇಕ್ಷಾವತಾ ಪ್ರಾರ್ಥ್ಯತೇ ತತ್ರಾಽಽಹ —
ತದೇತದಿತಿ ।