ಅರ್ಥವಾದಸ್ಥಂ ಲಿಂಗಂ ನ ಪ್ರಕರಣಾದ್ಬಲವದಿತಿ ಮತ್ವಾ ಸಮಾಧತ್ತೇ —

ನೇತ್ಯಾದಿನಾ ।

ಸ್ತುತಿಮೇವ ಸ್ಪಷ್ಟಯತಿ —

ಸ್ವಸ್ಮಾದೇವೇತಿ ।

ಲೋಕಾಜ್ಜ್ಞಾತಾದಿತಿ ಶೇಷಃ ।

ಯಥಾ ಛಾಂದೋಗ್ಯೇ ಸ್ತುತ್ಯರ್ಥಮಾತ್ಮನಃ ಸ್ರಷ್ಟೃತ್ವಮುಚ್ಯತೇ ತಥಾಽತ್ರಾಪ್ಯಾತ್ಮಲೋಕಂ ಸ್ತೋತುಮೇತತ್ಫಲವಚನಮಿತ್ಯಾಹ —

ಆತ್ಮತ ಇತಿ ।

ಭವತು ವಾ ಮಾ ಭೂದಸ್ಮಾದ್ಧ್ಯೇವೇತ್ಯಾದಿರರ್ಥವಾದಸ್ತಥಾಽಪಿ ತಸ್ಯ ಸರ್ವಾತ್ಮತ್ವಪ್ರದರ್ಶನಾರ್ಥತ್ವಾದ್ಯುಕ್ತಮತ್ರ ಲೋಕಶಬ್ದೇನ ಪರಮಾತ್ಮಗ್ರಹಣಮಿತ್ಯಾಹ —

ಸರ್ವಾತ್ಮೇತಿ ।

ತಸ್ಮಾತ್ತತ್ಸರ್ವಮಭವದಿತಿ ವಾಕ್ಯಂ ದೃಷ್ಟಾಂತಯತಿ —

ಪೂರ್ವವದಿತಿ ।

ಕಿಂಚಾಽಽತ್ಮಶಬ್ದಸ್ಯ ತ್ರಿಧಾಪರಿಚ್ಛೇದಶೂನ್ಯಾರ್ಥವಾಚಿತಾಯಾ ಯಚ್ಚಾಽಽಪ್ನೋತೀತ್ಯಾದಿನ್ಯಾಯೇನ ಸಿದ್ಧತ್ವಾತ್ತತ್ಸಮಾನಾಧಿಕರಣಲೋಕಶಬ್ದಸ್ಯಾಪಿ ತದರ್ಥತ್ವಾತ್ಪರಸ್ಯೈವಾತ್ರ ಲೋಕತ್ವಮಿತ್ಯಾಹ —

ಯದಿ ಹೀತಿ ।

ಕಿಂಚ ಯದಿ ಲೋಕಶಬ್ದೇನ ಪರಂ ಹಿತ್ವಾಽರ್ಥಾಂತರಮುಚ್ಯತೇ ತದಾ ಸವಿಶೇಷಣಂ ವಾಕ್ಯಂ ಸ್ಯಾದನ್ಯಥಾ ಸ್ವಂ ಲೋಕಮಿತಿ ಪ್ರಕೃತಪರಮಾತ್ಮಲೋಕಸ್ಯ ತ್ವತ್ಪಕ್ಷೇಽಂತರೋಕ್ತಬ್ರಹ್ಮಲೋಕಸ್ಯ ಚ ವ್ಯಾವೃತ್ತ್ಯಯೋಗಾತ್ । ನ ಚಾತ್ರ ಸವಿಶೇಷಣಂ ವಾಕ್ಯಂ ದೃಷ್ಟಮತಃ ಸ್ವಂ ಲೋಕಮಿತಿ ಪ್ರಕೃತಃ ಪರಮಾತ್ಮೈವಾತ್ರಾಪಿ ಲೋಕ ಇತ್ಯಾಹ —

ಅನ್ಯಥೇತಿ ।

ವಿಶೇಷಣಂ ವಿನೈವಾಸ್ಮಾದಿತ್ಯತ್ರ ಪರಾಪರಾಭ್ಯಾಮರ್ಥಾಂತರಂ ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —

ನ ಹೀತಿ ।

ಸ್ವಂ ಲೋಕಮಿತಿ ಪ್ರಕೃತೇ ಪರಮಾತ್ಮನ್ಯಾತ್ಮಾನಮೇವೇತಿ ವಿಶೇಷಿತೇ ಚಾವ್ಯಾಕೃತಾಖ್ಯಾ ಪರಾಪರಾಭ್ಯಾಮಂತರಾಲಾವಸ್ಥಾ ನ ಪ್ರತಿಪತ್ತುಂ ಶಕ್ಯತೇ ತಸ್ಯಾಃ ಶ್ರುತತ್ವಾಭಾವಾದಿತ್ಯರ್ಥಃ ॥೧೫॥