ಅನಿರುಕ್ತಶ್ರುತೇರವಿಜ್ಞಾತರೂಪೋ ಯಸ್ಮಾತ್ಪ್ರಾಣಸ್ತಸ್ಮಾದವಿಜ್ಞಾತಂ ಸರ್ವಂ ಪ್ರಾಣಸ್ಯ ರೂಪಮಿತಿ ಯೋಜನಾ । ವಿಜ್ಞಾತಾದಿರೂಪಾತಿರೇಕೇಣ ಲೋಕವೇದಾದ್ಯಭಾವಾದ್ವಿಜ್ಞಾತಾದಿರೂಪಾಭಿಧಾನೇನೈವ ವಾಗಾದೀನಾಂ ಲೋಕಾದ್ಯಾತ್ಮತ್ವೇ ಸಿದ್ಧೇ ಕಿಮರ್ಥಂ ತ್ರಯೋ ಲೋಕಾ ಇತ್ಯಾದಿವಾಕ್ಯಮಿತ್ಯಾಶಂಕ್ಯ ತಥೈವ ಧ್ಯಾನಾರ್ಥಮಿತ್ಯಾಹ —

ವಿಜ್ಞಾತೇತಿ ।

ಭೂರಾದಿಷ್ವೇಕೈಕತ್ರ ವಿಜ್ಞಾತಾದಿದೃಷ್ಟೇರ್ವಾಗಾದೇಶ್ಚ ವ್ಯವಸ್ಥಿತತ್ವಾತ್ಕುತೋ ವಿಜ್ಞಾತಾದೇರ್ವಾಗಾದ್ಯಾತ್ಮಕತ್ವಂ ನಿಯಂತುಂ ಶಕ್ಯಮಿತ್ಯಾಶಂಕ್ಯಾಽಽಹ —

ಸರ್ವತ್ರೇತಿ ।

ಪ್ರಾಣವಿಭೂತಿವಿದಃ ಸಂಪತಿ ಫಲಂ ಕಥಯತಿ —

ಪ್ರಾಣ ಇತಿ ।

ಲೋಕೇ ವಿಜ್ಞಾತಸ್ಯೈವ ಭೋಜ್ಯತ್ವೋಪಲಂಭಾದವಿಜ್ಞಾತಾದಿರೂಪೇಣ ಪ್ರಾಣಾದೇರ್ನ ಭೋಜ್ಯತ್ವೋಪಪತ್ತಿರಿತ್ಯಾಶಂಕ್ಯಾಽಽಹ —

ಶಿಷ್ಯೇತಿ ।

ಶಿಷ್ಯೈರವಿವೇಕಿಭಿಃ ಸಂದಿಹ್ಯಮಾನೋಪಕಾರಾ ಅಪಿ ಗುರವಸ್ತೇಷಾಂ ಭೋಜ್ಯತಾಮಪದ್ಯಾಮಾನಾ ದೃಶ್ಯಂತೇ ಪುತ್ರಾದಿಭಿಶ್ಚಾತಿಬಾಲೈರವಿಜ್ಞಾತೋಪಕಾರಾಃ ಪಿತ್ರಾದಯಸ್ತೇಷಾಂ ಭೋಜ್ಯತ್ವಮಾಪದ್ಯಂತೇ ತಥಾ ಪ್ರಕೃತೇಽಪಿ ಸಂಭವತೀತ್ಯರ್ಥಃ ॥೧೦॥