ಅಥೈತಸ್ಯ ಪ್ರಕೃತಸ್ಯ ಪ್ರಾಜಾಪತ್ಯಾನ್ನಸ್ಯ ಪ್ರಾಣಸ್ಯ, ನ ಪ್ರಜೋಕ್ತಸ್ಯ ಅನಂತರನಿರ್ದಿಷ್ಟಸ್ಯ, ಆಪಃ ಶರೀರಂ ಕಾರ್ಯಂ ಕರಣಾಧಾರಃ ; ಪೂರ್ವವತ್ ಜ್ಯೋತೀರೂಪಮಸೌ ಚಂದ್ರಃ ; ತತ್ರ ಯಾವಾನೇವ ಪ್ರಾಣಃ ಯಾವತ್ಪರಿಮಾಣಃ ಅಧ್ಯಾತ್ಮಾದಿಭೇದೇಷು, ತಾವದ್ವ್ಯಾಪ್ತಿಮತ್ಯ ಆಪಃ ತಾವತ್ಪರಿಮಾಣಾಃ ; ತಾವಾನಸೌ ಚಂದ್ರ ಅಬಾಧೇಯಃ ತಾಸ್ವಪ್ಸ್ವನುಪ್ರವಿಷ್ಟಃ ಕರಣಭೂತಃ ಅಧ್ಯಾತ್ಮಮಧಿಭೂತಂ ಚ ತಾವದ್ವ್ಯಾಪ್ತಿಮಾನೇವ । ತಾನ್ಯೇತಾನಿ ಪಿತ್ರಾ ಪಾಂಕ್ತೇನ ಕರ್ಮಣಾ ಸೃಷ್ಟಾನಿ ತ್ರೀಣ್ಯನ್ನಾನಿ ವಾಙ್ಮನಃ ಪ್ರಾಣಾಖ್ಯಾನಿ ; ಅಧ್ಯಾತ್ಮಮಧಿಭೂತಂ ಚ ಜಗತ್ಸಮಸ್ತಮ್ ಏತೈರ್ವ್ಯಾಪ್ತಮ್ ; ನೈತೇಭ್ಯೋಽನ್ಯದತಿರಿಕ್ತಂ ಕಿಂಚಿದಸ್ತಿ ಕಾರ್ಯಾತ್ಮಕಂ ಕರಣಾತ್ಮಕಂ ವಾ । ಸಮಸ್ತಾನಿ ತ್ವೇತಾನಿ ಪ್ರಜಾಪತಿಃ ತ ಏತೇ ವಾಙ್ಮನಃಪ್ರಾಣಾಃ ಸರ್ವ ಏವ ಸಮಾಃ ತುಲ್ಯಾಃ ವ್ಯಾಪ್ತಿಮಂತಃ ಯಾವತ್ಪ್ರಾಣಿಗೋಚರಂ ಸಾಧ್ಯಾತ್ಮಾಧಿಭೂತಂ ವ್ಯಾಪ್ಯ ವ್ಯವಸ್ಥಿತಾಃ ; ಅತ ಏವಾನಂತಾ ಯಾವತ್ಸಂಸಾರಭಾವಿನೋ ಹಿ ತೇ । ನ ಹಿ ಕಾರ್ಯಕರಣಪ್ರತ್ಯಾಖ್ಯಾನೇನ ಸಂಸಾರೋಽವಗಮ್ಯತೇ ; ಕಾರ್ಯಕರಣಾತ್ಮಕಾ ಹಿ ತ ಇತ್ಯುಕ್ತಮ್ । ಸ ಯಃ ಕಶ್ಚಿತ್ ಹ ಏತಾನ್ ಪ್ರಜಾಪತೇರಾತ್ಮಭೂತಾನ್ ಅಂತವತಃ ಪರಿಚ್ಛಿನ್ನಾನ್ ಅಧ್ಯಾತ್ಮರೂಪೇಣ ವಾ ಅಧಿಭೂತರೂಪೇಣ ವಾ ಉಪಾಸ್ತೇ, ಸ ಚ ತದುಪಾಸನಾನುರೂಪಮೇವ ಫಲಮ್ ಅಂತವಂತಂ ಲೋಕಂ ಜಯತಿ, ಪರಿಚ್ಛಿನ್ನ ಏವ ಜಾಯತೇ, ನೈತೇಷಾಮಾತ್ಮಭೂತೋ ಭವತೀತ್ಯರ್ಥಃ । ಅಥ ಪುನಃ ಯಃ ಹ ಏತಾನನಂತಾನ್ ಸರ್ವಾತ್ಮಕಾನ್ ಸರ್ವಪ್ರಾಣ್ಯಾತ್ಮಭೂತಾನ್ ಅಪರಿಚ್ಛಿನ್ನಾನ್ ಉಪಾಸ್ತೇ, ಸೋಽನಂತಮೇವ ಲೋಕಂ ಜಯತಿ ॥