య ఎకః పురుషస్తమేవాహం బ్రహ్మోపాసే త్వం చేత్థముపాస్స్వేత్యుక్తే, మా మేత్యాదినా ప్రత్యువాచేత్యాహ —

ఇతి పూర్వవదితి ।

భానుమణ్డలతో ద్విగుణం చన్ద్రమణ్డలమితి ప్రసిద్ధిమాశ్రిత్యాఽఽహ —

మహానితి ।

కథం పాణ్డరం వాసశ్చన్ద్రాభిమానినః ప్రాణస్య సంభవతీత్యాశఙ్క్యాఽఽహ —

అప్శరీరత్వాదితి ।

పురుషో హి శరీరేణ వాససేవ వేష్టితో భవతి పాణ్డరత్వం చాపాం ప్రసిద్ధమాపో వాసః ప్రాణస్యేతి చ శ్రుతిరతో యుక్తం ప్రాణస్య పాణ్డరవాసస్త్వమిత్యర్థః ।

న కేవలం సోమశబ్దేన చన్ద్రమా గృహ్యతే కిన్తు లతాఽఽపి సమాననామధర్మత్వాదిత్యాహ —

యశ్చేతి ।

తం చన్ద్రమసం లతాత్మకం బుద్ధినిష్ఠం పురుషమేకీకృత్యాహఙ్గ్రహేణోపాస్తిరిత్యర్థః ।

సంప్రత్యుపాస్తిఫలమాహ —

యథోక్తేతి ।

యజ్ఞశబ్దేన ప్రకృతిరుక్తా । వికారశబ్దేన వికృతయో గృహ్యన్తే । యథోక్తోపాసకస్య ప్రకృతివికృత్యనుష్ఠానసామర్థ్యం లీలయా లభ్యమిత్యర్థః ।

అన్నాక్షయస్యోపాసనానుసారిత్వాదుపపన్నత్వమభిప్రేత్యోపాసకం విశినష్టి —

అన్నాత్మకేతి ॥౩॥