ಸ ಹೋವಾಚ ಗಾರ್ಗ್ಯೋ ಯ ಏವಾಯಂ ವಾಯೌ ಪುರುಷ ಏತಮೇವಾಹಂ ಬ್ರಹ್ಮೋಪಾಸ ಇತಿ ಸ ಹೋವಾಚಾಜಾತಶತ್ರುರ್ಮಾ ಮೈತಸ್ಮಿನ್ಸಂವದಿಷ್ಠಾ ಇಂದ್ರೋ ವೈಕುಂಠೋಽಪರಾಜಿತಾ ಸೇನೇತಿ ವಾ ಅಹಮೇತಮುಪಾಸ ಇತಿ ಸ ಯ ಏತಮೇವಮುಪಾಸ್ತೇ ಜಿಷ್ಣುರ್ಹಾಪರಾಜಿಷ್ಣುರ್ಭವತ್ಯನ್ಯತಸ್ತ್ಯಜಾಯೀ ॥ ೬ ॥
ತಥಾ ವಾಯೌ ಪ್ರಾಣೇ ಹೃದಿ ಚ ಏಕಾ ದೇವತಾ ; ತಸ್ಯಾ ವಿಶೇಷಣಮ್ — ಇಂದ್ರಃ ಪರಮೇಶ್ವರಃ, ವೈಕುಂಠಃ ಅಪ್ರಸಹ್ಯಃ, ನ ಪರೈರ್ಜಿತಪೂರ್ವಾ ಅಪರಾಜಿತಾ ಸೇನಾ — ಮರುತಾಂ ಗಣತ್ವಪ್ರಸಿದ್ಧೇಃ ; ಉಪಾಸನಫಲಮಪಿ — ಜಿಷ್ಣುರ್ಹ ಜಯನಶೀಲಃ ಅಪರಾಜಿಷ್ಣುಃ ನ ಚ ಪರೈರ್ಜಿತಸ್ವಭಾವಃ ಭವತಿ, ಅನ್ಯತಸ್ತ್ಯಜಾಯೀ ಅನ್ಯತಸ್ತ್ಯಾನಾಂ ಸಪತ್ನಾನಾಂ ಜಯನಶೀಲೋ ಭವತಿ ॥