ಸ ಹೋವಾಚ ಗಾರ್ಗ್ಯೋ ಯ ಏವಾಯಮಾತ್ಮನಿ ಪುರುಷ ಏತಮೇವಾಹಂ ಬ್ರಹ್ಮೋಪಾಸ ಇತಿ ಸ ಹೋವಾಚಾಜಾತಶತ್ರುರ್ಮಾ ಮೈತಸ್ಮಿನ್ಸಂವದಿಷ್ಠಾ ಆತ್ಮನ್ವೀತಿ ವಾ ಅಹಮೇತಮುಪಾಸ ಇತಿ ಸ ಯ ಏತಮೇವಮುಪಾಸ್ತ ಆತ್ಮನ್ವೀ ಹ ಭವತ್ಯಾತ್ಮನ್ವಿನೀ ಹಾಸ್ಯ ಪ್ರಜಾ ಭವತಿ ಸ ಹ ತೂಷ್ಣೀಮಾಸ ಗಾರ್ಗ್ಯಃ ॥ ೧೩ ॥
ಆತ್ಮನಿ ಪ್ರಜಾಪತೌ ಬುದ್ಧೌ ಚ ಹೃದಿ ಚ ಏಕಾ ದೇವತಾ ; ತಸ್ಯಾಃ ಆತ್ಮನ್ವೀ ಆತ್ಮವಾನಿತಿ ವಿಶೇಷಣಮ್ ; ಫಲಮ್ — ಆತ್ಮನ್ವೀ ಹ ಭವತಿ ಆತ್ಮವಾನ್ಭವತಿ, ಆತ್ಮನ್ವಿನೀ ಹಾಸ್ಯ ಪ್ರಜಾ ಭವತಿ, ಬುದ್ಧಿಬಹುಲತ್ವಾತ್ ಪ್ರಜಾಯಾಂ ಸಂಪಾದನಮಿತಿ ವಿಶೇಷಃ । ಸ್ವಯಂ ಪರಿಜ್ಞಾತತ್ವೇನ ಏವಂ ಕ್ರಮೇಣ ಪ್ರತ್ಯಾಖ್ಯಾತೇಷು ಬ್ರಹ್ಮಸು ಸ ಗಾರ್ಗ್ಯಃ ಕ್ಷೀಣಬ್ರಹ್ಮವಿಜ್ಞಾನಃ ಅಪ್ರತಿಭಾಸಮಾನೋತ್ತರಃ ತೂಷ್ಣೀಮವಾಕ್ಶಿರಾ ಆಸ ॥