యథోక్తాదేశస్యాభావపర్యవసాయిత్వం మన్వానః శఙ్కతే —
నన్వితి ।
నిరవధికనిషేధాసిద్ధేస్తదవధిత్వేన సత్యస్య సత్యం బ్రహ్మ నిర్దేష్టుమిష్టమితి పరిహరతి —
ఉచ్యత ఇతి ।
బ్రహ్మణో విధిముఖేన నిర్దేశే సంభావ్యమానే కిమితి నిషేధముఖేన తన్నిర్దిశ్యతే తత్రాఽఽహ —
యస్మిన్నితి ।
తద్విధిముఖేన నిర్దేష్టుమశక్యమితి శేషః ।
నామరూపాద్యభావేఽపి బ్రహ్మణి శబ్దప్రవృత్తిమాశఙ్క్యాఽఽహ —
తద్ద్వారేణేతి ।
జాత్యాదీనాన్యతమస్య బ్రహ్మణ్యపి సంభవత్తద్ద్వారా తత్ర శబ్దప్రవృత్తిః స్యాదితి చేన్నేత్యాహ —
న చేతి ।
ఉక్తమర్థం వైధర్మ్యదృష్టాన్తేన స్పష్టయతి —
గౌరితి ।
తథా జాత్యాద్యభావాన్న బ్రహ్మణి శబ్దప్రవృత్తిరితి శేషః ।
కథం తర్హి క్వచిద్విధిముఖేన బ్రహ్మోపదిశ్యతే తత్రాఽఽహ —
అధ్యారోపితేతి ।
విజ్ఞానానన్దాదివాక్యేషు శబలే గృహీతశక్తిభిః శబ్దైర్లక్ష్యతే బ్రహ్మేత్యర్థః ।
నను లక్షణాముపేక్ష్య సాక్షాదేవ బ్రహ్మ కిమితి న వివక్ష్యతే తత్రాఽఽహ —
యదా పునరితి ।
నిర్దేష్టుం లక్షణాముపేక్ష్య సాక్షాదేవ వక్తుమితి యావత్ । తత్ర శబ్దప్రవృత్తినిమిత్తానాం జాత్యాదీనామభావస్యోక్తత్వాదిత్యర్థః ।
విధిముఖేన నిర్దేశాసంభవే ఫలితమాహ —
తదేతి ।
ప్రాప్తో నిర్దేశో యస్య విశేషస్య తత్ప్రతిషేధముఖేనేతి యావత్ ।