సా ఎవముక్తా హ ఉవాచ — యత్ యది, ‘ను’ ఇతి వితర్కే, మే మమ ఇయం పృథివీ, భగోః భగవన్ , సర్వా సాగరపరిక్షిప్తా విత్తేన ధనేన పూర్ణా స్యాత్ ; కథమ్ ? న కథఞ్చనేత్యాక్షేపార్థః, ప్రశ్నార్థో వా, తేన పృథివీపూర్ణవిత్తసాధ్యేన కర్మణా అగ్నిహోత్రాదినా — అమృతా కిం స్యామితి వ్యవహితేన సమ్బన్ధః । ప్రత్యువాచ యాజ్ఞవల్క్యః — కథమితి యద్యాక్షేపార్థమ్ , అనుమోదనమ్ — నేతి హోవాచ యాజ్ఞవల్క్య ఇతి ; ప్రశ్నశ్చేత్ ప్రతివచనార్థమ్ ; నైవ స్యాః అమృతా, కిం తర్హి యథైవ లోకే ఉపకరణవతాం సాధనవతాం జీవితం సుఖోపాయభోగసమ్పన్నమ్ , తథైవ తద్వదేవ తవ జీవితం స్యాత్ ; అమృతత్వస్య తు న ఆశా మనసాపి అస్తి విత్తేన విత్తసాధ్యేన కర్మణేతి ॥