స హోవాచ యాజ్ఞవల్క్యః । ఎవం విత్తసాధ్యేఽమృతత్వసాధనే ప్రత్యాఖ్యాతే, యాజ్ఞవల్క్యః స్వాభిప్రాయసమ్పత్తౌ తుష్ట ఆహ — స హోవాచ — ప్రియా ఇష్టా, బతేత్యనుకమ్ప్యాహ, అరే మైత్రేయి, న అస్మాకం పూర్వమపి ప్రియా సతీ భవన్తీ ఇదానీం ప్రియమేవ చిత్తానుకూలం భాషసే । అతః ఎహి ఆస్స్వ ఉపవిశ వ్యాఖ్యాస్యామి — యత్ తే తవ ఇష్టమ్ అమృతత్వసాధనమాత్మజ్ఞానమ్ కథయిష్యామి । వ్యాచక్షాణస్య తు మే మమ వ్యాఖ్యానం కుర్వతః, నిదిధ్యాసస్వ వాక్యాని అర్థతో నిశ్చయేన ధ్యాతుమిచ్ఛేతి ॥