స యథా సైన్ధవఖిల్య ఇత్యాదేః సంబన్ధం వక్తుం వృత్తం కీర్తయతి —
తత్రేత్యాదినా ।
పూర్వః సన్దర్భస్తత్రేత్యుచ్యతే ।
ప్రతిజ్ఞాతేఽర్థే పూర్వోక్తం హేతుమనూద్య సాధ్యసిద్ధిం ఫలం దర్శయతి —
తస్మాదితి ।
ఉక్తహేతోర్యథోక్తం బ్రహ్మైవ సర్వమిదం జగదితి యత్ప్రతిజ్ఞాతమిదం సర్వం యదయమాత్మేతి తత్పూర్వోక్తదృష్టాన్తప్రబన్ధరూపతర్కవశాత్సాధితమితి యోజనా ।
ఉత్తరవాక్యస్య విషయపరిశేషార్థముక్తప్రలయే పౌరాణికసమ్మతిమాహ —
స్వాభావిక ఇతి ।
కార్యాణాం ప్రకృతావాశ్రితత్వం స్వాభావికత్వమ్ ।
ప్రలయాన్తరేఽపి తేషాం సమ్మతిం సంగిరతే —
యస్త్వితి ।
ద్వితీయప్రలయమధికృత్యానన్తరగ్రన్థమవతారయతి —
అవిద్యేతి ।
తత్రేత్యాత్యన్తికప్రలయోక్తిః ।