ಇದಂ ವೈ ತನ್ಮಧ್ವಿತಿ ಪೂರ್ವವತ್ । ಉಕ್ತೌ ದ್ವೌ ಮಂತ್ರೌ ಪ್ರವರ್ಗ್ಯಸಂಬಂಧ್ಯಾಖ್ಯಾಯಿಕೋಪಸಂಹರ್ತಾರೌ ; ದ್ವಯೋಃ ಪ್ರವರ್ಗ್ಯಕರ್ಮಾರ್ಥಯೋರಧ್ಯಾಯಯೋರರ್ಥ ಆಖ್ಯಾಯಿಕಾಭೂತಾಭ್ಯಾಂ ಮಂತ್ರಾಭ್ಯಾಂ ಪ್ರಕಾಶಿತಃ । ಬ್ರಹ್ಮವಿದ್ಯಾರ್ಥಯೋಸ್ತ್ವಧ್ಯಾಯಯೋರರ್ಥ ಉತ್ತರಾಭ್ಯಾಮೃಗ್ಭ್ಯಾಂ ಪ್ರಕಾಶಯಿತವ್ಯ ಇತ್ಯತಃ ಪ್ರವರ್ತತೇ । ಯತ್ ಕಕ್ಷ್ಯಂ ಚ ಮಧು ಉಕ್ತವಾನಾಥರ್ವಣೋ ಯುವಾಭ್ಯಾಮಿತ್ಯುಕ್ತಮ್ — ಕಿಂ ಪುನಸ್ತನ್ಮಧ್ವಿತ್ಯುಚ್ಯತೇ — ಪುರಶ್ಚಕ್ರೇ, ಪುರಃ ಪುರಾಣಿ ಶರೀರಾಣಿ — ಯತ ಇಯಮವ್ಯಾಕೃತವ್ಯಾಕರಣಪ್ರಕ್ರಿಯಾ — ಸ ಪರಮೇಶ್ವರೋ ನಾಮರೂಪೇ ಅವ್ಯಾಕೃತೇ ವ್ಯಾಕುರ್ವಾಣಃ ಪ್ರಥಮಂ ಭೂರಾದೀನ್ ಲೋಕಾನ್ಸೃಷ್ಟ್ವಾ, ಚಕ್ರೇ ಕೃತವಾನ್ , ದ್ವಿಪದಃ ದ್ವಿಪಾದುಪಲಕ್ಷಿತಾನಿ ಮನುಷ್ಯಶರೀರಾಣಿ ಪಕ್ಷಿಶರೀರಾಣಿ ; ತಥಾ ಪುರಃ ಶರೀರಾಣಿ ಚಕ್ರೇ ಚತುಷ್ಪದಃ ಚತುಷ್ಪಾದುಪಲಕ್ಷಿತಾನಿ ಪಶುಶರೀರಾಣಿ ; ಪುರಃ ಪುರಸ್ತಾತ್ , ಸ ಈಶ್ವರಃ ಪಕ್ಷೀ ಲಿಂಗಶರೀರಂ ಭೂತ್ವಾ ಪುರಃ ಶರೀರಾಣಿ — ಪುರುಷ ಆವಿಶದಿತ್ಯಸ್ಯಾರ್ಥಮಾಚಷ್ಟೇ ಶ್ರುತಿಃ — ಸ ವಾ ಅಯಂ ಪುರುಷಃ ಸರ್ವಾಸು ಪೂರ್ಷು ಸರ್ವಶರೀರೇಷು ಪುರಿಶಯಃ, ಪುರಿ ಶೇತ ಇತಿ ಪುರಿಶಯಃ ಸನ್ ಪುರುಷ ಇತ್ಯುಚ್ಯತೇ ; ನ ಏನೇನ ಅನೇನ ಕಿಂಚನ ಕಿಂಚಿದಪಿ ಅನಾವೃತಮ್ ಅನಾಚ್ಛಾದಿತಮ್ ; ತಥಾ ನ ಏನೇನ ಕಿಂಚನಾಸಂವೃತಮ್ ಅಂತರನನುಪ್ರವೇಶಿತಮ್ — ಬಾಹ್ಯಭೂತೇನಾಂತರ್ಭೂತೇನ ಚ ನ ಅನಾವೃತಮ್ ; ಏವಂ ಸ ಏವ ನಾಮರೂಪಾತ್ಮನಾ ಅಂತರ್ಬಹಿರ್ಭಾವೇನ ಕಾರ್ಯಕರಣರೂಪೇಣ ವ್ಯವಸ್ಥಿತಃ ; ಪುರಶ್ಚಕ್ರೇ ಇತ್ಯಾದಿಮಂತ್ರಃ ಸಂಕ್ಷೇಪತ ಆತ್ಮೈಕತ್ವಮಾಚಷ್ಟ ಇತ್ಯರ್ಥಃ ॥