पूर्ववदित्यभिमुखीकरणायेत्यर्थः । प्रतिवचनमुपादत्ते —

स्तोत्रिया वेति ।

प्रगीतमृग्जातं स्तोत्रमप्रगीतं शस्त्रम् ।

कतमास्तास्तिस्र इत्यादेस्तात्पर्यमाह —

ताश्चेति ।

प्रश्नान्तरं वृत्तमनूद्योपादत्ते —

तत्रेति ।

यज्ञाधिकारः सप्तम्यर्थः ।

पुरोनुवाक्यादिना लोकत्रयजयलक्षणं फलं केन सामान्येनेत्यपेक्षायां संख्याविशेषेणेत्युक्तं स्मारयति —

तदिति ।

अधियज्ञे त्रयमुक्तं स्मारयित्वाऽध्यात्मविशेषं दर्शयितुमुत्तरो ग्रन्थ इत्याह —

उच्यत इति ।

प्राणादौ पुरोनुवाक्यादौ च पृथिव्यादिलोकदृष्टिरिति प्रश्नपूर्वकमाह —

कतमा इति ।

अपाने याज्यादृष्टौ हेत्वन्तरमाह —

अपानेन हीति ।

हस्ताद्यादानव्यापारेणेति यावत् ।

प्राणापानव्यापारव्यतिरेकेण शस्त्रप्रयोगस्य श्रुत्यन्तरे सिद्धत्वाद्व्याने शस्यादृष्टिरित्याह —

अप्राणन्निति ।

तत्र पुरोनुवाक्यादिषु चेति यावत् । इहेत्यनन्तरवाक्योक्तिः । सर्वमन्यदिति संख्यासामान्योक्तिः ।

किं तद्विशेषसंबन्धसामान्यं तदाह —

लोकेति ।

पृथिवीलक्षणेन लोकेन सह प्रथमत्वेन संबन्धसामान्यं पुरोनुवाक्यायामस्ति तेन तया पृथिवीलोकमेव प्राप्नोतीत्यर्थः । अश्वलस्य तूष्णीभावं भजतोऽभिप्रायमाह । नायमिति ॥१०॥