ప్రాణా నోత్క్రామన్తీతి విశేషణమాశ్రిత్య ప్రశ్నాన్తరమాదత్తే —
ముక్తస్యేతి ।
పక్షద్వయేఽపి ప్రయోజనం కథయతి —
అథేత్యాదినా ।
యత్పుత్రక్షేత్రాద్యభూత్తదధునా నామమాత్రావశేషమిత్యుక్తే నావశిష్టం కిఞ్చిదితి యథాఽవగమ్యతే తథాఽత్రాపి నామమాత్రం మ్రియమాణాం విద్వాంసం న జహాతీత్యుక్తే న కిఞ్చిదవశిష్టమితి దృష్టిః స్యాదితి ప్రత్యుక్తితాత్పర్యమాహ —
సర్వమితి ।
యథాశ్రుతమర్థమాశ్రిత్య ప్రత్యుక్తిం వ్యాచష్టే —
నామమాత్రం త్వితి ।
విదుషో నామనిత్యత్వే హేత్వన్తరముత్తరవాక్యావష్టమ్భేన దర్శయతి —
నిత్యం హీతి ।
అనన్తశబ్దాన్నామ్నో వ్యక్తిప్రాచుర్యే ప్రతిభాతి కుతో నిత్యతేత్యాశఙ్క్యాఽఽహ —
నిత్యత్వమేవేతి ।
వ్యక్తిభేదస్య ప్రసిద్ధత్వాన్న తద్వక్తవ్యం బ్రహ్మవిదః స్వదృష్ట్యా నామాపి న శిష్యతే పరదృష్ట్యా తదవశేషోక్తిః శుకో ముక్త ఇత్యాదివ్యపదేశదర్శనాదతో నామనిత్యత్వం వ్యావహారికమితి భావః ।
బ్రహ్మాస్మీతి దర్శనేన విశ్వాన్దేవానాత్మత్వేనోపగమ్యానన్తం లోకం జయతీతి సిద్ధానువాదో బ్రహ్మవిద్యాం స్తోతుమిత్యభిప్రేత్యానన్తరవాక్యమాదత్తే —
తదానన్త్యేతి ।
తద్వ్యాచష్టే —
తన్నామానన్త్యేతి ॥ ౧౨ ॥