ಕಿಮೇನಮಿತ್ಯಾದಿವಾಕ್ಯಸ್ಯ ಸ್ವವ್ಯಾಖ್ಯಾಮುಕ್ತ್ವಾ ಯತ್ರೇತ್ಯಾದೇಸ್ತಾತ್ಪರ್ಯಂ ಚೋಕ್ತಮ್ । ಇದಾನೀಂ ಭರ್ತೃಪ್ರಪಂಚಪ್ರಸ್ಥಾನಮುತ್ಥಾಪಯತಿ —

ಅತ್ರೇತಿ ।

ಕಿಮೇನಮಿತ್ಯಾದಾವಿತಿ ಯಾವತ್ ।

ಸಮುಚ್ಚಯಾನುಷ್ಠಾನಾದ್ದೇಹಯೋಃ ಸಪ್ರಯೋಜಕಯೋರ್ನಾಶೇಽಪಿ ಪುಂಸೋ ಮುಕ್ತಿರ್ನ ಚೇತ್ತರ್ಹಿ ತಸ್ಯ ಬದ್ಧತ್ವಾಯೋಗಾತ್ಕಾಮಸೌ ದಶಾಮವಲಂಬತಾಮಿತ್ಯಾಶಂಕ್ಯಾಽಽಹ —

ನಾಮಾವಶಿಷ್ಟ ಇತಿ ।

ಕ್ಷಿತೇರೂಷರವದವಸ್ಥಿತಾತ್ಮಾವಿದ್ಯಯಾ ಪರಸ್ಮಾತ್ಪರಿಚ್ಛಿನ್ನಶ್ಚೇದಾತ್ಮಾ ತರ್ಹಿ ಬಂಧಪಕ್ಷಸ್ಯೈವ ಸ್ಯಾನ್ನತು ಭೋಜ್ಯಾಜ್ಜಗತೋ ವ್ಯಾವೃತ್ತಿರಿತ್ಯಾಶಂಕ್ಯಾಽಽಹ —

ಉಚ್ಛಿನ್ನೇತಿ ।

ಸರ್ವಸ್ಯ ಕರ್ಮಾದಿಫಲಸ್ಯ ಸೂತ್ರಾತ್ಮನಃ ಸಮುಚ್ಚಯಾಸಾದಿತಸ್ಯ ಭೋಗಾದಪ್ರಾಪ್ತಾರ್ಥಾಭಾವಾತ್ಕಾಮಾಸಿದ್ಧ್ಯಾ ಕರ್ಮಾಭಾವಾತ್ಪ್ರಯೋಜಕರಾಶೇರುಚ್ಛಿತ್ತಿರಿತ್ಯರ್ಥಃ ।

ಕಿಮೇನಮಿತ್ಯಾದಾವಂತರಾಲಾವಸ್ಥಸ್ಯ ವಿದ್ಯಾಧಿಕಾರಿಣೋ ನಿರ್ಧಾರಣಾತ್ತದಪೇಕ್ಷಿತವಿದ್ಯಾಶೇಷತ್ವೇನೋಷಸ್ತಪ್ರಶ್ನಾದೇರಾರಂಭಂ ಸಂಭಾವಯತಿ —

ತಸ್ಯೇತಿ ।

ಇತಿಶಬ್ದೋ ವರ್ಣಯಂತೀತ್ಯನೇನ ಸಂಬಧ್ಯತೇ ।

ತರ್ಹಿ ಯತ್ರೋಷಸ್ತಪ್ರಶ್ನಾದೌ ಬ್ರಹ್ಮವಿದ್ಯೋಚ್ಯತೇ ತಸ್ಯೈವಾಽಽರಂಭೋ ಯುಕ್ತೋ ಯತ್ರಾಸ್ಯೇತ್ಯಾದಿಸ್ತು ವೃಥೇತ್ಯಾಶಂಕ್ಯ ಫಲವದ್ವಿದ್ಯಾಪ್ರಾಪ್ತಿಶೇಷತ್ವೇನ ನಿವರ್ತ್ಯಮೃತ್ಯುಪ್ರಯೋಜಕನಿರ್ಧಾರಣಾರ್ಥೋ ಯತ್ರೇತ್ಯಾದಿರಿತ್ಯಭಿಪ್ರೇತ್ಯಾಽಽಹ —

ಏವಮಿತಿ ।