வித்³யாஸஹிதமபி கர்ம ஸம்ஸாரப²லம் வித்³யைவ மோக்ஷார்தே²திஸ்வபக்ஷஶுத்³த்⁴யர்த²ம் விசாரந்பூர்வபக்ஷயதி —
யத்த்விதி ।
யதா² கேவலம் விஷத³த்⁴யாதி³ மரணஜ்வராதி³கரமபி மந்த்ரஶர்கராதி³யுக்தம் ஜீவநபுஷ்ட்யாத்³யாரப⁴தே ததா² ஸ்வதோ ப³ந்த⁴ப²லமபி கர்ம ப²லாபி⁴லாஷமந்தரேணாநுஷ்டி²தம் வித்³யாஸமுச்சிதம் மோக்ஷாய க்ஷமமித்யர்த²: ।
முக்தே: ஸாத்⁴யத்வாங்கீ³காரே ஸமுச்சிதகர்மஸாத்⁴யத்வம் ஸ்யாந்ந து தஸ்யா: ஸாத்⁴யத்வம் தீ⁴மாத்ராயத்தத்வாதி³த்யுத்தரமாஹ —
தந்நேதி ।
ஹேதுமேவ ஸாத⁴யதி —
ப³ந்த⁴நேதி ।
கிம் தத்³ப³ந்த⁴நம் ததா³ஹ —
ப³ந்த⁴நம் சேதி ।
அவித்³யாநாஶோ(அ)பி கர்மாரப்⁴யோ ப⁴விஷ்யதீதி சேந்நேத்யாஹ —
அவித்³யாயாஶ்சேதி ।
மோக்ஷோ ந கர்மஸாத்⁴யோ(அ)வித்³யாஸ்தமயத்வாத்³ராஜ்ஜ்வவித்³யாஸ்தமயவதி³த்யர்த²: ।
தத்ரைவ ஹேத்வந்தரமாஹ —
த்³ருஷ்டவிஷயத்வச்சேதி ।
ந கர்மஸாத்⁴யா முக்திரிதி ஶேஷ: ।
ததே³வ ஸ்பஷ்டயதி —
உத்பத்தீதி ।
உக்தமேவ கர்மஸாமர்த்²யவிஷயமந்வயவ்யதிரேகாப்⁴யாம் ஸாத⁴யதி —
உத்பாத³யிதுமிதி ।
அபஸித்³த்⁴வத்வாதி³தி ச்சே²த³: ।
உத்பத்த்யாதீ³நாமந்யதமத்வாந்மோக்ஷஸ்யாபி கர்மஸாமர்த்²யவிஷயதா ஸ்யாதி³தி சேந்நேத்யாஹ —
ந சேதி ।
நித்யத்வாதா³த்மத்வாத்கூடஸ்த²த்வாந்நித்யஶுத்³த⁴த்வாந்நிர்கு³ணத்வாச்சேத்யர்த²: ।
ஆத்மபூ⁴தோ யதோ²க்தோ மோக்ஷஸ்தர்ஹி கிமிதி ஸர்வேஷாம் ந ப்ரத²த இத்யாஶங்க்யா(அ)(அ)ஹ —
அவித்³யேதி ।
உக்தம் கர்மஸாமர்த்²யம் பூர்வவாத்³யங்கீ³கரோதி —
பா³ட⁴மிதி ।
அங்கீ³காரமேவ ஸ்போ²ரயதி —
ப⁴வத்விதி ।
ஏவம்ஸ்வபா⁴வதோத்பாத³நாதௌ³ ஸமர்த²தா ।
கா தர்ஹி விப்ரதிபத்திஸ்தத்ரா(அ)(அ)ஹ —
வித்³யாஸம்யுக்தஸ்யேதி ।
அந்யதா² ஸ்வபா⁴வஶ்சதுர்வித⁴க்ரியாப²லவிலக்ஷணே(அ)பி மோக்ஷோ ஸமர்த²தேதி யாவத் ।
உத்பத்த்யாதௌ³ ஸமர்த²ஸ்ய கர்மணோ வித்³யாஸம்யுக்தஸ்ய தத்³விலக்ஷணே(அ)பி மோக்ஷே ஸாமர்த்²யமஸ்தீத்யத்ர த்³ருஷ்டாந்தமாஹ —
த்³ருஷ்டம் ஹீதி ।
உக்தத்³ருஷ்டாந்தவஶாத்கர்மணோ(அ)பி கேவலஸ்ய ஸம்ஸாரப²லஸ்ய வித்³யாஸம்யோகா³ந்முக்திப²லத்வமபி ஸ்யாதி³த்யாஹ —
ததே²தி ।
ஸமாத⁴த்தே —
நேத்யாதி³நா ।
அதீந்த்³ரியத்வாத்கர்மணோ முக்திஸாத⁴நத்வே ப்ரத்யக்ஷாத்³யஸம்ப⁴வே(அ)ப்யர்தா²பத்திரஸ்தீதி ஶங்கதே —
நந்விதி ।
நித்யேஷு கர்மஸு மோக்ஷாதிரிக்தஸ்ய ப²லஸ்ய ஶ்ருதஸ்யாபா⁴வே ஸதி தது³பலப்⁴யமாநசோத³நாயா மோக்ஷப²லத்வம் விநா(அ)நுபபத்திஸ்தேஷாம் தத்ஸாத⁴நத்வே மாநமித்யர்த²: ।
நநு ‘விஶ்வஜிதா யஜேதே' த்யத்ர யாக³கர்தவ்யதாரூபோ நியோகோ³(அ)வக³ம்யதே தஸ்ய நியோஜ்யஸாபேக்ஷத்வாத் ‘ஸ ஸ்வர்க³: ஸ்யாத்ஸர்வாந்ப்ரத்யவிஶிஷ்டத்வாதி³’ தி ந்யாயேந ஸ்வர்க³காமோ நியோஜ்யோ(அ)ங்கீ³க்ருதஸ்ததா² நித்யேஷ்வபி கர்மஸு ப⁴விஷ்யதி ஸ்வர்கோ³ நியோஜ்யவிஶேஷணமத ஆஹ —
ந ஹீதி ।
ஜீவஞ்ஜுஹுயாதி³தி ஜீவநவிஶிஷ்டஸ்ய நியோஜ்யஸ்ய லாபா⁴ந்ந நித்யேஷு ஸ்வர்கோ³ நியோஜ்யவிஶஷணமித்யர்த²: ।
நநு ஜீவநவிஶிஷ்டோ(அ)பி ப²லாபா⁴வே ந நியோஜ்ய: ஸ்யாத்ததா² ச கர்மணா பித்ருலோக இதி ஶ்ருதம் ப²லம் தேஷு கல்பயிஷ்யதே நேத்யாஹ —
நாபீதி ।
நித்யவிதி⁴ப்ரகரணே பித்ருலோகவாக்யஸ்யாஶ்ரவணாதி³த்யர்த²: ।
தர்ஹி ப²லாபா⁴வாச்சோத³நைவ மா பூ⁴தி³தி சேந்நேத்யாஹ —
சோத்³யந்தே சேதி ।
ததா²(அ)பி ப²லாந்தரம் கல்ப்யதாமித்யாஶங்க்ய கல்பகாபா⁴வாந்மைவமித்யபி⁴ப்ரேத்யா(அ)(அ)ஹ —
பாரிஶேஷ்யாதி³தி ।
முக்தேர்யத்கல்பகம் ததே³வ ப²லாந்தரஸ்யாபி கிம் ந ஸ்யாதி³த்யாஶங்க்ய தஸ்ய நிரதிஶயப²லவிஷயத்வாந்முக்திகல்பகத்வமேவேத்யபி⁴ப்ரேத்யா(அ)(அ)ஹ —
அந்யதே²தி ।
அநுபபத்த்யா சேந்நியோஜ்யலாபா⁴ய நித்யேஷு ப²லம் கல்ப்யதே கத²ம் தர்ஹி விஶ்வஜிந்ந்யாயோ ந ப்ராப்நோதீதி ஸித்³தா⁴ந்தீ ப்ரத்யாஹ —
நந்விதி ।
உக்தமேவ விவ்ருணோதி —
மோக்ஷே வேதி ।
அகல்பிதே ஸதீதி ச்சே²த³: । ஶ்ருதார்தா²பத்த்யா விதே⁴: ஶ்ருதஸ்ய ப்ரவர்தகத்வாநுபபத்த்யேதி யாவத் ।
விஶ்வஜிதீவ நித்யேஷு மோக்ஷே ப²லே கல்ப்யமாநே ஸதி ப²லிதமாஹ —
நந்வேவமிதி ।
கத²மித்யுக்தாமநுபபத்திமேவ ஸ்பு²டயதி —
ப²லம் சேதி ।
ப²லகல்பநாயாம் விஶ்வஜிந்ந்யாயோ(அ)வதரதி மோக்ஷஸ்து ஸ்வரூபஸ்தி²தித்வேநாநுத்பாத்³யத்வாத்ப²லமேவ ந ப⁴வதீதி ஶங்கதே —
மோக்ஷ இதி ।
நிக்³ரஹமுத்³பா⁴வயந்நுத்தரமாஹ —
நேதி ।
ப்ரதிஜ்ஞாஹாநிம் ப்ரகடயதி —
கர்மேத்யாதி³நா ।
கர்மகார்யத்வம் முக்தேருபேத்யோக்தம் ததே³வாயுக்தமித்யாஹ —
கர்மகார்யத்வே சேதி ।
ப²லத்வே(அ)பி கர்மகார்யத்வம் ந முக்தேரஸ்தீத்யுக்தம் தோ³ஷம் பரிஹர்தும் சோத³யதி —
அதே²தி ।
ப்ரதிஜ்ஞாவிரோதே⁴ந ப்ரதிவித⁴த்தே —
நித்யாநாமிதி ।
ப²லத்வமங்கீ³க்ருத்ய கார்யத்வே(அ)நங்கீ³க்ருதே கத²ம் வ்யாகா⁴த இத்யாஶங்க்யா(அ)(அ)ஹ —
ந சேதி ।
விஶேஷோ(அ)ர்த²க³த இதி ஶேஷ: ।
ப²லத்வமங்கீ³க்ருத்ய கார்யத்வாநங்கீ³காரே வ்யாகா⁴தமுக்த்வா வைபரீத்யே(அ)பி தம் வ்யுத்பாத³யதி —
அப²லம் சேதி ।
ஆத்³யம் வ்யாகா⁴தம் த்³ருஷ்டாந்தேந ஸ்பஷ்டயதி —
நித்யாநாமிதி ।
த்³ருஷ்டாந்தேந வ்யாகா⁴தம் பரிஹரந்நாஶங்கதே —
ஜ்ஞாநவதி³தி சேதி³தி ।
ததே³வ ஸ்பு²டயதி —
யதே²தி ।
த்³ருஷ்டாந்தம் விக⁴டயதி —
நேதி ।
ஜ்ஞாநஸ்ய மோக்ஷவ்யவதி⁴பூ⁴தாஜ்ஞாநநிவர்தகத்வாந்மோக்ஷஸ்தேநாக்ரியமாணோ(அ)பி தத்கார்யமிதி வ்யபதே³ஶபா⁴க்³ப⁴வதீத்யர்த²: ।
ததே³வ ஸ்பு²டயதி —
அஜ்ஞாநேதி ।
தா³ர்ஷ்டாந்திகம் நிராசஷ்டே —
ந த்விதி ।
யத்கர்மணா நிவர்த்யேத தந்மோக்ஷஸ்ய வ்யவதா⁴நாந்தரம் கல்பயிதும் ந து ஶக்யமிதி ஸம்ப³ந்த⁴: ।
வ்யவதா⁴நத்⁴வம்ஸே கர்மணோ(அ)ப்ரவேஶே(அ)பி முக்தாவேவ தத்ப்ரவேஶ: ஸ்யாதி³தி சேந்நேத்யாஹ —
நித்யத்வாதி³தி ।
நித்யகர்மநிவர்த்யம் வ்யவதா⁴நாந்தரம் மா பூ⁴த³ஜ்ஞாநமேவ தந்நிவர்த்யம் ப⁴விஷ்யதி ததா² ச மோக்ஷஸ்ய கர்மகார்யத்வம் ஶக்யமுபசரிதுமிதி ஶங்கதே —
அஜ்ஞாநமேவேதி ।
கர்மணோ ஜ்ஞாநாத்³விலக்ஷணத்வாந்நாஜ்ஞாநநிவர்தகத்வமித்யுத்தரமாஹ —
ந விலக்ஷணத்வாதி³தி ।
வைலக்ஷண்யமேவ ப்ரகடயதி —
அநபி⁴வ்யக்திரிதி ।
இதஶ்ச ஜ்ஞாநநிவர்த்யமேவாஜ்ஞாநமித்யாஹ —
யதீ³தி ।
அந்யதமேந நித்யாதி³நா வ்யஸ்தேந வா ஶ்ரௌதேந ஸ்மார்தேந வேத்யர்த²: । கர்மாஜ்ஞாநயோரவிரோதோ⁴ ஹேத்வர்த²: ।
அஜ்ஞாநநிவர்தகத்வம் கர்மணோ நாந்வயவ்யதிரேகஸித்³த⁴ம் கிந்த்வத்³ருஷ்டமேவ கல்ப்யமிதி ஶங்கதே —
அதே²தி ।
த்³ருஷ்டே ஸத்யத்³ருஷ்டகல்பநா ந ந்யாய்யேதி பரிஹரதி —
ந ஜ்ஞாநேநேதி ।
உக்தமர்த²ம் த்³ருஷ்டாந்தேந பு³த்³தா⁴வாரோபயதி —
யதே²த்யாதி³நா ।
அத்³ருஷ்டேதி ச்சே²த³: ।
அஸ்து ஜ்ஞாநாத³ஜ்ஞாநத்⁴வஸ்தி: கிந்து கர்மஸமுச்சிதாதி³த்யாஶங்க்யா(அ)(அ)ஹ —
ஜ்ஞாநேநேதி ।
நநு கர்மபி⁴ரவிருத்³த⁴மபி ஹிரண்யக³ர்பா⁴தி³விஜ்ஞாநமஸ்தி ததா² ச ஸமுச்சிதம் ஜ்ஞாநமஜ்ஞாநத்⁴வம்ஸி ப⁴விஷ்யதி நேத்யாஹ —
யத³விருத்³த⁴மிதி ।
நித்யாநாம் கர்மணாம் ஸமுச்சிதாநாமஸமுச்சிதாநாம் ச ஸ்வரூபஸ்தி²தௌ மோக்ஷே தத்ப்ரதிப³ந்த⁴காஜ்ஞாநத்⁴வஸ்தௌ வா நாத்³ருஷ்டம் ஸாமர்த்²யம் கல்ப்யமித்யுக்தமிதா³நீம் தத்கல்பநாமங்கீ³க்ருத்யாபி தூ³ஷயதி —
கிஞ்சேதி ।
கர்மணாம் நாஸ்தி மோக்ஷே ஸாமர்த்²யமித்யேதது³க்தாதே³வ காரணாந்ந ப⁴வதி । கிந்த்வந்யச்ச காரணம் தத்ராஸ்தீத்யர்த²: ।
ததே³வ த³ர்ஶயிதும் விசாரயதி —
கல்ப்யே சேதி ।
விரோத⁴மபி⁴நயதி —
த்³ரவ்யேதி ।
கார்யத்வாபா⁴வம் ஸமர்த²யதே —
யஸ்மிந்நிதி ।
பக்ஷாந்தரமாஹ —
கிம்வேதி ।
ஸாமர்த்²யவிஷயம் விஶத³யதி —
யச்சேதி ।
கத²மிஹ நிர்ணயஸ்தத்ரா(அ)(அ)ஹ —
புருஷேதி ।
கல்பயிதவ்யம் ப²லமிதி ஸம்ப³ந்த⁴: । உத்பத்த்யாதீ³நாமந்யதமோ ஹி கர்மபி⁴ரவிருத்³தோ⁴ விஷய: । தத்ரைவ நித்யகர்மசோத³நாநுபபத்தேருபஶாந்தத்வாந்நித்யகர்மப²லத்வேந மோக்ஷஸ்தத்³வ்யவதா⁴நாஜ்ஞாநநிவ்ருத்திர்வா ந ஶக்யதே கல்பயிதும் । கர்மாஜ்ஞாநயோர்விரோதா⁴பா⁴வாத்³ருஷ்டம் ஸாமர்த்²யம் யஸ்மிந்நுத்பத்த்யாதௌ³ தத்³விஷயத்வாச்ச கர்மணஸ்தத்³விலக்ஷணே மோக்ஷே ந வ்யாபார: । ததா² ச நித்யகர்மவிதி⁴வஶாத்புருஷப்ரவ்ருத்திஸம்பாத³நாய ப²லம் சேத்கல்பயிதவ்யம் தர்ஹி தது³த்பத்த்யாதீ³நாமந்யதமமேவ தத³விருத்³த⁴ம் கல்ப்யமித்யர்த²: । இதிஶப்³த³: ஶ்ருதார்தா²பத்திபரிஹாரஸமாப்த்யர்த²: ।
மோக்ஷ ஏவ நித்யாநாம் கர்மணாம் ப²லத்வேந கல்பயிதவ்ய: பாரிஶஷ்யந்யாயாதி³தி ஶங்கதே —
பாரிஶேஷ்யேதி ।
பாரிஶேஷ்யந்யாயமேவ விஶத³யதி —
ஸர்வேஷாமிதி ।
ஸர்வம் ஸ்வர்க³பஶுபுத்ராதீ³தி யாவத் ।
ததா²(அ)பி மோக்ஷாத³ந்யதே³வ நித்யகர்மப²லம் கிம் ந ஸ்யாத்தத்ரா(அ)(அ)ஹ —
ந சேதி ।
மோக்ஷஸ்யாபீதரகர்மப²லநிவேஶமாஶங்க்யா(அ)(அ)ஹ —
பரிஶிஷ்டஶ்சேதி ।
தஸ்ய ப²லத்வமேவ கத²ம் ஸித்³த⁴ம் தத்ரா(அ)(அ)ஹ —
ஸ சேதி ।
பரிஶஷாயாதமர்த²ம் நிக³மயதி —
தஸ்மாதி³தி ।
பாரிஶேஷ்யாஸித்³த்⁴யா தூ³ஷயதி —
நேதி ।
கர்மப²லவ்யக்த்யாநந்த்யமுக்தம் வ்யநக்தி —
ந ஹீதி ।
ப²லவத்ப²லஸாத⁴நாநாம் ப²லவிஷயேச்சா²நாம் சா(அ)(அ)நந்த்யம் கத²யதி —
தத்ஸாத⁴நாநாமிதி ।
ததா³நந்த்யே ஹேதுமாஹ —
அநியதேதி ।
இச்சா²த்³யாநந்த்யே ஹேத்வந்தரமாஹ —
புருஷேதி ।
ஏதாவத்வம் நாம நாஸ்தீத்யுப⁴யத்ர ஸம்ப³ந்த⁴: । புருஷஸ்யேஷ்டம் ப²லம் ஶோப⁴நாத்⁴யாஸவிஷயபூ⁴தம் தத்ர விஷயிணாம் ஶோப⁴நாத்⁴யாஸேந ப்ரயுக்தத்வாதி³தி ஹேத்வர்த²: ।
இச்சா²த்³யாநந்த்யம் ப்ராணிபே⁴தே³ஷு த³ர்ஶயித்வா ததா³நந்த்யமேகைகஸ்மிந்நபி ப்ராணிநி த³ர்ஶயதி —
ப்ரதிப்ராணி சேதி ।
இச்சா²த்³யாநந்த்யே ப²லிதமாஹ —
ததா³நந்த்யாச்சேதி ।
ஸாத⁴நாதி³ஷ்வேதாவத்த்வாஜ்ஞாநே(அ)பி கிம் ஸ்யாத்ததா³ஹ —
அஜ்ஞாதே சேதி ।
இதிஶப்³த³: பாரிஶேஷ்யாநுபபத்திஸமாப்த்யர்த²: ।
ப்ரகாராந்தரேண பாரிஶேஷ்யம் ஶங்கதே —
கர்மேதி ।
தாமேவ ஶங்காம் விஶத³யதி —
ஸத்யபீதி ।
ததா²(அ)பி கத²ம் மோக்ஷஸ்ய பரிஶிஷ்டத்வம் ததா³ஹ —
மோக்ஷஸ்த்விதி ।
பரிஶேஷப²லமாஹ —
தஸ்மாதி³தி ।
ஶங்கிதம் பரிஶேஷம் தூ³ஷயதி —
நேத்யாதி³நா ।
அர்தா²பத்திபரிஶேஷௌ பராக்ருத்யார்தா²பத்திபராகரணம் ப்ரபஞ்சயிதும் ப்ரஸ்தௌதி —
தஸ்மாதி³தி ।
அந்யதா²(அ)ப்யுபபத்திம் ப்ரகடயதி —
உத்பத்தீதி ।
நித்யாநாமுத்பத்த்யாதி³ப²லத்வே(அ)பி மோக்ஷஸ்ய தத்ப²லத்வம் ஸித்⁴யதீதி ஶங்கதே —
சதுர்ணாமிதி ।
தத்ர மோக்ஷஸ்யோத்பாத்³யத்வம் தூ³ஷயதி —
ந தாவதி³தி ।
உப⁴யத்ராத:ஶப்³தோ³ நித்யத்வபராமர்ஶீ ।
அஸம்ஸ்கார்யத்வே ஹேத்வந்தரமாஹ —
அஸாத⁴நேதி ।
ததே³வ வ்யக்திரேகமுகே²ந விவ்ருணோதி —
ஸாத⁴நாத்மகம் ஹீதி ।
இதஶ்ச மோக்ஷஸ்யாஸம்ஸ்க்ரியமாணத்வமித்யாஹ —
ந சேதி ।
யதா² யூபஸ்தக்ஷணாஷ்டாஶ்ரீகரணாப்⁴யஞ்ஜநாதி³நா ஸம்ஸ்க்ரியதே யதா² சா(அ)(அ)ஹவநீய: ஸம்ஸ்காரேண நிஷ்பாத்³யதே ந ததா² மோக்ஷோ நித்யஶுத்³த⁴த்வாந்நிர்கு³ணத்வாச்சேத்யர்த²: ।
பக்ஷாந்தரமநுபா⁴ஷ்ய த³ஷயதி —
பாரிஶேஷ்யாதி³த்யாதி³நா ।
ஏகத்வம் பூர்ணத்வம் ।
ஸாத⁴நவைலக்ஷண்யம் ப²லவைலக்ஷண்யம் கல்பயதீதி ஶங்கதே —
இதரைரிதி ।
ஹேதுவைலக்ஷண்யாஸித்³தௌ⁴ கல்பகாபா⁴வாத்ப²லவைலக்ஷண்யாஸித்³தி⁴ரிதி தூ³ஷயதி —
ந கர்மத்வேதி ।
நிமித்தக்ருதஹேதுவைலக்ஷண்யவஶாத்ப²லவைலக்ஷண்யஸித்³தி⁴ரிதி ஶங்கதே —
நிமித்தேதி ।
நிமித்தவைலக்ஷண்யம் ப²லவைலக்ஷண்யஸ்யாநிமித்தமிதி பரிஹரதி —
ந க்ஷாமவத்யாதி³பி⁴ரிதி ।
ததே³வ ப்ரபஞ்சயதி —
யதா² ஹீதி ।
யஸ்யா(அ)(அ)ஹிதாக்³நேரக்³நிர்க்³ருஹாந்த³ஹேத³க்³நயே க்ஷாமவதே புரோடா³ஶமஷ்டாகபாலம் நிர்வபேதி³த்யத்ர த³ஹேதி³தி விதி⁴விப⁴க்த்யா ப்ரஸித்³தா⁴ர்த²யச்ச²ப்³தோ³பஹிதயா க்³ருஹதா³ஹாக்²யநிமித்தபராமர்ஶேநாக்³நயே க்ஷாமவதே புரோடா³ஶமித்யாதி³நா க்ஷாமவதீ விதீ⁴யதே । யஸ்யோப⁴யம் ஹவிரார்திமார்ச்சே²த்ஸ ஐந்த்³ரம் பஞ்சஶராவமோத³நம் நிர்வபேதி³த்யத்ர சா(அ)(அ)ர்ச்சே²தி³தி விதி⁴விப⁴க்த்யா நிர்வபேதி³தி விதா⁴ஸ்யமாநநிர்வாபநிமித்தம் ஹவிரார்திமநூத்³ய நிர்வாபோ விதீ⁴யதே । பி⁴ந்நே ஜுஹோதி ஸ்கந்நே ஜுஹோத்யத² யஸ்ய புரோடா³ஶௌ க்ஷீயதஸ்தம் யஜ்ஞம் வருணோ க்³ருஹ்ணாதி யதா³ தத்³த⁴விஸ்ஸந்திஷ்டே²தாத² ததே³வ ஹவிர்நிர்வபேத்³யஜ்ஞோ ஹி யஜ்ஞஸ்ய ப்ராயஶ்சித்தமிதி ச பே⁴த³நாதி³நிமித்தம் ப்ராயஶ்சித்தமுக்தம் ந ச தந்முக்திப²லம் ததா² நிமித்தபே⁴தே³(அ)பி ந நித்யம் கர்ம முக்திப²லமித்யர்த²: ।
க்ஷாமவத்யாதி³துல்யத்வம் நித்யகர்மணாம் குதோ லப்³த⁴மித்யாஶங்க்யா(அ)(அ)ஹ —
தைஶ்சேதி ।
க்ஷாமவத்யாதி³பி⁴ரிதி யாவத் । அவிஶேஷே ஹேதுர்நைமித்திகத்வேநேதி ।
ததே³வ கத²மிதி சேத்தத்ரா(அ)(அ)ஹ —
ஜீவநாதீ³தி ।
தா³ர்ஷ்டாந்திகம் ஸ்பஷ்டயதி —
ததே²தி ।
நித்யம் கர்ம கர்மாந்தராத்³விலக்ஷணமபி ந மோக்ஷப²லமித்யத்ர த்³ருஷ்டாந்தமாஹ —
ஆலோகஸ்யேதி ।
சக்ஷுரந்தரைருலூகாதி³சக்ஷுஷோ வைலக்ஷண்யே(அ)பி ந ரஸாதி³விஷயத்வமித்யத்ர ஹேதுமாஹ —
ரஸாதீ³தி ।
வைலக்ஷண்யம் தர்ஹி குத்ரோபயுஜ்யதே தத்ரா(அ)(அ)ஹ —
ஸுதூ³ரமபீதி ।
மநுஷ்யாந்விஹாயோலூகாதௌ³ க³த்வா(அ)பீதி யாவத் । யத்³விஷயே ரூபாதா³வித்யர்த²: । விஶேஷோ தூ³ரஸூக்ஷ்மாதி³ரதிஶய: ।
தா³ர்ஷ்டாந்திகம் பூர்வவாதா³நுவாத³பூர்வகமாசஷ்டே —
யத்புநரித்யாதி³நா ।
தத்தத்ரேதி யாவத் । ததே³வ வ்ருணோதி —
நிரபி⁴ஸந்தே⁴ரிதி ।
வித்³யாஸம்யுக்தம் கர்ம விஶஷ்டகார்யகரமித்யத்ர ஶதபத²ஶ்ருதிம் ப்ரமாணயதி —
தே³வயாஜீதி ।
ததா³ஹுரித்யுபக்ரம்ய தே³வயாஜிந: ஶ்ரேயாநித்யாதௌ³ காம்யகர்துர்தே³வயாஜிந: ஸகாஶாதா³த்மஶுத்³த்⁴யர்த²ம் கர்ம குர்வந்நாத்மயாஜீ ஶ்ரேயாநித்யாத்மயாஜிநோ விஶேஷஶ்ரவணாத்ஸர்வக்ரதுயாஜிநாமாத்மயாஜீ விஶிஷ்யத இதி ஸ்ம்ருதேஶ்ச விஶிஷ்டஸ்ய கர்மணோ விஶிஷ்டகார்யாரம்ப⁴கத்வமவிருத்³த⁴மித்யர்த²: ।
சா²ந்தோ³க்³யே(அ)பி வித்³யாஸம்யுக்தஸ்ய கர்மணோ விஶிஷ்டகார்யாரம்ப⁴கத்வம் த்³ருஷ்டமித்யாஹ —
யதே³வேதி ।
நந்வாத்மயாஜிஶப்³தோ³ நித்யகர்மாநுஷ்டா²யிவிஷயோ ந ப⁴வதி ।
’ஸர்வபூ⁴தேஷு சா(அ)(அ)த்மாநம் ஸர்வபூ⁴தாநி சா(அ)(அ)த்மநி ।
ஸம்பஶ்யந்நாத்மயாஜீ வை ஸ்வாராஜ்யமதி⁴க³ச்ச²தி’
இத்யத்ர பரமாத்மத³ர்ஶநவிஷயே தஸ்ய ப்ரயுக்தத்வாத³த ஆஹ —
யஸ்த்விதி ।
யதி³ ஸமம்பஶ்யந்ப⁴வேத்ததா³ பரேணா(அ)(அ)த்மநைகீபூ⁴த: ஸ்வராட்³ப⁴வதீத்யாத்மஜ்ஞாநஸ்துதிரத்ர விவக்ஷிதா । மஹதீ ஹீயம் ப்³ரஹ்மவித்³யா யத்³ப்³ரஹ்மவிதே³வா(அ)(அ)த்மயாஜீ ப⁴வதி । நஹி தஸ்ய தத³நுஷ்டா²நம் ப்ருத²க³பேக்ஷதே । ப்³ரஹ்மவித்புண்யக்ருதி³தி ச வக்ஷ்யதீத்யர்த²: ।
பரத³ர்ஶநவத்யாத்மயாஜிஶப்³த³ஸ்ய க³த்யந்தரமாஹ —
அத² வேதி ।
பூ⁴தா யா பூர்வஸ்தி²திஸ்தாமபேக்ஷ்யா(அ)(அ)த்மயாஜிஶப்³தோ³ விது³ஷீத்யர்த²: ।
ததே³வ ப்ரபஞ்சயதி —
ஆத்மேதி ।
தேஷாம் தத்ஸம்ஸ்காரார்த²த்வே ப்ரமாணமாஹ —
இத³மிதி ।
தத்ரைவ ஸ்ம்ருதிம் ப்ரமாணயதி —
ததே²தி ।
க³ர்ப⁴ஸம்ப³ந்தி⁴பி⁴ர்ஹோமைர்மௌஞ்ஜீநிப³ந்த⁴நாதி³பி⁴ஶ்ச பை³ஜிகமேவைந: ஶமயதீத்யஸ்மிந்ப்ரகரணே நித்யகர்மணாம் ஸம்ஸ்காரார்த²த்வம் நிஶ்சிதமித்யர்த²: ।
ஸம்ஸ்காரோ(அ)பி குத்ரோபயுஜ்யதே தத்ரா(அ)(அ)ஹ —
ஸம்ஸ்க்ருதஶ்சேதி ।
யோ ஹி நித்யகர்மாநுஷ்டா²யீ ஸ தத³நுஷ்டா²நஜநிதாபூர்வவஶாத்பரிஶுத்³த⁴பு³த்³தி⁴: ஸம்யக்³தீ⁴யோக்³யோ ப⁴வதி । ‘மஹாயஜ்ஞைஶ்ச யஜ்ஞைஶ்ச ப்³ராஹ்மீயம் க்ரியதே தநு:’(ம.ஸ்ம்ரு. 2। 28) இதி ஸ்ம்ருதேரித்யர்த²: ।
கதா³ புநரேஷா ஸம்யக்³தீ⁴ருத்பத்³யதே தத்ரா(அ)(அ)ஹ —
தஸ்யேதி ।
உத்பந்நஸ்ய ஸம்யக்³ஜ்ஞாநஸ்ய ப²லமாஹ ।
ஸமமிதி ।
கத²ம் புந: ஸம்யக்³ஜ்ஞாநவத்யாத்மயாஜிஶப்³த³ இத்யாஶங்க்ய பூர்வோக்தம் ஸ்மாரயதி —
ஆத்மேதி ।
கிமிதீஹ பூ⁴தபூர்வக³திராஶ்ரிதேதி தத்ரா(அ)(அ)ஹ —
ஜ்ஞாநயுக்தாநாமிதி ।
ஐஹிகைராமுஷ்மிகைர்வா கர்மபி⁴: ஶுத்³த⁴பு³த்³தே⁴: ஶ்ரவணாதி³வஶாதை³க்யஜ்ஞாநம் முக்திப²லமுதே³தி । கர்ம து வித்³யாஸம்யுக்தமபி ஸம்ஸாரப²லமேவேதி பா⁴வ: ।
தத்ரைவ ஹேத்வந்தரமாஹ —
கிஞ்சேதி ।
வித்³யாயுக்தமபி கர்ம ப³ந்தா⁴யைவேத்யத்ர ந கேவலமுக்தமேவ காரணம் கிந்த்வந்யச்ச தது³பபாத³கமஸ்தீத்யர்த²: ।
ததே³வ த³ர்ஶயதி —
ப்³ரஹ்மேதி ।
ஸாத்த்விகீம் ஸத்த்வகு³ணப்ரஸூதஜ்ஞாநஸமுச்சிதகர்மப²லபூ⁴தமிதி யாவத் । அத்ர ஹி வித்³யாயுக்தமபி கர்ம ஸம்ஸாரப²லமேவேதி ஸூச்யதே ।
‘ஏஷ ஸர்வ: ஸமுத்³தி³ஷ்டஸ்த்ரிப்ரகாரஸ்ய கர்மண: ।
த்ரிவித⁴ஸ்த்ரிவித⁴: கர்மஸம்ஸார: ஸார்வபௌ⁴திக:’(ம.ஸ்ம்ரு. 12। 51)
இத்யுபஸம்ஹாராதி³தி சகாரார்த²: ।
கிஞ்ச ।
‘ப்ரவ்ருத்தம் கர்ம ஸம்ஸேவ்ய தே³வாநாமேதி ஸார்ஷ்டிதாம்’(ம.ஸ்ம்ரு. 12। 90)
இதி கர்மப²லபூ⁴ததே³வதாஸத்³ருஶைஶ்வர்யப்ராப்திமுக்த்வா தத³திரேகேண
‘நிவ்ருத்தம் ஸேவமாநஸ்து பூ⁴தாந்யத்யேதி பஞ்ச வை’(ம.ஸ்ம்ரு. 12। 90)
இதி பூ⁴தேஷ்வப்யயவசநாந்ந ஸமுச்சயஸ்ய முக்திப²லதேத்யாஹ —
தே³வஸார்ஷ்டீதி ।
‘நிவ்ருத்தம் ஸேவமாநஸ்து பூ⁴தாந்யப்யேதி பஞ்ச வை’ இதி பாடா²ந்முக்திரேவ ஸமுச்சயாநுஷ்டா²நாத்³விவக்ஷிதேதி சேந்நேத்யாஹ —
பூ⁴தாநீதி ।
ஜ்ஞாநமேவ முக்திஹேதுரிதி ப்ரதிபாத³கோபநிஷத்³விரோதா⁴ந்நாயம் பாட²: ஸாதீ⁴யாநித்யர்த²: ।
நநு விக்³ரஹவதீ தே³வதைவ நாஸ்தி மந்த்ரமயீ ஹி ஸா தே³வதாஶப்³த³ப்ரத்யயாலம்ப³நமதோ ப்³ரஹ்மா விஶ்வஸ்ருஜ இத்யாதே³ரர்த²வாத³த்வாந்ந தத்³ப³லேந நித்யகர்மணாம் முக்திஸாத⁴நத்வம் நிராகர்தும் ஶக்யமத ஆஹ —
ந சேதி ।
ஜ்ஞாநார்த²ஸ்ய ஸம்பஶ்யந்நாத்மயாஜீத்யாதே³ரிதி ஶேஷ: ।
கிஞ்ச “அகுர்வந்விஹிதம் கர்ம நிந்தி³தம் ச ஸமாசரந் ।
ப்ரஸஜ்ஜம்ஶ்சேந்த்³ரியார்தே²ஷு நர: பதநம்ருச்ச²தி ।(யா.ஸ்ம்ரு.3-219)
ஶரீரஜை: கர்மதோ³ஷைர்யாதி ஸ்தா²வரதாம் நர: ।
வாசிகை: பக்ஷிம்ருக³தாம் மாநஸைரந்த்யஜாதிதாம் ।
ஶ்வஸூகரக²ரோஷ்ட்ராணாம் கோ³ஜாவிம்ருக³பக்ஷிணாம் ।
சண்டா³லபுல்கஸாநாம் ச ப்³ரஹ்மஹா யோநிம்ருச்ச²தி” இத்யாதி³வாக்யை: ப்ரதிபாதி³தப²லாநாம் ப்ரத்யக்ஷேணாபி த³ர்ஶநாத்³யதா² தத்ர நாபூ⁴தார்த²வாத³த்வம் ததா² யதோ²க்தாத்⁴யாயஸ்யாபி நாபூ⁴தார்த²வாத³தேத்யாஹ —
விஹிதேதி ।
கிஞ்ச வங்கா³தி³தே³ஶே ச²ர்தி³தாஶ்யாதி³ப்ரேதாநாம் ப்ரத்யக்ஷத்வாத³த்⁴யயநரஹிதாநாமபி ஸ்த்ரீஶூத்³ராதீ³நாம் வேதோ³ச்சாரணத³ர்ஶநேந ப்³ரஹ்மக்³ரஹஸத்³பா⁴வாவக³மாச்ச ந ப்³ரஹ்மாதி³வாக்யஸ்யார்த²வாத³தேத்யாஹ —
வாந்தேதி ।
நநு ஸ்தா²வராதீ³நாம் ஶ்ரௌதஸ்மார்தகர்மப²லத்வாபா⁴வாந்ந தத்³த³ர்ஶநேந வசநாநாம் பூ⁴தார்த²த்வம் ஶக்யம் கல்பயிதுமத ஆஹ —
ந சேதி ।
ஸேவாதி³த்³ருஷ்டகாரணஸாம்யே(அ)பி ப²லவைஷம்யோபலம்பா⁴த³வஶ்யமதீந்த்³ரியம் காரணம் வாச்யம் । ந ச தத்ர ஶ்ருதிஸ்ம்ருதீ விஹாயாந்யந்மாநமஸ்தி । ததா² ச ஶ்ரௌதஸ்மார்தகர்மக்ருதாந்யேவ ஸ்தா²வராதீ³நி ப²லாநீத்யர்த²: ।
ஸம்நிஹிதாஸம்நிஹிதேஷு ஸ்தா²வராதி³ஷு ப்ரத்யக்ஷாநுமாநயோர்த²யாயோக³ம் ப்ரவ்ருத்திருந்நேயா । ஸ்தா²வராணாம் ஜீவஶூந்யத்வாத³கர்மப²லத்வமிதி கேசித்தாந்ப்ரத்யாஹ —
ந சைஷாமிதி ।
அஸ்மதா³தி³வதே³வ வ்ருக்ஷாதீ³நாம் வ்ருத்³த்⁴யாதி³த³ர்ஶநாத்ஸஜீவத்வப்ரஸித்³தே⁴ஸ்தஸ்மாத்பஶ்யந்தி பாத³பா இத்யாதி³ப்ரயோகா³ச்ச தேஷாம் கர்மப²லத்வஸித்³தி⁴ரித்யர்த²: ।
ஸ்தா²வராதீ³நாம் கர்மப²லத்வே ஸித்³தே⁴ ப²லிதமாஹ —
தஸ்மாதி³தி ।
ப்³ரஹ்மாதீ³நாம் புண்யகர்மப²லத்வே(அ)பி ப்ரக்ருதே கிம் ஸ்யாத்ததா³ஹ —
தஸ்மாதி³தி ।
கர்மவிபாகப்ரகரணஸ்யாபூ⁴தார்த²வாத³த்வாபா⁴வே த்³ருஷ்டாந்தே(அ)பி தந்ந ஸ்யாதி³தி ஶங்கதே —
தத்ராபீதி ।
அங்கீ³கரோதி —
ப⁴வத்விதி ।
கத²ம் தர்ஹி வைத⁴ர்ம்யத்³ருஷ்டாந்தஸித்³தி⁴ரத ஆஹ —
ந சேதி ।
வைத⁴ர்ம்யத்³ருஷ்டாந்தாபா⁴வமாத்ரேண கர்மவிபாகாத்⁴யாயஸ்ய நாபூ⁴தார்த²வாத³தேத்யஸ்ய ந்யாயஸ்ய நைவ பா³த⁴: ஸாத⁴ர்ம்யத்³ருஷ்டாந்தாத³பி தத்ஸித்³தே⁴ரித்யர்த²: ।
நநு ‘ப்ரஜாபதிராத்மநோ வபாமுத³கி²த³த்’ இத்யாதீ³நாமபூ⁴தார்த²வாத³த்வாபா⁴வே கத²மர்த²வாதா³தி⁴கரணம் க⁴டிஷ்யதே தத்ரா(அ)(அ)ஹ —
ந சேதி ।
தத³க⁴டநாயாமபி நாஸ்மாத்பக்ஷக்ஷதிஸ்தவைவ தத³பூ⁴தார்த²வாத³த்வம் த்யஜதஸ்தத்³விரோதா⁴தி³த்யர்த²: ।
நநு கர்மவிபாகப்ரகரணஸ்யார்த²வாத³த்வாபா⁴வே(அ)பி ப்³ரஹ்மாதீ³நாம் காம்யகர்மப²லத்வாந்ந ஜ்ஞாநஸம்யுக்தநித்யகர்மப²லத்வம் ததோ மோக்ஷ ஏவ தத்ப²லமித்யத ஆஹ —
ந சேதி ।
தேஷாம் காம்யாநாம் கர்மணாமிதி யாவத் । தே³வஸார்ஷ்டிதாயா தே³வைரிந்த்³ராதி³பி⁴ஸ்ஸமாநைஶ்வர்யப்ராப்தேரித்யர்த²: । உக்தத்வாத் ‘ப்ரவ்ருத்தம் கர்ம ஸம்ஸேவ்ய தே³வாநாமேதி ஸார்ஷ்டிதாம்’ இத்யத்ரேதி ஶேஷ: ।
நநு வித்³யாஸம்யுக்தாநாம் நித்யாநாம் கர்மாணாம் ப²லம் ப்³ரஹ்மாதி³பா⁴வஶ்சேத்கத²ம் தாநி ஜ்ஞாநோத்பத்த்யர்தா²ந்யாஸ்தீ²யந்தே தத்ரா(அ)(அ)ஹ —
தஸ்மாதி³தி ।
கர்மணாம் முக்திப²லத்வாபா⁴வஸ்தச்ச²ப்³தா³ர்த²: । ஸாபி⁴ஸந்தீ⁴நாம் தே³வதாபா⁴வே ப²லே(அ)நுராக³வதாமிதி யாவத் । நித்யாநி கர்மாணி ஶ்ரௌதாநி ஸ்மார்தாநி சாக்³நிஹோத்ரஸந்த்⁴யோபாஸநப்ரப்⁴ருதீநி நிரபி⁴ஸந்தீ⁴நி ப²லாபி⁴லாஷவிகலாநி பரமேஶ்வரார்பணபு³த்³த்⁴யா க்ரியமாணாநி । ஆத்மஶப்³தோ³ மநோவிஷய: ।
கர்மணாம் சித்தஶுத்³தி⁴த்³வாரா ஜ்ஞாநோத்பத்த்யர்த²த்வே ப்ரமாணமாஹ —
ப்³ராஹ்மீதி ।
கத²ம் தர்ஹி கர்மணாம் மோக்ஷஸாத⁴நத்வம் கேசிதா³சக்ஷதே தத்ரா(அ)(அ)ஹ —
தேஷாமிதி ।
ஸம்ஸ்க்ருதபு³த்³தீ⁴நாமிதி யாவத் ।
கர்மணாம் பரம்பரயா மோக்ஷஸாத⁴நத்வம் கத²ம் ஸித்³த⁴வது³ச்யதே தத்ரா(அ)(அ)ஹ —
யதா² சேதி ।
அயமர்த²ஸ்ததே²தி ஶேஷ: ।
நிரஸ்தமப்யதி⁴கவிவக்ஷயா புநரநுவத³தி —
யத்த்விதி ।
விஷாதே³ர்மந்த்ராதி³ஸஹிதஸ்ய ஜீவநாதி³ஹேதுத்வம் ப்ரத்யக்ஷாதி³ஸித்³த⁴மதோ த்³ருஷ்டாந்தே கார்யாரம்ப⁴கத்வே விரோதோ⁴ நாஸ்தீத்யாஹ —
தத்ரேதி ।
கர்மணோ வித்³யாஸம்யுக்தஸ்ய கார்யாந்தராரம்ப⁴கத்வலக்ஷணோ(அ)ர்த²: ஶப்³தே³நைவ க³ம்யதே ।
ந ச தத்ர மாநாந்தரமஸ்தி । ந ச ஸமுச்சிதஸ்ய கர்மணோ மோக்ஷாரம்ப⁴கத்வப்ரதிபாத³கம் வாக்யமுபலப்⁴யதே தத³பா⁴வே கர்மணி வித்³யாயுக்தே(அ)பி விஷத³த்⁴யாதி³ஸாத⁴ர்ம்யம் கல்பயிதும் ந ஶக்யமித்யாஹ —
யஸ்த்விதி ।
கர்மஸாத்⁴யத்வே ச மோக்ஷஸ்யாநித்யதா ஸ்யாதி³தி பா⁴வ: ।
‘அபாம ஸோமமம்ருதா அபூ⁴ம’ இத்யாதி³ஶ்ருதேர்மோக்ஷஸ்ய கர்மஸாத்⁴யஸ்யாபி நித்யத்வமிதி சேந்நேத்யாஹ —
ந சேதி ।
யத்க்ருதம் தத³நித்யமித்யநுமாநாநுக்³ருஹீதம் தத்³யதே²ஹேத்யாதி³வாக்யம் தத்³விரோதே⁴நார்த²வாத³ஶ்ருதே: ஸ்வார்தே²(அ)ப்ராமாண்யமித்யர்த²: ।
ப்ரமாணாந்தரவிருத்³தே⁴(அ)ர்தே² ப்ராமாண்யம் ஶ்ருதேர்நோச்யதே சேத³த்³வைதஶ்ருதேரபி கத²ம் ப்ரத்யக்ஷாதி³விருத்³தே⁴ ஸ்வார்தே² ப்ராமாண்யமித்யாஶங்க்யா(அ)(அ)ஹ —
ஶ்ருதே த்விதி ।
தத்த்வமஸ்யாதி³வாக்யஸ்ய ஷட்³வித⁴தாத்பர்யலிங்கை³ஸ்ஸத³த்³வைதபரத்வே நிர்தா⁴ரிதே ஸத்³பே⁴த³விஷயஸ்ய ப்ரத்யக்ஷாதே³ராபா⁴ஸத்வம் ப⁴வதீத்யர்த²: ।
ததே³வ த்³ருஷ்டாந்தேந ஸாத⁴யதி —
யதே²த்யாதி³நா ।
யத³விவேகிநாம் யதோ²க்தம் ப்ரத்யக்ஷம் தத்³யத்³யபி ப்ரத²மபா⁴வித்வேந ப்ரப³லம் நிஶ்சிதார்த²ம் ச ததா²(அ)பி தஸ்மிந்நேவா(அ)(அ)காஶாதௌ³ விஷயே ப்ரவ்ருத்தஸ்யா(அ)(அ)ப்தவாக்யாதே³ர்மாநாந்தரஸ்ய யதா²ர்த²த்வே ஸதி தத்³விருத்³த⁴ம் பூர்வோக்தமவிவேகிப்ரத்யக்ஷமப்யாபா⁴ஸீப⁴வதி । ததே²த³ம் த்³வைதவிஷயம் ப்ரத்யக்ஷாத்³யத்³வைதாக³மவிரோதே⁴ ப⁴வத்யாபா⁴ஸ இத்யர்த²: ।
நநு தாத்பர்யம் நாம புருஷஸ்ய மநோத⁴ர்மஸ்தத்³வஶாச்சேத³த்³வைதஶ்ருதேர்யதா²ர்த²த்வம் தர்ஹி ப்ரதிபுருஷமந்யதை²வ தாத்பர்யத³ர்ஶநாத்தத்³வஶாத³ந்யதை²வ ஶ்ருத்யர்த²: ஸ்யாதி³த்யாஶங்க்ய தா³ர்ஷ்டாந்திகம் நிக³மயந்நுத்தரமாஹ —
தஸ்மாதி³த்யாதி³நா ।
தாத³ர்த்²யமர்த²பரத்வம் ததா²த்வம் யாதா²ர்த்²யம் ஶப்³த³த⁴ர்மஸ்தாத்பர்யம் தச்ச ஷட்³வித⁴லிங்க³க³ம்யம் ததா² ச ஶப்³த³ஸ்ய புருஷாபி⁴ப்ராயவஶாந்நாந்யதா²ர்த²த்வமித்யர்த²: ।
உக்தமர்த²ம் த்³ருஷ்டாந்தேந ஸ்பஷ்டயதி —
ந ஹீதி ।
விசாரார்த²முபஸம்ஹரதி —
தஸ்மாதி³தி ।
வித்³யாஸம்யுக்தஸ்யாபி கர்மணோ மோக்ஷாரம்ப⁴கத்வாஸம்ப⁴வஸ்தச்ச²ப்³தா³ர்த²: ।
மா பூ⁴த்கர்மணாம் மோக்ஷார்த²த்வம் கிம் தாவதேத்யாஶங்க்ய ப்³ராஹ்மணாரம்ப⁴ம் நிக³மயதி —
அத இதி ।