ಅಥ ಹ ವಾಚಕ್ನವ್ಯುವಾಚ । ಪೂರ್ವಂ ಯಾಜ್ಞವಲ್ಕ್ಯೇನ ನಿಷಿದ್ಧಾ ಮೂರ್ಧಪಾತಭಯಾದುಪರತಾ ಸತೀ ಪುನಃ ಪ್ರಷ್ಟುಂ ಬ್ರಾಹ್ಮಣಾನುಜ್ಞಾಂ ಪ್ರಾರ್ಥಯತೇ ಹೇ ಬ್ರಾಹ್ಮಣಾಃ ಭಗವಂತಃ ಪೂಜಾವಂತಃ ಶೃಣುತ ಮಮ ವಚಃ ; ಹಂತ ಅಹಮಿಮಂ ಯಾಜ್ಞವಲ್ಕ್ಯಂ ಪುನರ್ದ್ವೌ ಪ್ರಶ್ನೌ ಪ್ರಕ್ಷ್ಯಾಮಿ, ಯದ್ಯನುಮತಿರ್ಭವತಾಮಸ್ತಿ ; ತೌ ಪ್ರಶ್ನೌ ಚೇತ್ ಯದಿ ವಕ್ಷ್ಯತಿ ಕಥಯಿಷ್ಯತಿ ಮೇ, ಕಥಂಚಿತ್ ನ ವೈ ಜಾತು ಕದಾಚಿತ್ , ಯುಷ್ಮಾಕಂ ಮಧ್ಯೇ ಇಮಂ ಯಾಜ್ಞವಲ್ಕ್ಯಂ ಕಶ್ಚಿತ್ ಬ್ರಹ್ಮೋದ್ಯಂ ಬ್ರಹ್ಮವದನಂ ಪ್ರತಿ ಜೇತಾ — ನ ವೈ ಕಶ್ಚಿತ್ ಭವೇತ್ — ಇತಿ । ಏವಮುಕ್ತಾ ಬ್ರಾಹ್ಮಣಾ ಅನುಜ್ಞಾಂ ಪ್ರದದುಃ — ಪೃಚ್ಛ ಗಾರ್ಗೀತಿ ॥