ಲಬ್ಧಾನುಜ್ಞಾ ಹ ಯಾಜ್ಞವಲ್ಕ್ಯಂ ಸಾ ಹ ಉವಾಚ — ಅಹಂ ವೈ ತ್ವಾ ತ್ವಾಮ್ ದ್ವೌ ಪ್ರಶ್ನೌ ಪ್ರಕ್ಷ್ಯಾಮೀತ್ಯನುಷಜ್ಯತೇ ; ಕೌ ತಾವಿತಿ ಜಿಜ್ಞಾಸಾಯಾಂ ತಯೋರ್ದುರುತ್ತರತ್ವಂ ದ್ಯೋತಯಿತುಂ ದೃಷ್ಟಾಂತಪೂರ್ವಕಂ ತಾವಾಹ — ಹೇ ಯಾಜ್ಞವಲ್ಕ್ಯ ಯಥಾ ಲೋಕೇ ಕಾಶ್ಯಃ — ಕಾಶಿಷು ಭವಃ ಕಾಶ್ಯಃ, ಪ್ರಸಿದ್ಧಂ ಶೌರ್ಯಂ ಕಾಶ್ಯೇ — ವೈದೇಹೋ ವಾ ವಿದೇಹಾನಾಂ ವಾ ರಾಜಾ, ಉಗ್ರಪುತ್ರಃ ಶೂರಾನ್ವಯ ಇತ್ಯರ್ಥಃ, ಉಜ್ಜ್ಯಮ್ ಅವತಾರಿತಜ್ಯಾಕಮ್ ಧನುಃ ಪುನರಧಿಜ್ಯಮ್ ಆರೋಪಿತಜ್ಯಾಕಂ ಕೃತ್ವಾ, ದ್ವೌ ಬಾಣವಂತೌ — ಬಾಣಶಬ್ದೇನ ಶರಾಗ್ರೇ ಯೋ ವಂಶಖಂಡಃ ಸಂಧೀಯತೇ, ತೇನ ವಿನಾಪಿ ಶರೋ ಭವತೀತ್ಯತೋ ವಿಶಿನಷ್ಟಿ ಬಾಣವಂತಾವಿತಿ — ದ್ವೌ ಬಾಣವಂತೌ ಶರೌ, ತಯೋರೇವ ವಿಶೇಷಣಮ್ — ಸಪತ್ನಾತಿವ್ಯಾಧಿನೌ ಶತ್ರೋಃ ಪೀಡಾಕರಾವತಿಶಯೇನ, ಹಸ್ತೇ ಕೃತ್ವಾ ಉಪ ಉತ್ತಿಷ್ಠೇತ್ ಸಮೀಪತ ಆತ್ಮಾನಂ ದರ್ಶಯೇತ್ — ಏವಮೇವ ಅಹಂ ತ್ವಾ ತ್ವಾಮ್ ಶರಸ್ಥಾನೀಯಾಭ್ಯಾಂ ಪ್ರಶ್ನಾಭ್ಯಾಂ ದ್ವಾಭ್ಯಾಮ್ ಉಪೋದಸ್ಥಾಂ ಉತ್ಥಿತವತ್ಯಸ್ಮಿ ತ್ವತ್ಸಮೀಪೇ । ತೌ ಮೇ ಬ್ರೂಹೀತಿ — ಬ್ರಹ್ಮವಿಚ್ಚೇತ್ । ಆಹ ಇತರಃ — ಪೃಚ್ಛ ಗಾರ್ಗೀತಿ ॥